Jakobe 4 - Bhibhiliya Nya Guage

Tumbunugo nya guvengane

¹ Ma guta khu hayi mayunga ni guhambana vbakari gwanu? Ma guta khu gunavela nya guvivbe gu dwanago gikhati gyatshavbo sivbangoni gwanu.

² Enu mwa gu vbweta silo nya singi, khu gumba si manani, mu ngu dzumela gu songa kala mu si mana. Mu ngu dogorela, aholu, khu gumba si mana esi mu si vbwetago, mu ngu dwana, mu vengana. Kha mu si mani esi mu si vbwetago, kholu kha mu lombi ga Nungungulu.

³ Mwa gu lomba, kha mu ningwi, kholu, kha mu kodzi gu lomba. Enu mwa gu lombani silo nya gutsakise sivili sanu.

⁴ Vathu nyamba khodwa! Ina kha mu dziti nya gukhenu wa gu khala pari nya mafu, wa gu dzigira nala wa Nungungulu, gani? Oyu a vbwetago gu khala pari nya litigo, a gu khala nala wa Nungungulu.

⁵ Mwa gu alakanya gukhenu Milowo nya Guage ya gu ganela mahala, yi gu, khiyo: “Ina Liphuvbo li vbanyago milini gwathu, Nungungulu a di li gira khu wufu, gani?”

⁶ Uye a ngu ninga giphaso; kholu, Milowo nya Guage yari, khiyo: “Nungungulu a ngu wugela va nya matshandza, a phasedzela va nya gu dzi nogisa.”

⁷ Khu guralo, yingisani Nungungulu, mu wugela Sathane, uye a na tutuma.

⁸ Hidzimelani vbafuvbi ga Nungungulu, uye nuye a na mi hidzimelela. Hambani mandza, enu sighohi! Agisani myonyo yanu, enu vapfhadzi.

⁹ Garadzegani, mu womba dzihuwa, mu lile. Vbindrugedzani mahego yanu khu gulila, ni gutsaka gwanu, khu guswihala.

¹⁰ Dzi sodziseni mbeli ga Pfhumu, uye a na mi khusedza.

U nga alakanyeli guvivba muthu kwanu

¹¹ Vandriyangu, mu nga ganelelani guvivba khu gyanu. Oyu a ganelago guvivba khu ndriyaye mwendro gu mu lamula, a ngu ganela guvivba khu nayo, a wu lamula. Uwe wa gu lamula nayo, gu yeyedza gupwani khuri muthu u landrisago nayo, aholu u muthu u lamulago nayo.

¹² Nungungulu khuye basi a vegago milayo, khuye gambe basi mulamuli. Uye basi khuye a dzi kodzago gu vbanyisa ambari gu khungumula. Gasi khuwe mani uwe u lamulago ndriyago, na?

Gumba dzi gugumugisa

¹³ Olu, upwani, enu mu ganelago, khenu: “Muhuno, mwendro mindru hi na hongola dhoropani nya gukari hi ya khala mwaga, hi gira wugwewo wathu, hi mana nya singi.”

¹⁴ Enu kha mu dziti gukhenu mu na wuga kharini mindru! Kholu womi wu khade kha nga hunguva yi dugago khu guvbiredza, yi vbindra nyamba hwela.

¹⁵ Ganelani, kharati: “Pfhumu ya gu dzina, ha gu vbanya hi na gira egi, hi na gira gile.”

¹⁶ Aholu, enu mu va nya matshandza, mu vbanyago khu gu dzi khusedza, kharato, khandri gwadi.

¹⁷ Khu guralo, oyu a kodzago gu gira gwadi aholu a si giri, a ngu ghoha.