Isaya 56 - Bhibhiliya Nya Guage

GIPANDRE NYA WURARU Gitumbiso ga vale va vegisago litshigu nya Sabhadho

¹ Pfhumu Nungungulu a ngu ganela kharati, khuye: “Ningani githawo nayo wangu ni gu gira gululama, kholu guvbanyisa gwangu gomo vbafuvbi ni gu vboha, ni gulamula gwangu gomo vbafuvbi ni gu gutadzisega.

² Kategide wule a landrisago milayo yeyi, ni muthu wule a tiyago ga iyo, a dzi vegedza gumba nyenyezisa Sabhadho, a si giri guvivba khu mandza yaye.”

³ Muluveli a dzi ningelago ga Pfhumu Nungungulu, a nga pimisi kharati, khuye: “Pfhumu Nungungulu khu lisine a na nyi hambanisa ni vathu vaye;” ambari thenwa a nga ganeli nuye, khuye: “Wona nya gukhuwe eni nyi simbo nya gubange.”

⁴ Kholu Pfhumu Nungungulu a ngu ganela kharati, khuye: Mithenwa yi vegedzago dzisabhadho dzangu, ga gu hathe igyo gi nyi tsakisago, va ema avbo nya gidzumeledzwano gyangu,

⁵ nyi na va ninga wulanga ni lina nyumbani ni mabhiyoni gwangu, eli li vbindrago gu mana sanana nya sikhwathana ni sagadzyana. Nyi na ninga moyo ni moyo nya avo lina nya gukala gupindruga, li na gumba fuva.

⁶ Ni valuveli va dugelago ga mambe mayigo, va guta dzi ningela ga Pfhumu Nungungulu, gasi gu mu thumela ni gu gola lina la Pfhumu Nungungulu, ni gu khala sithumi saye, ni vatshavbo va vegedzago litshigu nya Sabhadho, va si li nyenyezisi, va landrisa gidzumeledzwano gyangu,

⁷ avo navo nyi na va dzega nyi va yisa gigomoni gwangu nya gukatege, nyi ya va tsakisa Nyumbani gwangu nya Milombelo. Miphaso yawe nya guvbiswe ni dzimhamba dzawe, si na hakhwa siluveloni gwangu, kholu Nyumba yangu yi na ranwa nyumba nya Milombelo ga mayigo yatshavbo.

⁸ A ngu ganela kharati Mune, Pfhumu Nungungulu oyu a tombanisago vatshavbo va nga bani va dusidwe tigoni ga Israyeli, wari khuye: “Vbavbandze ga vale va tombanisidwego, nyi nga na gu tombanisa vambe.”

Sighoho ni wughevenga wa Israyeli

⁹ Enu mwatshavbo sirengo sa khabini, ni enu sirengo satshavbo nya wurena, deluni muta hodza.

¹⁰ Va woneleli vawe vatshavbo, sikhumu, kha vati gilo; vatshavbo va gu fanana ni dzimbwa nya sidudu, nyamba kodza gu huhula; va gu gola gu wotela, va khala na va lade, va lora dzindroro nya wugara.

¹¹ Dzimbwa dzedzi makhondrobwa, kha dzi khuri; vahavisi nyamba pimisa gilo; muthu ni muthu a gu bwelela khu ndzila yaye, a dzi vbwetela iso si na gu mu ningago bhindzu.

¹² Na va gu ganela, khavo: “Deluni, hi na resa wadwa nya guvave hi ta sela, litshigu la mindru li na fanana ni muhuno, li manega nari litshigu nya likhongolo guvbindra mambe.”