Isaya 61 - Bhibhiliya Nya Guage

Mahungu maphya nya guvbanyise

¹ Liphuvbo la Mune, Pfhumu Nungungulu lomo avbo gwangu, kholu Pfhumu Nungungulu a nyi todzide khu mafura, a nyi wumbela gasi nyi huwelela mahungu maphya ga avo va vbedego tshivba; a nyi rumide guya hawulugisa avo va gu ni myonyo yi khuvekidego, ni gu huwelela gutshulega ga dzikhumbi, ni gu dusa vale va khothedwego mapasoni;

² Pfhumu Nungungulu a nyi rumede guya tivisa mwaga nya wadi ni litshigu nya gu dzi phodzele ga Nungungulu wathu; ni gu tangadzisa vale va lilago.

³ Ni gu degudza vatshavbo vale va lilago va Siyoni, ni gu va ambagisa gihugu wulangani nya nguma, ni mafura nya gutsake, wulangani nya gililo, ni ngandzu nya wuzundzo, wulangani nya wuvi; gasi va ranwe gupwani misimbo nya gululame, yi yadwego khu Pfhumu Nungungulu gasi gu dzi dhumisa khiyo.

⁴ Va na vbahedza nyaluphye marumbi ma pfhungumudwego gukhugela gikhati gya gale, va wusedza dzinyumba dzi khungumudwego khu gale, va vbahedza madhoropa ma pfhungumudwego gikhatini gya gale.

⁵ Vathu nya mambe mayigo va nata havisa mitshambi yanu; va nya mayigo va na khala valimeli vanu ni vasayisi nya marembwe yanu nya vhinya.

⁶ Aholu enu mu na ranwa vaphasi nya mhamba ya Pfhumu Nungungulu, va na mi rana sithumi sa Nungungulu wathu. Mu na hodza dzithomba dza va nya mayigo, ni dzithomba dzawe, dzi na khala dzanu.

⁷ Wulangani nya dzitshoni va dzi manego vathu vangu, va na hakha nyondro mbili, ni ga givalo ni gipoyilo mu gi manego, mu na hakhani gambe khu gu wuyelela nyondro mbili dzithomba nya mayigo yawe, mu na khalani khu gunengela ni litsako kala gupindruga.

⁸ Kholu eni, Pfhumu Nungungulu, nya gu gola gululama, nyi venga wuvafa ni malipha; nyi na va ninga khu gutumbega tshatshazelo yawe, bwelo khavbo nyi hunga navo gidzumeledzwano kala gupindruga.

⁹ Livelego lawe li na tidwa vbakari nya mayigo, ni situgulwana, si na tidwa vbakari nya mambe mafumbo. Vatshavbo va na va wonago, va na vati kha nga melego wu kategisidwego khu Pfhumu Nungungulu.

¹⁰ Nyi na nengela ngudzu ga Pfhumu Nungungulu, hefemulo wangu wu na tsakela Nungungulu wangu; kholu a nyi ambagiside guambala nya guvbanyise, a nyi fenengedza khu mwendra nya gululame. Gukhwatshi khu mudzegi a dzi mburisedego khu gihugu nya buzo, kha nga nyamayi nya khundzwa a dzi mburiselago khu dziphera nya ndralama.

¹¹ Kholu kha nga mafu ma bugisago misimbo yatshavbo, ni lithembwe li bugisago dzimbewu dzi yadwego umo, kharato nuye Mune, Pfhumu Nungungulu, a na bugisa gululama ni wuzundzo vbakari nya mayigo yatshavbo.