Jeremiya 17 - Bhibhiliya Nya Guage

Gighoho ni tsayiso

¹ Gighoho gya Judha gi lovidwe umo nya gileti khu simbi na gi bethidwe khu tshokha nya dhayimane, gi lovidwe myonyoni gwawe ni dzikhehoni nya siluvelo sawe.

² Sanana sawe sa gu alakanya siluvelo sawe, ni umo nya sifananiso sa Asera, ni vbavbatshi nya misimbo nya gunyuge ni musigomoni.

³ Uwe gigomo gyangu gya khabini, thomba yago ni gyuma gyago gyatshavbo si na phangwa khu valala vago, gumogo ni musigomoni gwago gatshavbo u phaselago umo khu kotani nya sighoho u giridego tigoni gwago gwatshavbo.

⁴ Khu guralo, nyi na dusa mandzani gwago thomba yatshavbo nyi gu ningidego, nyi na gu gira u thumela valala vago, ga litigo u si litigo; kholu u vaside nilo nya likhulo langu, wu na khondra nyamba tshimega.

Tsayiso nya gulemele

⁵ Pfhumu Nungungulu a ngu ganela kharati, khuye: A na vadwe muthu wule a tumbago muthu kwawe, a dzi seketela avbo nya givangwa nya nyama ni novba, monyo waye na wuri hwindzo ni Pfhumu Nungungulu!

⁶ Muthu nya nga yoyo, a ngu fanana ni magukhu nya guwune ya giwulani; uye gima kha na wona makategwa ma guta; aholu a na khala malangani nya gihala ya mugiwulani, litigo nya munyu nyamba khadwa khu muthu.

⁷ Kategide muthu wule a tumbago Pfhumu Nungungulu, a vegago gitumbo gyaye ga Pfhumu Nungungulu.

⁸ Kholu uye a na fanana ni simbo wu yadwego bambe nya mati, mikhamba yaye yi navago kala matini, ambari li khondra lihani kha wu wuni: Aholu mahagane yaye ma gu nyuga gikhati gyatshavbo; kha wu khathali khu gihala, gikhati gyatshavbo wa gu ninga mihandro.

⁹ Gimwalo gi kanganyisago guvbindra monyo, madwali yaye kha ma thumwi. A na tidwa khu mani?

¹⁰ Eni, kheni Pfhumu Nungungulu, nyi ngu khedza mapimo nyi linga myonyo; gasi nyi ninga moyo ni moyo tshatshazelo yaye, ni mihandro nya sigiro ni thumo waye.

¹¹ Muthu a wungedzelago thomba khu wukanganyisi; a gu fanana ni tshugwa yi fundramelago mandra yi ngamba ma vega; vbakari nya matshigu yaye a na yi luza, khu guhegisani a na khala madhadhavale.

Nombelo wa Jeremiya

¹² Gikhalo gyathu nya wudhumo, gi khusegidego ngudzu gukhugela guhegulani, khu wulanga wathu nya miphaso.

¹³ Uwe Pfhumu Nungungulu u gitumbo gya Israyeli! Vatshavbo va gu digago va na thedwa dzitshoni; malina ya avo va hambanago ni uwe ma na lowa phalani nya vafi; kholu va hambanide ni Pfhumu Nungungulu, a gu nambo nya mati nya womi.

¹⁴ Pfhumu Nungungulu, nyi thume gasi nyi kodze gu vbanya, nyi vbulugise gasi nyi kodze gu vbuluga; kholu uwe khuwe wuzundzo wangu.

¹⁵ Wona nya gukhuwe va gu nyi embela, khavo: “Momo hayi magana a ganedego Pfhumu Nungungulu? Ma na tadzisege, na!”

¹⁶ Aholu eni kha nya gu lomba gu va rumela mabango; ambari gu va suvela gu wona dzimhango; uwe u ngu dziti gwadi, kholu nyi ganede mbeli gwago.

¹⁷ U nga khali gilo nya guthavise avbo gwangu; uwe u gu wuthavelo wangu litshigu nya mhango.

¹⁸ Va na tale khu dzitshoni vale va nyi tshanisago, aholu eni nyi nga thegi dzitshonini; va na ndrendremele avo, nasiri eni; va na thegedwe khu libango nya wuvi, u va sasela khu dzimhango nya guwuyelele.

Guagisa litshigu nya Sabhadho

¹⁹ Pfhumu Nungungulu a di nyi embela kharati, khuye: Indra uya ema nyangwani ga sanana sa tigoni, umo gu belago ni gu duga vafumeli va Judha, kha nga gambe ni dzinyangwani dza Jerusalema;

²⁰ u naya va embela, khuwe: Yingisani magana ya Pfhumu Nungungulu, enu vafumeli va Judha, ni vathu vatshavbo va Judha ni vavbanyi va Jerusalema, mu belago khu dzinyangwa dzedzi.

²¹ Pfhumu Nungungulu a ngu ganela kharati, khuye: Mwa gu vbweta guvbanya, dzi woneleni mu nga rwali mirwalo khu litshigu nya Sabhadho, gambe mu nga bedzini gilo khu dzinyangwani dza Jerusalema.

²² Mu nga dusi ni wevbini rwalo wa ndrangani gwanu khu litshigu nya Sabhadho, ambari gu thuma ni wevbini thumo, aholu agisani litshigu nya Sabhadho, kha nga idzo nyi leletedego khidzo vababe vanu.

²³ Aholu avo kha va nyi yingisa, va di bangisa mihungo, va si landrisi ni gu hakha gulaya gwangu.

²⁴ Pfhumu Nungungulu a ngu ganela, khuye: Mwa gu nyi yingisa khu lisine, kha mu na rwala mirwalo nya gulemele mu vbindra nayo khu dzinyangwani dza dhoropani momu khu litshigu nya Sabhadho, aholu mu na ninga githawo litshigu nya Sabhadho, mu li agisa nyamba thuma gilo.

²⁵ Khu guralo, va na simama va bela khu dzinyangwa nya lidhoropa leli la Jerusalema, vafumeli ni manganagana, na va khilede dzikareta ni dzikavalu, gasi guya khala vbagikhalotunu nya wufumu wa Dhavhidhe. Va bela ni manganagana yawe, vathu va Judha gumogo ni vavbanyi va Jerusalema; lidhoropa leli li na bani liri ni vathu kala gupindruga.

²⁶ Va nata khu madhoropani ya Judha, khu wubambe wa Jerusalema, khu mayigwana ya Bhejami, khu mapanini, khu musigomoni ni Marandzi, va resa miphaso nya guvbiswe, miningelo nya wuguvbi ni libani, ni miningelo nya gubonge, Nyumbani ga Pfhumu Nungungulu.

²⁷ “Aholu, mwa gumba nyi yingisani, mu si dzumeli gu agisa litshigu nya Sabhadho, ni gu rwalani mirwalo nya gulemele, mu bela nayo khu dzinyangwani nya lidhoropa khu litshigu nya Sabhadho, nyi na vasa nilo wu nata dagaredzisago dzinyumba dzatshavbo nya wufumu dza Jerusalema, uwo wu na gumba tshimega gambe.”