Isaya 54 - Bhibhiliya Nya Guage

Guandra ni wudhumo wa Siyoni

¹ Embelela khu gutsaka uwe nyamayi nya gyumba, uwe u ngamba velega sanana; nengela khu gutsaka u womba kulungwane, uwe u ngamba lumwa; kholu sanana sa nyamayi a ngamba dzegwa si tade guvbindra sa nyamayi a gu ni mwama; a ngu ganela Pfhumu Nungungulu.

² Engedzela guanama nya tshatsha wago; u thawuludza khu guvbiredza mwendra nya tshatsha wago, u nga wu rodzisi; ghwimba dzingodzi dzaye u tsitsa gwadi dziphingwi.

³ Kholu u na nava uya phuvbo ga nyamudye ni phuvbo ga nyambade; livelego lago li na fumela mayigo, va wusa madhoropa ma khadego marumbi.

⁴ U nga khali hwanga, kholu khu na nga theswa dzitshoni; u nga vbisegi, kholu mwalo a na gu poyilago; u na divaledwa khu dzitshoni u dzi manidego wumbirini gwago, gambe khu na alakanya givalo u gi manidego khu gu fedwa khu mwama wago.

⁵ Kholu Muvangi wago, khuye a gu mwama wago; lina laye a gu uye Pfhumu Nungungulu nya Tshivba Yatshavbo; Mudzegisi wago, khoyu a Agidego wa Israyeli; a ranwago gupwani Nungungulu nya litigo latshavbo.

⁶ Kholu Pfhumu Nungungulu a gu ranide kha nga nyamayi a digidwego khu mwama, oyu a garadzegago monyoni gwaye; a na gu rana kha nga nyamayi a dzegidwego nari mbiri a wuya a hudwa; a ngu ganela Nungungulu wago.

⁷ Khu gikhati gidugwana, nyi di gu digide, aholu nyi ngu bwelo khavbo nyi gu wuyisa khu lihaladzo nya likhongolo.

⁸ Khu gupwa likhulo, nyi gu sihede khovbe yangu khu gikhatinyana; aholu, khu wuhindzi nya gupindruge nyi na gu pwela gisiro; a ngu ganela Pfhumu Nungungulu Mudzegisi wago.

⁹ Kha nga idzo nyi giridego gikhatini gya Nowa; avbo nyi nga sambanyago gukheni, mati nya ndrambi gima kha ma na nga langaladza gambe litigo, kharato gambe nyi sambanyide gukheni kha nyi na gu girela gambe likhulo, ambari gu gu tsayisa.

¹⁰ Kholu sigomo si na siguga, sigomwana si tsekatseka, aholu lihaladzo nyi gu nalo nago, gima kha li na duga avbo gwago; ni pwanano nya gurule gwangu, kha wu na duswa avbo gwago, khiso a ganelago Pfhumu Nungungulu a gu pwelago gisiro.

Jerusalema guphya

¹¹ Uwe lidhoropa u pwisidwego wuvi, u vetwago khu dziphuvbo nyamba tangadziswa! Nyi na gu vbahedza khu wumburi, wona nya gukhuwe nyi na tsitsa siwindri sago na si mburisedwe khu phembe, nyi na gu tsitsa vbatshani nya siwindri nya safira.

¹² Nyi na gu girela sihogwana khu siwindri nya rubhi, malimba yago ma na girwa khu siwindri nya gukhedzige, ni libhiyo lago latshavbo, khu siwindri nya lisima.

¹³ Sanana sago satshavbo, si na khala vapizane va Pfhumu Nungungulu; sanana sago si na mana gurula nya gukhongolo ngudzu.

¹⁴ U na tiyiswa khu gululama, sitshaniso si na manega hwindzo ni uwe, khu na thava gilo, ambari gu thusedzedwa kha gu na hidzimela vbafuvbi gwago.

¹⁵ A gu manega nya gu gu dwanise, khandri eni nyi na mu rumago; uye a na vbwetago gu gu wugela, u na mu pala.

¹⁶ Wona gukhuwe, kheni nyi vangidego mupfhuli nya dzisimbi, khuye a khuthago nilo wu gira magala, a pfhula matshari ma thumiswago mithumo nya guhambanelane; nyi vangide gambe musaseli, gasi gu a sasela.

¹⁷ Matshari yatshavbo ma giridwego gasi gu gu sasela, kha ma na gu gira gilo; ni watshavbo uye a vbwetago gu gu lumbedza malipha, uwe u na mu kona; eyi khiyo thomba ya sithumi sa Pfhumu Nungungulu, ni gululama gwawe gwa guta khiyo gwangu; a ngu ganela Pfhumu Nungungulu.