Isaya 59 - Bhibhiliya Nya Guage

Muprofeti a ngu dawulela sighoho sa Israyeli

¹ Wonani nya gukhenu gyandza gya Pfhumu kha gya khwenyela nya gu tandrege guvbanyisa; ambari ndzeve yaye kha ya segega, nyamba kodza gupwa.

² Aholu, guvivba gwanu khugo gu mi hambanisago ni Nungungulu wanu; sighoho sanu si sihide khovbe yaye gasi a si mi yingisi.

³ Kholu mandza yanu ma nyenyezisidwe khu novba, ni dzinyala dzanu dzi tade khu guvivba; khu maganani gwanu gu duga malipha, ni malimi yanu, ma gu ganela guvivba.

⁴ Mwalo a ganelago gululama, mwa gu lamudwa mwalo a ganelago lisine, mwa gu dzi emisela ga iso nyamba sadi mu ganela malipha. Mwa gu khura mimba khu wuvivbi mu velega gighoho.

⁵ Mwa gu fundramela mandra nya nyoga, mu lugela wulelu nya gitoli, uye a hodzago mandra yoyo a nafa; uye a li gandrago li pandrega gu duga nyoga.

⁶ Wulelu wawe kha wu phasi gilo gu gira mwendra, mwalo a dzi kodzago gu dzi fenengedza khu sombo va girago; mithumo yawe khya guvivba, mandzani gwawe gu tade khu mithumo ya dzihanyi.

⁷ Migondro yawe ya gu tutumela guvivbani yi gu vbiredza, gasi guya songa muthu nyambana nandru; maalakanyo yawe khya gu gira guvivba, umo va gimbilago, gu sasela ni gumbembisa basi.

⁸ Kha va vbweti ndzila yi resago gurula, ambari gu gimbila khu gululama; va dzi girede dzindzila nya guwegele, ni wevbini a yi landrago kha gu mani gurula.

⁹ Khu guralo, gulamudwa gu ngari hwindzo ni ethu, guvbanyiswa kha gu vbohi vbafuvbi gwathu. Ha gu vbweta wenengedzo, ha gu wona gidema basi; hi vbweta gu gimbila khu safa nya mihani, aholu hi mana gidema.

¹⁰ Ha gu phiphithela dzindzarini gukhwatshi hi sikhumu, si phiphithelago khu gumbana maho, ha gu tshunganela vbakari nya mihani, gukhwatshi ha gu gimbila gidemani, hi vathu nya tshivba, aholu ha gu fanana ni vathu va fudego.

¹¹ Hatshavbothu ha gu bhonga kha nga sikankanka, hi dilela gu fanana ni sipomba; hi lindrela gulamudwa, aholu kha hi gu mani; hi lindrela guvbanyisa, ugo nugo gu manega hwindzo ni ethu.

¹² Kholu mithumo yathu nya gunyenyeze yi ngu engedzelana mahoni gwago, ni sighoho sathu si ngu hi fakazela; kholu mithumo yathu nya gunyenyeze yomo avbo gwathu, gambe hi ngu guti guvivba gwathu.

¹³ Hi ndragide milayo ya Pfhumu Nungungulu ni gu ganela malipha, hi dzi duside ga Nungungulu wathu, hi thumisa gigaha ni wuwugeli, hi ganela malipha ma tadego myonyoni gwathu.

¹⁴ Kholu nayo wu thavide, ni gululama gu hidzimede hwindzo; lisine li thegede mitendrelani, ni gululama kha gu dzi kodzi gubela umo.

¹⁵ Gumwalo lisine, uye a digago gu gira iso nya guvivbe a gu phangwa. Pfhumu Nungungulu a si wone isoso a vbisega khiso, kholu gu diri mwalo gululama.

¹⁶ Pfhumu Nungungulu wonide nya gukhuye mwalo ni moyo nya guphase kwawe. A di samala khu gu wona gukhuye mwalo a lamulelago vathu; khu guralo, a di hongola uye mune wurumba, aya dwana a va pala, gasi gu yeyedza gukhuye khuye mulamuleli.

¹⁷ A di ambala wululami gukhwatshi gikatawu nya gikete, ni gupala kha nga gihugu nya gu dzi vbanyise hungoni gwaye; bwelo khavbo a ambala guambala nya guphodze, a ambala guvbisega, gukhwatshi libhadzi.

¹⁸ A na bweledzela tshatshazelo ga moyo ni moyo gukhedza khu mithumo yaye; a na yisa likhulo laye ga valala vaye; ni gu bweledzela ga avo a dwanago navo iso si vbwetago; ni mayigo ya sidwani, a na ma ninga tshatshazelo yawe.

¹⁹ Khu guralo, gukhugela Muhwadambo, vathu va na ninga githawo lina la Pfhumu Nungungulu, gukhugela Khugadambo, va na ninga githawo wudhumo waye, avbo nala a tago kha nga mati ma khulungago khu tshivba, Liphuvbo la Pfhumu Nungungulu li na mu tutumisa.

²⁰ Mutshudzisi a nata Siyoni, ni ga va na Jakobe va na gu vbindrugedzago va dzi laya khu sighoho sawe, a ngu ganela Pfhumu Nungungulu.

²¹ Pfhumu Nungungulu a ngu ganela khuye Gidzumeledzwano gyangu navo, khegi: Liphuvbo langu li guromo avbo gwago, ni magana yangu nyi ma thedego kanani gwago, gima kha ma na duga, ambari khu kanani ga sanana sago, ni ga situgulwana sago, gukhugela olu kala gupindruga; a ngu ganela Pfhumu Nungungulu.