Jeremiya 12 - Bhibhiliya Nya Guage

Ketso ya Jeremiya

¹ Uwe Pfhumu Nungungulu u lulamide, kha nyi dzi kodzi gu ganedzisana nago; ambari ulo, nyi na ni mahungu nyi vbwetago gu gu wudzisa, kheni: Khu ginani va nya guvivbedwa khu monyo va andrago mithumoni gwawe? Khu ginani vatshavbo va girago guvivba, gikhati gyatshavbo va vbanyago na va tangade?

² U va yade, avo va thede mikhamba; va ngu dandra va ninga mihandro; va na ni Uwe khu magana, aholu khu myonyoni gwawe vomo hwindzo nago.

³ Aholu uwe, Pfhumu Nungungulu U ngu nyiti, U ngu nyi wona, gambe U ngu khedzisisa monyo wangu idzo wu gu golago khidzo; va nya guvivba va ndrindrele phuvbo gufanane ni nvuta yi yiswago gusongwatunu! Va dongisele litshigu nya gusongetedwe.

⁴ Kala lini litigo na liri ni gililo, ni gu banga mwasi wa marembweni gwatshavbo? Khu kotani nya guvivbe nya avo va vbanyago umo, gu ngu mbemba sirengo ni sinyoni; na va gukhavo: “Uye kha na wona mahegiso yathu.”

Phindrulo ya Nungungulu

⁵ Olu u vbiredzelago gu garala wa gu palisana ni vathu va tutumago khu migondro, u na dzi kodza kharini gu palisana ni avo va khiledego dzikavalu? Olu u gumba dzipwa nu khadzisegide tigoni nya gurule, u na ya gira kharini sipoponi ga Joridhani?

⁶ Kholu ambari ni vandriyago gumogo ni ndranga ya babe wago, avo navo va gu logovedzide; avo kamwe va ngu gu lundra na va gu gira ligwaha nya likhongolo. Ambari va gu gu sengedzela khu silo nya gumbure u nga va tumbi.

Nungungulu a ngu tsayisa vapfhungumuli nya litigo

⁷ Nyi digide gu tangadzisa ndranga yangu, nyi digide thomba yangu; nyi ningela gigodwa gyangu mandzani ga valala vaye.

⁸ Vathu nya thomba yangu, va di nyi wugela va khala kha nga nghala ya khabini; va khuside lito va nyi bhongela; khu kota nya isoso, nyi di va gorogela.

⁹ Ina Vathu nya thomba yangu va thendregedzide va nyi wugela va khala kha nga liphala nya nyaduguli yi pomedwago khu makoti? A gu bani ari kharato, makoti ma na nyi randrela khu malangani yatshavbo; tombanani enu sirengo satshavbo sa khabini, deluni mu ta va vbadzulela.

¹⁰ Vahavisi nya vangi va ghohetede lithembwe langu ni gu gandredzela thomba yangu; va dzegide gipandre gi nga bani gi nyi tsakisa, va gi gira giwula.

¹¹ Va li ghohetede, la gu lila avbo gwangu khu kotani nya olu li khadego giwula; litigo latshavbo li pfhungumudwe, aholu mwalo a khathalago khu isoso.

¹² Vapfhungumuli va dita khu malangani yatshavbo nya sigomo ni ya giwulani; kholu litshari la Pfhumu Nungungulu li na vbiyela litigo leli gukhugela mahegiso kala mambe mahegiso nya litigo; mwalo ni moyo a na manago gurula.

¹³ Va di yala tirigu, va vbwera miba; va dzi garadzide mahala; mu na khalani dzitshoni khu mihandro nya guvbwere gwanu; khu kotani nya gukhondre nya nilo nya likhulo la Pfhumu Nungungulu.

¹⁴ Khu mahungu ya vaakelane vangu vatshavbo nya guvivbedwe khu monyo, avo va nga phangago thomba yangu nyi nga tshiyelago vathu vangu va na Israyeli, Pfhumu Nungungulu a ngu ganela kharati, khuye: “Nyi na va dusa tigoni gwawe, ni linyumba la na Judha nyi na li dusa nilo vbakari gwawe.”

¹⁵ Aholu, khu hwane nya gu bani nyi va duside, nyi na bwelo khavbo nyi va pwela wusiwana, nyi na va bweledza moyo ni moyo thombani gwaye, muthu ni muthu a bwelela tigoni gwaye.

¹⁶ Va gu bani va hevbude dzindzila dza vathu vangu, gasi va sambanya khu lina langu, khavo: Khu Pfhumu Nungungulu a vbanyago; kha nga olu u hevbudzidego vathu vangu gu sambanya khu Bhahali, khu guralo, avo va na vbaha vbakari nya vathu vangu.

¹⁷ Aholu, va gumba yingisa, nyi na va wandrela litigo lile, nyi va mbembisa; a ngu ganela Pfhumu Nungungulu.