Isaya 57 - Bhibhiliya Nya Guage

¹ Muthu nya gululame a ngu fa, gambe mwalo a pimisago khu isoso monyoni gwaye, ni muthu nya gutumbege a ngu duswa, vathu va si dziti gukhavo va nya gululama, va gu vbiredzela gu duswa li si gu vbohi libango.

² A na bela gurulani; avo va gimbidego khu gululama va na hefemula dawuni gwawe.

Nungungulu a ngu vengana ni sifananiso

³ Aholu hidzimelani avba, enu sanana nya valoyi, enu livelego nya sibhayi ni maphuphulu.

⁴ Khu mani mu mu hembululago, na? Khu mani mu si khathaligo khuye? Mwa gu hamela mani likana mu mu dusela lidimi vbavbandze, na? Ina khandri mu sanana nya sighohi ni livelego nya va nya malipha,

⁵ enu mu dzi furumedzago khu sifananiso vbavbatshi nya misimbo nya minvula ni vbavbatshi nya misimbo yatshavbo yi nyugago, mu songa sanana sanu mikovani, mu gira khiso miphaso mitsongoni, ni dziphagoni nya siwindri, gani?

⁶ Kholu vanungungulu vanu vomo umo nya siwindri nya gukwirige sa sitsongwanani; khiyo thomba yago; khiso u si phaselago khu vbinyu, ni gu si girela miphaselo khu wuguvbi; ina nyi na salalegiswa khiso isoso, gani?

⁷ Wa gu ladza lidawu lago sigomoni nya gulaphe; u gwela iyo guya gira miphaso nya dzimhamba.

⁸ U vegide sifananiso sago nya vanungungulu khu hwane nya malimba numo nya mihasimo; nyamba thela kota khu eni; u tshula guambala u ladza lidawu nya ladi nya guaname, u dzi ningela ga sibhayi sago u nga si renga; u dzi tsakisa khu gu lala naso mu wonana wumbwiri wanu.

⁹ U ya ga mufumeli ni mafura, u engedzela mafura nya gunungele; u rumela myango malangani ya hwindzo, u va rumela kala guetani nya lithowo.

¹⁰ U gimbide kala u garala; aholu kha wa ganela, khuwe: “Esi kha si phasi gilo!” Iso u nga bani nu gu si vbweta u si mane, khu guralo, khu rereki.

¹¹ Aholu khu mani u nga khala khuye hwanga mwendro gu mu thava, gu kala u lipha u si nyi alakanyi ambari gu thela kota khu eni? Gasi khu nyi thavi, kholu nyi nga degulago gikhati nya gulaphe, gani?

¹² Gululama gogo gwago, nyi na gu huwelela, ni mithumo yago, kha yi na gu phasa gilo.

¹³ Gikhati u na lilago u lomba guphaswa, nyi na gu wona, mwendro longoloko nya sifananiso sago, si na gu vbanyisa! Si na dzegwa satshavbo si vbuvbiswa khu phuvbo; aholu uye a tumbago Eni a na hakha litigo kha nga thomba yaye, a na hakha gambe gigomo gyangu nya gukatege.

Gitiviso nya gurule ga vale va vbindrugedzago mavbanyelo

¹⁴ Gu na ganedwa pwani: “Polani ndzila, langaladzelani mafu, agisani ndzila mu dusa sitshunganiso ndzilani ga vathu vangu.”

¹⁵ Kholu a gu ganela kharati, wule a Khusegidego, a guromo vbatshani ngudzu, a vbanyago kala gupindruga; uye a gu ni lina li Agidego, khuye: “Eni nya gu vbanyela wulanga wu agidego wu guromo vbatshani ngudzu, aholu nya gu vbanya gambe gumogo ni avo va khuvekidego ni vale va vbedego tshivba, gasi gu tiyisa vale va vbedego tshivba ni gu tiyisa myonyo ya vale va khuvegidego.

¹⁶ Khu guralo, kha nyi na mi singedza gikhati gyatshavbo, mwendro gu gira likhulo gikhati gyatshavbo; kholu mihefemulo nyi yi vangidego, yi nga vbeledwa khu tshivba mbeli gwangu.

¹⁷ Khu kotani nya makolo yaye nya guvivbe ya Israyele, gu nyi giride nyi khuveka nyi tsayisa vathu; ni gu mi sihela khovbe yangu, aholu khu guyeyisa gwaye, a di landra ndzila yi godwago khu monyo waye.

¹⁸ Eni nyi wonide dzindzila dzawe, aholu nyi na va vbanyisa; gambe nyi na va gimbidzisa khu ndzila bwelo khavbo nyi va tangadzisa nyaluphye, ni vale va lilago.

¹⁹ Nyi na va embela vatshavbo, kheni: “Gurula ga vale va guromo hwindzo ni vale va guromo vbafuvbi.” Eni nyi na va vbanyisa, a ngu ganela Pfhumu Nungungulu.

²⁰ Aholu avo va nya guvivbedwa khu myonyo, va gu fanana ni linene li vbenyago, li gumba dzi kodza gurula, mavimbi yakone ma gu vhilusa maraga ni liguvi.

²¹ Ga va nya guvivbedwa khu myonyo gu mwalo gurula; a ngu ganela Nungungulu wangu.”