Isaya 5 - Bhibhiliya Nya Guage

Gipimaniso nya lithembwe nya guvivbe

¹ Olu, nyi na embelela ga gigodwa gyangu, ndzimo nya lihaladzo laye khu lithembwe laye nya miuvha. Gigodwa gyangu gi diri ni lithembwe nya vhinya gigomwanani nya mafu nya gunone ngudzu.

² A li limide a dusa siwindri, a gira libhiyo, a yala miuvha nya gutsakise; khu vbakari a di vbaha nyumba nya gukhale avbo ghadhi, a vbaha ni gikhwathi nya gugamele avbo dziuvha; a di gu lindrela gukhuye lithembwe li na velega dziuvha nya dzadi, aholu li di velega dziuvha nya guvave.

³ Gasi olu enu vavbanyi va Jerusalema, ni enu vathu va na Judha, nyi ngu mi lombani mu nyi lamule eni gumogo ni lithembwe langu nya vhinya.

⁴ Hwane nya gu bani nyi giride satshavbo sesi, ginani gambe nyi nga yela gu gira ga lithembwe langu, nyi ngamba gi gira? Eni nyi di gu lirela gu hakha dziuvha nya dzadi, khu ginani olu ilo li nga velega idzo nya guvave, na?

⁵ Gasi, eni olu, nyi na mi yeyedzani esi nyi vbwetago gu gira ga lithembwe langu: Nyi na thesa libhiyo gasi li khala wuhaviselo, nyi khungumula ni ndzari yaye, gasi li gandredzedwa.

⁶ Nyi na li vbindrugedza li khala giwula, miuvha gima kha yi na avbuledwa gambe, mwendro gu limedwa, aholu umomo, gu na dandra miba ni sirangalabwa, nyi na ruma mapfhi ma si wisi ndzadzi umo.

⁷ Kholu lithembwe nya miuvha la Pfhumu Nungungulu nya Tshivba Yatshavbo, khu nyumba ya Israyeli, ni vathu va Judha, khavo dzimbewu a nga bani a dzi lirela gu mu tsakisa; Uye a di gu lirela gu wona gwawe gululama, aholu gu di wonega basi gusongana; a di gu lirela gu wona nayo ni lisine, aholu a dipwa basi dzihuwa ni miketo.

Libango ga avo va girago guvivba

⁸ Libango ga avo va hengeledzelago dzinyumba, avo va engedzelago marembwe gikhati gyatshavbo, kala va gu khala vamune nya malanga yatshavbo nya litigo.

⁹ Pfhumu Nungungulu nya Tshivba Yatshavbo, ganede dzindzeveni gwangu nyi mupwa, khuye: “Khu lisine, dzindranga dzatshavbo dzi na vbindrugedza dzi khala giwula, ni mudzinyumbani nya dzikhongolo nya gumbure, gu na tshala nyambana muthu.

¹⁰ Umo nya likhumi dzindrima nya lithembwe nya miuvha, gu na duga basi vbinyu nya gutadze phongolo moyo; ni likhumi mipimo nya dzimbewu dzi yadwago, dza gu vbwerwa, dzi na dusa basi gitundru gimwegyo!”

¹¹ Libango ga avo va vindrugelago gu wuga va landrisela mawadwa, va sela, va leva, kala ni vbakari nya wutshigu va vbiswa, khu wadwa.

¹² Mibuzoni gwawe, va gu sela wadwa na va gu womba sitendre, sitoliyo, singomana ni dzitsholi, aholu kha va theli kota khu sigiro sa Pfhumu Nungungulu, ambari gu wona mithumo ya mandza yaye.

¹³ Khu guralo, vathu vangu va na vbagedwa va yiswa wugumbitunu, khu gumbana mapimo. Vathu vawe nya guthavisege va nafa khu ndzala, ni gidzemo gyawe gi na dagarela khu lidora.

¹⁴ Khidzo kharato, lithowo li engedzedego gulodza magwaha li hama likana gasi gu midza wuzundzo wa Jerusalema, gumogo ni gidzemo gi girago ligwaha, ni vatshavbo va tsakago.

