Isaya 8 - Bhibhiliya Nya Guage

Gupfhungumudwa ga mifumo ya Israyeli ni Siriya

¹ Pfhumu Nungungulu a di nyi embela, khuye: “Dzega gileti nya gikhongolo u lova khu malovelo nya guwonege, khuwe: Vbiredzela-Guphanga-Vbiredzela-Gusasela.”

² Nyi di dzega dzifakazi dzimbili nya gutumbege, muphasi nya mhamba Uriya, ni Zakariya, mwamana wa Jebherekiya.

³ Khu gikhati gyogyo, nyi di hengela malawu ni muprofeti nya nyamayi, uye a di khura mimba a velega gyanana nya gikhwathana. Pfhumu Nungungulu a di nyi embela, khuye: “Gi riye lina, khuwe: Vbiredza-Guphanga-Vbiredzela-Gusasela.

⁴ Kholu, gyanana na gi si gu kodzi gu gu rana khigyo baba wangu, mwendro mayi wangu, thomba ya tigoni ga Dhamasiko ni gyuma gya Samariya, si na wandrwa si ya ningedwa ga mufumeli wa Asiriya.”

Wudhumeli wa Asiriya

⁵ Pfhumu Nungungulu a di engedza a nyi embela, khuye:

⁶ “Kha nga olu vathu vava va yeyisidego mati ya Silowe, ma gogago gwadi khu gutenga, va tsakiswa khu Rezimi ni mwamana wa Remaliya,

⁷ wona nya gukhuwe, Pfhumu a na resa gwawe mati nya tshivba nya tsongo wa Ewufrate, a gu mufumeli wa Asiriya a na tago ni dzinyimbi dzaye dzatshavbo nya tshivba. Va na fola va enedza dzibambe gwatshavbo nya tsongo;

⁸ mati ma na bela tigoni ga Judha, kha nga ndrambi, ma langaladza vathu kala dzithamoni. Guanama nya mambapi yaye gu na fenengedza guanama nya litigo lago, uwe Emanuweli.

Pfhumu Nungungulu gitumbo gyathu

⁹ Ndrendremelani enu vathu, kholu mu na vbadzuledwa; yingisani, enu vathu va mayigoni ga hwindzo, somani matshari, kholu mu na vbadzuledwa! Somani matshari kholu mu na vbadzuledwa.

¹⁰ Ambari mwa gu hungani gikungo, gi na pfhungumudwa, ambari mwa gu lugani mano, kha mu na dugelela, kholu Nungungulu a na ni ethu.

¹¹ Kholu Pfhumu Nungungulu a nyi embede kharati, gikhati a nga nyi handzega mandza yaye nya tshivba, a gu nyi hambanisa ni ndzila ya vathu vava, khuye:

¹² “Mu nga ganeli gukhenu ghudzeghudze ga satshavbo esi vathu vava va gukhavo, ghudzeghudze, gambe mu nga thusedzedwi khu esi avo va si thavago.”

¹³ Pfhumu Nungungulu nya Tshivba Yatshavbo, khuye basi mu yelago gu mu rana gukhenu agide; khuye basi mu yelago gu mu khidzimela ni gu mu ninga githawo.

¹⁴ Uye a na bani ari wulanga wanu nya miphaso; kholu a na khala kha nga giwindri nya gutshunganise ni givalo nya dzinyumba dza dzimbili dza Israyeli, ni naphwi nya gutshunganise vavbanyi va Jerusalema.

¹⁵ Nya vangi va na gyawe va na tshunganela va thega, va vbadzuledwa; va na modwa, khu naphwi va sindra ni gu dzi vbulugisa.

Nungungulu a ngu siha khovbe yaye

¹⁶ Vegedza wufakazi wangu, u namega nayo ga vapizane vangu.

¹⁷ Nyi na tumba Pfhumu Nungungulu, wule a sihelago khovbe yaye sanana sa Jakobe, nyi na vega gitumbo gyangu avbo gwaye.

¹⁸ Nyi womo avba, gumogo ni sanana nyi ningidwego khu Pfhumu Nungungulu, gasi hi khala siyeyedzo ni siliwugiso tigoni ga Israyeli khu ga Pfhumu Nungungulu nya Tshivba Yatshavbo, a vbanyago gigomoni ga Siyoni.

¹⁹ Vambe va na mi kutsedzela, khavo: Wudzisani maphuvbo ya vale va fudego ni valoli nya dzisolo va ngurangurago ni gu lembelana; ina kamwe va na Israyeli va gu bani vari ni mahungu kha va na ngaya wudzisa Nungungulu wawe, gani? Ina avo va vbanyago va ngu yela guya wudzisa avo va fudego, gani?

²⁰ Nga khedzani umo nya Nayo ni wufakazi! Wa gumba ganela khu maganelelo yaya, vathu gima kha va na wona gugya.

²¹ Vathu va na legalegiswa ni litigo na va gu tshaniswa ni gupwa ndzala; gikhati va na rerekago khu ndzala, va na vala mufumeli ni Nungungulu wawe, na va gu khedza vbatshani.

²² Va na khedza mafuni, gambe va na wona tshanisa, gidema ni wuvi nya wukhongolo ngudzu; khu hwane, va na rinywa gidemani nya guthise.