Isaya 49 - Bhibhiliya Nya Guage

Githumi gya Pfhumu Nungungulu wenengedzo nya mayigo

¹ Nyi yingiseni enu mayigo ya sidwani, ni enu vathu va mayigo ya hwindzo! Pfhumu Nungungulu a nyi ranide, nyi ngari ndrani ga mayi wangu, a nyi riyide lina nyi si guvelegwi.

² A di gira likana langu kha nga litshari nya gulodzwe, a nyi fenengedza khu mutsa nya gyandza gyaye, a nyi giride kha nga giholoma gilodzidwego, a nyi siha vbagikhwesotunu gwaye,

³ a nyi embela, khuye: “Uwe u githumi gyangu, khavbo ga Israyeli nyi yelago gu dhumiswa khavbo.”

⁴ Aholu eni nyi di pimisa monyoni gwangu, kheni: Nyi thumide mahala, nyi vbedzide tshivba yangu nyamba wuyedwa khu gilo. Ambari khu guralo, Pfhumu Nungungulu, a na nyi ninga fanelo ni tshatshazelo wangu; hakhelo yangu, yomo ga Nungungulu wangu.

⁵ Gasi olu, a ngu ganela Pfhumu Nungungulu, a nyi wumbidego nyi ngari ndrani ga mayi, gu khala githumi gyaye, gasi nyi mu bweledzela Jakobe, ni gu tshanganisa Israyeli a wuya gwaye, gasi eni nyi dhumiswe mbeli ga Pfhumu Nungungulu, Uye a gu tshivba yangu.

⁶ A di engedza gambe, khuye: “Kha gu eneli gu uwe u khale githumi gyangu basi, gasi gu wusedza mahundzu ya Jakobe, ni gu wuyisa avo va na vbulugago va Israyeli; nyi gu giride gambe wenengedzo nya guwenengedze va nya mayigo, gasi guvbanyisa gwangu gu vboha kala mahegiso nya litigo.”

⁷ A ngu ganela kharati Pfhumu Nungungulu, Mudzegisi wa Israyeli ni Gihathwa gyaye, wule a vengwago ni gu nyenywa khu mayigo, a gu githumi gya vafumeli nya dzihanyi, khuye: “Avbo vafumeli va na mu wonago, va na khuga va ema, manganagana ma na noga ma khidzima ma mu khozela; kholu lihaladzo la Pfhumu Nungungulu li tumbegide, Nya Guage wa Israyeli a gu hathidego.”

Gitumbiso nya guwusedzwe Israyeli

⁸ Pfhumu Nungungulu a ngu engedza a ganela kharati, khuye: Khu gikhati gi vbwetegago, nyi gu yingiside, khu litshigu nya guvbanyise nyi gu phaside, nyi gu sayisa u khala uwe gidzumeledzwano ni vathu, gasi u wusedza litigo, ni gu va kavedzela dzithomba dzi ghohetedwego;

⁹ ni gu embela avo va khothedwego, khuwe: “Dugani pasoni!” Ni ga avo va guromo gidemani, khuwe: “Deluni guwonegelani.” Avo va na hodza dzindzilani, ni malangani yatshavbo nya sigomo va na mana guhodza nya gungi.

¹⁰ Gima kha va na ngapwa ndzala ambari lidora, ambari gu furugedzwa khu phuvbo ni gu vbiswa khu lihani, kholu oyu a va pwelago wusiwana, a na thanga mbeli gwawe, a va yisa sifefeni nya mati.

¹¹ Nyi na pola ndzila musigomoni gwangu gwatshavbo, ni sindzilana sangu nya guwegele si na lulamisedwa.

¹² Wonani nya gukhenu va nata khu hwindzo, vambe va nata khu Wuronga, vambe khu Pfoladambo ni vambe khu tigoni ga Sinimi.

