Isaya 64 - Bhibhiliya Nya Guage

¹ Oh! Nari gupwani u ngu pferula ndzadzini u tshiga! Sigomo si di hadza gu tsekatseka mbeli gwago!

² Gufanana ni nilo gikhati wu thedwago dzikhuni nya gubange wu khondra, wu vilisa mati, gasi valala vago va kodza guti lina lago, kharati mayigo ma di hadza gu ndrendremela mbeli gwago!

³ Avbo u nga bani u gira silo nya guthavise, hi nga bani ha sa si lindrela, u di tshiga, sigomo si di tsekatseka mbeli gwago.

⁴ Kholu gukhugela gikhati gya gale, gu si gu pwali silo nya nga esi, ambari khu dzindzeve, mwalo a si pwidego, mwendro khu maho gu wona Mumbe Nungungulu, vbavbandze ga uwe, u girelago nya singi vale va gu tumbago.

⁵ U ngu phasedzela wule a girago gululama na tsakide, vale va si divaligo dzindzila dzago; hi ngu wona nya gukhethu u khuvegide, kholu hi ghohide; gale na hi gu ghohela; hi na vbanyiswa, gani?

⁶ Aholu ethu hatshavbo hi womo kha nga wule a nyenyezidego, ni gululama gwathu gwatshavbo, kha nga mwendra nya gunyenyeze; hatshavbo hi ngu wu na kha nga mahagane, ni guvivba gwathu, gwa gu fanana ni phuvbo yi hi vbuvbisago.

⁷ Olu mwalo ni muthu moyo a lombelelago khu lina lago, gambe mwalo ni moyo a hidzimelago vbafuvbi gwago; kholu u ngu hi sihela khovbe yago, u ngu hi mbembisa khu kotani nya guvivbe gwathu.

⁸ Gasi olu, uwe Pfhumu Nungungulu, Uwe khuwe Babe wathu, ethu hi libumba, uwe khuwe muwumbi wathu; ethu hatshavbo hi thumo nya mandza yago.

⁹ Uwe, Pfhumu Nungungulu, u nga khuvegi ngudzu, ambari gu alakanyela gikhati gyatshavbo guvivba gwathu. Khu guralo, wona, ethu hi ngu gu lomba khethu: Ethu hatshavbo hi vathu vago.

¹⁰ Madhoropa yago nya guage, ma khade giwula, Siyoni, khade mafu nya gihala; ni Jerusalema khade marumbi.

¹¹ Nyumba yathu nya wumburi nya guage, umo vababe vathu va nga bani va gu dhumisa umo, yi vbisidwe; sombo sathu satshavbo nya lisima si khungumuledwe.

¹² Uwe Pfhumu Nungungulu, ina silo satshavbo sesi, kha si gu khumbi, gani? U na simama gu degula u hi diga ni gu hi tshanisa ngudzu guvbindra pimo, gani?