Jeremiya 19 - Bhibhiliya Nya Guage

Khali nya gupandrege

¹ Pfhumu Nungungulu a ngu ganela kharati, khuye: Indra ga muwumbi u ya renga khali, dzega madhota nya gukari vbakari nya vathu ni madhota nya vaphasi nya mhamba;

² u relela navo kovani wa mwamana wa Hinomi, vbafuvbi ni Nyangwa nya Lidambo, u naya ganela magana nyi na gu embelago;

³ u naya va embela, khuwe: Yingisani magana ya Pfhumu Nungungulu, enu vafumeli va Judha ni enu vavbanyi va Jerusalema. Pfhumu Nungungulu nya Tshivba Yatshavbo, Nungungulu wa Israyeli, a ngu ganela kharati, khuye: Wonani, nyi na mi rumelani wulanga wowu, libango nya likhongolo nya gu uye a na lipwago a na gulumedwa khilo dzindzeveni gwaye.

⁴ Khu kotani va nyi digidego ni gu nyenyezisa wulanga wowu, khu gu vbisela avbo libani vambe vanungungulu va ngamba vati, ambari vababe vawe ni vafumeli va Judha; va tadzide wulanga wowu khu novba nya vathu nyambana nandru.

⁵ Va giride siluvelo nya guphasele dzimhamba nya guvbiswe va vbisela nungungulu Bhahali, gasi va vbisela avbo sanana sawe; iso nyi ngamba va ruma gu gira ambari gu si alakanya monyoni gwangu.

⁶ Khu guralo, Pfhumu Nungungulu, a ngu ganela kharati, khuye: Wonani nya gukhenu ma nguta matshigu wulanga wowu wu na gumba ranwa gambe gupwani Tofeti, ambari gupwani kova wa mwamana wa Hinomi, aholu kova nya Gusasedwe.

⁷ Kholu ga wulanga wowu, nyi fuviside makungo ya Judha ni ya Jerusalema, nyi na va gira va thega khu matshari mbeli ga valala vawe ni mandzani ga vale va va vbwetago gu va songa; sirumbi sawe si na rothedwa khu sinyoni sa damboni ni gu hodzwa khu sirengo sa khabini.

⁸ Lidhoropa leli li khala gisamadziso ni gihegiso; watshavbo a na vbindrago khavbo a na samala a womba ndrodzi, khu kotani nya dzimhango dzaye nya dzikhongolo.

⁹ “Nyi na va ninga va hodza nyama nya sanana sawe nya sikhwathana ni sagadzyana, moyo ni moyo a na hodza nyama ya muakelane waye khu kotani nya ndzala, khu gu randredwa khu valala vawe gasi va songwa.”

¹⁰ Khu gulandrela u na pandra khali na wu gu wonwa khu vathu va gu bangaladzago;

¹¹ u na va embela, khuwe: Pfhumu Nungungulu nya Tshivba Yatshavbo, a ngu ganela kharati, khuye: Khu magirelo yoyo, nyi na pandrelela vathu vava gumogo ni lidhoropa leli gukhwatohi khu muthu a pandrago kanvu nya libunda, a si wu kodzi gu wu wusedza gambe, va na dzingwa dhoropani ga Tofeti khu gu hamugega wumbe wulanga nya gu va dzinge avbo.

¹² Pfhumu Nungungulu a ngu ganela kharati, khuye: Nyi na si gira ga wulanga wowu gumogo ni vavbanyi vakone; nyi na gira lidhoropa leli li fanana ni lidhoropa la Tofeti.

¹³ Dzinyumba dza Jerusalema gumogo ni dzinyumba dza vafumeli va Judha, dzi na nyenyeziswa khu sirumbi nya vathu gu fanana ni wulanga wa Tofeti; kholu va na Israyeli va litide vbatshani nya sikoli nya dzinyumba va ya vbisa libani va phasela lidambo, ngima ni dzinyeledzi, vanungungulu nya malipha.

¹⁴ Avbo Jeremiya a nga wuyago khu Tofeti, tigoni a nga rumedwago khu Pfhumu Nungungulu guya profeta lito laye; a di ema khu likupakupani nya Nyumba ya Pfhumu Nungungulu a embela vathu vatshavbo, khuye:

¹⁵ “Pfhumu Nungungulu nya Tshivba Yatshavbo, Nungungulu wa na Israyeli, a ngu ganela kharati, khuye: Wonani nya gukhenu nyi na resa libango dhoropani momu; ni sidhoropanani gwatshavbo ga Jerusalema ni mambe ya vbafuvbyana nyi mi tivisidego, kholu vathu va tigoni momu va bangiside mihungo yawe va si dzumeli gu yingisa magana yangu.”