Isaya 62 - Bhibhiliya Nya Guage

Wudhumo wa Jerusalema guphya

¹ Khu kotani nya lihaladzo nyi gu nalo ni Siyoni, kha nyi na degula, khu lihaladzo langu ga Jerusalema, gima kha nyi na hefemula, kala gululama gwago gu duga kha nga wuronga, guvbanyisa gwago, kha nga mwenge wu khondrago.

² Mayigo ma na wona gululama gwago, ni vafumeli vatshavbo, va na wona wudhumo wago; u na ranwa khu lina nya liphya u na riywago khu Pfhumu Nungungulu.

³ U na bani uri gihugu nya wudhumo mandzani gwa Pfhumu Nungungulu, u khala gihugu nya wufumu mandzani ga Nungungulu wago.

⁴ Gima khu na ranwa gambe “Oyu a digidwego,” ambari litigo lago gu gu ranwa gupwani “Marumbi;” aholu, va na gu ranwa pwani “Gigodwa gyangu;” ni litigo lago, li na ranwa gupwani “Pfhumugadzi;” kholu Pfhumu Nungungulu a gu gode ngudzu; a na dzegana ni litigo lago.

⁵ Kholu, kha nga lidzaha li dzeganago ni mbiri, kharato nugo sanana sago si na dzegana nago; kha nga mwama nya khundzwa a tsakiswago khu mwangadzi waye nya khundzwa, kharato nugo Nungungulu wago a na nengela khu uwe.

⁶ Mabhiyoni gwago, uwe Jerusalema, nyi vegide vawoneleli, wutshigu ni mihani gima kha va na degula gambe; enu, mu alakanywago khu Pfhumu Nungungulu, mu nga garali,

⁷ ambari gu mu ningani guhefemula kala a wusedza Jerusalema gu khala nga gilo gi zundzegago tigoni.

⁸ Pfhumu Nungungulu sambanyide khu gyandza gyaye gya nyamudye ni libogo laye nya tshivba, khuye: “Gima kha nyi na ningela gambe tirigu yago yi khala guhodza ga valala vago, ambari va nya mayigo gu va sela wadwa wago, a gu handro nya lithonga lago.

⁹ Aholu, avo va vbwerago tirigu, va na hodza na va bonga Pfhumu Nungungulu; ni avo va havelago dziuvha, va na sela wadwa makupakupani nya nyumba yangu nya guage.”

¹⁰ Dugani, dugani khu myanya! Tulelani ndzila vathu vangu! Guledzelani, guledzelani makondro! Mu duselani siwindri! Ghwimbani ngavbya gasi va nya mayigo va wone!

¹¹ Wonani gukhenu Pfhumu Nungungulu magana yaye ma vbohide kala mahegiso nya litigo, khuye: “Embelani lidhoropa la Siyoni, khenu: Wona a nguta muvbanyisi wago; a nguta ni tshatshazelo waye a gu vathu a va tshudzisidego a va thangisa mbeli gwaye.

¹² Va na ranwa gupwani Vathu va Agidego, Va tshudzisidwego khu Pfhumu Nungungulu; ni uwe Siyoni, u na ranwa pwani u Lidhoropa u Vbwetwago, Khandri u Giwula.”