¹⁵ Vathu vatshavbo va na theswa vbavbatshi, va nya guthavisega va na hembuludwa, ni maho ya vale va dzi khusedzago, ma na thedwa dzitshoni.

¹⁶ Aholu Pfhumu Nungungulu nya Tshivba Yatshavbo a na khusedzwa, kholu a ngu lamula khu nayo. Khuye Nungungulu a Agidego, Uye a yeyedzago guaga gwaye khu gu gira ugo gu lulamidego.

¹⁷ Khavbo avbo, dzinvuta dzi na hodza dhoropani kha nga wuhaviseloni gwawe; marembweni ga sitetema, gu na hodza umo vavbindri nya ndzila.

¹⁸ Libango ga vale va dzi ndrindrelago wuvivbi khu dzingodzi nya wupumbu, avo va ndrindrago gighoho gukhwatshi va gu gi ndrindra khu dzingodzi nya kareta!

¹⁹ Avo vari, khavo: “Nungungulu a na vbiredzele gu vbedza thumo waye, gasi hi kodza gu si wona. Makungo ya Nyaguage wa Israyeli, ma na tadzisege, gasi hi ma wona.”

²⁰ Libango ga vale va wonago guvivba khavo khwadi, wuwadi khavo wu vivbide; gidema khavo guwonegela, guwonegela, khavo gidema; esi si vavago, khavo si ngu lombela, iso nya gulombele, khavo si ngu vava!

²¹ Libango ga vale va dzi wonago na va gengede ngudzu, va pimisago gukhavo va gengede ngudzu!

²² Libango ga vale va dzi girago dzingwazi nya gusele wadwa, ni vale va dzi pwago na vari dzindrena nya guphule wadwa nya guvave!

²³ Libango ga vale va dzumelago gu rengeledwa, gasi gutshula muthu a gu ni nandru, va bomba gu emela muthu nya gululame!

²⁴ Kha nga malavbelavbe nya nilo ma vbisago dzitshava ni mwasi nya gubange, kharato nugo, mikhamba yaye yi na hina ni senge saye si na vbuvba kha nga kudzudzwane, kholu va yeyiside Nayo wa Pfhumu Nungungulu, nya Tshivba Yatshavbo, ni gu bomba magana ya uye a Agidego wa Israyeli.

²⁵ Khu satshavbo sesi, likhulo la Pfhumu Nungungulu li na khondra vbatshani ga vathu vaye, a handzega gyandza gyaye vbatshani gwawe, a va songa; sigomo si na ndrendremela, ni sirumbi sawe si na gira kha nga matala vbakari nya dzindzila; ambari khu satshavbo sesi, likhulo laye kha li na bwelelela hwane, a nga na gu khusedza gyandza gyaye, a va sasela.

²⁶ Pfhumu Nungungulu a na khusedza ngavbya yaye a rana mayigo ya hwindzo, a na ma wombela ndrodzi a ma ranisa khu mahegiso gwatshavbo nya mafu; ayo ma nata khu guvbiredza khu gututuma.

²⁷ Vbakari gwawe mwalo a na ta vbohago na garade mwendro gurereka; mwalo a na wotelago ambari gulala, ni mabhandri yawe, kha ma na tshulega siwununi gwawe, ambari gutshulega dzingodzi nya silato sawe.

²⁸ Siholoma sawe si na bani na si lodzidwe gwadi, malaho yawe yatshavbo, na ma khwandridwe; samba nya dzikavalu dzawe, sa gu fanana ni siwindri, ni marodha nya dzikareta dzawe, gukhwatshi gipupwane.

²⁹ Va gu bhonga, va gu fanana ni nghala, va na bhonga kha nga sanana nya nghala. Va na ngurura va gu mana pfimba va wu rwala va hongola, mwalo a na gu va wandrelago.

³⁰ Khu litshigu lolo, va na bhongela Judha, kha nga gubhonga nya linene, uye a na khedzago tigoni, a na wona basi gidema ni gutshaniseka, lidambo li na pfhupedziswa khu mapfhi nya guthise.