Jeremiya 1 - Bhibhiliya Nya Guage

I. MILOMBELO YI NGA GIREDWAGO VATHU VA NUNGUNGULU Guranwa ga Jeremiya

¹ Magana ya Jeremiya, mwamana wa Hilikiya, moyo nya vaphasi nya mhamba a nga bani na gu khala dhoropani ga Anatoti, tigoni ga Bhejami;

² Magana ya Pfhumu Nungungulu, ma rumedwe ga Jeremiya, matshiguni ya Josiya, mwamana wa Amoni, mufumeli wa Judha, khu mwaga nya likhumi na miraru nya gufume gwaye;

³ ma rumedwe gambe matshiguni ya Jowakimi, mwamana wa Josiya, mufumeli wa Judha, kala guvbelani nya ngima nya likhumi na moyo nya gufume ga Zedhekiya, mwamana wa Josiya, mufumeli wa Judha, kala avbo vathu va Jerusalema va nga modwa va vbagedwa vaya wugumbitunu khu ngima nya livbandre.

⁴ Mahungu ya Pfhumu Nungungulu ma dita avbo gwangu ma ta nyi embela, khayo:

⁵ “Eni nyi gutide nusi gu wumbwi ndrani ga mayi wago;” nyi gu hathide nu si gu velegwi, nyi gu phasela gu khala muprofeti ga mayigo.

⁶ Khavbo avbo, eni nyi di hakha, kheni: “Oh! Pfhumu Nungungulu! Wona nya gukhuwe kha nyi kodzi gu ganela; kholu eni nyi ngari gyanana.”

⁷ Aholu Pfhumu Nungungulu a di nyi embela, khuye: “U nga ganeli gukhuwe nyi ngari gyanana; kholu umo nyi na gu rumago, u na hongola, u ya ganela satshavbo nyi gu rumelago.”

⁸ U nga va thavi, kholu eni nyi nago gasi gu gu vbulugisa, a ngu ganela Pfhumu Nungungulu.

⁹ Khu gulandrela, Pfhumu Nungungulu a di thawuludza gyandza gyaye, a kuha likana langu a ganela, khuye: “Wona, nyi ngu vega magana yangu kanani gwago.

¹⁰ Wona nya gukhuwe muhuno nyi ngu gu ninga tshivba nya gufumele mayigo ni mifumo, u na wandra ni gu pfhungumula, u mbembisa muphelo; ni gu vbahedza ni gu yala.”

Giwoniso nya lipitso nya mendrwa

¹¹ Pfhumu Nungungulu a di engedza gambe a nyi rumela magana yaya, khuye: “Jeremiya, ginani u gi wonago?” Eni nyi hakha, kheni: “Nya gu wona lipitso nya mendrwa.”

¹² Pfhumu Nungungulu a di nyi embela, khuye: “U wonide gwadi; kholu eni neni nyi vbiredzede gu gira iso nyi ganedego.”

Giwoniso nya khali niloni

¹³ Khu gulandrela, Pfhumu Nungungulu, a di nyi rumela magana yaya, khuye: “Ginani u gi wonago?” Nyi di hakha, kheni: “Nya gu wona khali yi vilago, na yi wegelede phuvbo ga Wuronga.”

¹⁴ Pfhumu Nungungulu a di nyi embela, khuye: Mhango yi nata khu Wuronga ga vavbanyi vatshavbo va tigoni.

¹⁵ Khu guralo, nyi na ramba mahundzu yatshavbo nya mifumo ya Wuronga, a ngu ganela Pfhumu Nungungulu. Mufumo ni mufumo a nata vega gikhalo gyaye nya wufumu dzinyangwani ga Jerusalema, gasi gu wugela mabhiyo ma bhiyidego madhoropa yatshavbo ya Judha.

¹⁶ Khu guralo, nyi na va lamula gukhedza khu guvivba gwatshavbo va giridego. Kholu, va hambanide ni eni, va vbisela libani vambe vanungungulu, ni gu khozela vanungungulu va nga girago khu mandza yawe.

¹⁷ Aholu uwe, khuga u ema u dzi hunga giwunu khu libhandri, u va embeledzela satshavbo nyi na gu rumago; u nga vbeli tshivba mbeli gwawe, kholu gimwalo gi na gu thelago hwanga.

¹⁸ Wona nya gukhuwe gukhugela muhuno nyi na gu gira lidhoropa nya gutiye, kha nga lidingo nya dzisimbi, ni libhiyo nya sugu, gasi u vhikela litigo latshavbo, vafumeli va Judha, vathangeli vaye, vaphasi nya mhamba ni vathu vaye vatshavbo.

¹⁹ “Va na dwana nago, aholu kha va na gu pala; kholu eni nyi na bani nyiri nago gasi gu gu vbulugisa; a ngu ganela Pfhumu Nungungulu.”