¹³ Ghiyani mu womba mikulungwane, enu ndzadzini, u nengela khu gutsaka, uwe litigo, ni enu sigomo bhumani mu kulungela, kholu Pfhumu Nungungulu pwide gisiro, a tangadzisa vathu vaye.

¹⁴ Aholu Siyoni a gu ganela, khuye: “Pfhumu Nungungulu a nyi digide, mune wangu a nyi divade!”

¹⁵ Ina womo nyamayi a divalago gyanana gyaye gi nga gu mama, a si khathali khu gyanana a nga gi dusago khu mahembeni gwaye, gani? Ambari uye a gu divaledwa, eni gima kha nyi na nga divaledwa khuwe.

¹⁶ Wona nya gukhuwe nyi gu lovide sandzani nya mandza yangu; maho yangu gikhati gyatshavbo, ma gu khedza mabhiyo yago.

¹⁷ Sanana sago si na wuya khu guvbiredza, gasi vale va nga gu pfhungumulago ni vambembisi vago, va na duga va hongola.

¹⁸ Khusedza maho u khedza malangani gwatshavbo; vatshavbo ava va tshanganidego, va gu wuya avbo gwago; khu lisine, nyi ngu sambanya khu guvbanya gwangu, a ngu ganela Pfhumu Nungungulu, gukheni, vathu vava vatshavbo, u nata dzi mburisa khavo kha nga guambala, u hunga khavo wulungu thamoni gukhwatshi u nyamayi nya khundzwa.

¹⁹ Kholu Ambari siwulani gwago ni malangani gwago nya marumbi, ni litigo lago li mbembisidwego, kha li na enela guvbaha umo vathu vago; ni avo va nga gu mbembisago va na bani vari hwindzo nago.

²⁰ Ambari ni sanana u nga velegago gikhatini nya wuvi, si na gu embela, khiso: Wulanga wowu wudugwana ngudzu; hi vbwetele wumbe nya gu hi khale umo.

²¹ Uwe u na ganela khu monyoni gwago, khuwe: “Khu mani a nyi velegedego sanana sesi? Kholu nyi fedwe khu sanana, kha nya nga tshuka nyi mana simbe; bwelo khavbo nyi diri mulegalegi wugumbini, khu mani a nyi sayisedego sanana sesi? Nyi di tshade na nyiri nyenga, gasi ava va diri hayi?”

²² A ngu ganela kharati Pfhumu Nungungulu, khuye: Wona nya gukhuwe nyi na khusedza mandza nyi ghwimba ngavbya vbakari nya mayigo; khavbo avbo, va na resa sanana sago nya madzaha khu mawogoni, iso nya vanyamahegyane, na va si vbagaride magatani gwawe.

²³ Vafumeli va na khala vasayisi vago, ni dzipfhumugadzi dzawe, dzi na khala vamayi vago; va na noga mbeli gwago va tsitsa khu khovbe va dandzela kudzudzwane wa migondroni gwago. Khavbo avbo, u na si pima gukhuwe, eni kheni Pfhumu Nungungulu, avo va nyi tumbago kha va na thedwa dzitshoni.

²⁴ Ina ndrena yi ngu wandredwa phango waye, gani? Mwendro gu tshudziswa avo va modwego khu mufumeli nya dzihanyi, gani?

²⁵ Aholu Pfhumu Nungungulu a ngu ganela, khuye: “Khu lisine nyi ngu tiyisa, kheni: Vathu va modwego khu ndrena, nyi na va tshudzisa, nyi bwelo khavbo nyi wandra phango ga mufumeli nya dzihanyi, kholu nyi na dwana ni avo va gu dwanisago, nyi tshudzisa sanana sago.

²⁶ Vatshanisi vago nyi na va hodzisa nyama yawe, nyi bwelo khavbo nyi va levisa khu novba wawe, gukhwatshi wadwa nya givhayi; khu guralo, vathu vatshavbo va na dziti gukhavo kheni Pfhumu Nungungulu, Muvbanyisi, ni Mudzegisi wago, Nyadzitshivbe wa Jakobe.”