Isaya 48 - Bhibhiliya Nya Guage

Israyeli a ngu tsayiswa khu gumba tumbega

¹ Upwani esi, enu nyumba ya Jakobe, mu ranwago khu lina la Israyeli, mu dugelago lihundzuni la Judha, mu sambanyago khu lina la Pfhumu Nungungulu, mu khozelago Nungungulu wa Israyeli, aholu nasiri khu lisine ni gululama.

² Enu mu dzi ranago khu lina nya lidhoropa nya guage, mu sambanyago khu Nungungulu wa Israyeli, lina laye a gu uye Pfhumu Nungungulu nya Tshivba Yatshavbo.

³ Gale ngudzu na nyi huwelede silo nya guhegule, si duga khu kanani gwangu, nyi si pwadzide si dugelela khu githugedza.

⁴ Kholu nyi di gu dziti gukheni u muganedzi, ni gukheni misivba ya thamoni gwago khya gikete, ni giwombo gyago gi bangide nga sugu.

⁵ Khu guralo, nyi gu tiviside khu gale silo sesi, nyi gu pwadzede na si si gu dugeleli, gasi u si ganeli, khuwe: Gifananiso nya nungungulu wangu, khigyo gi giridego silo sesi; mwendro gukhuwe: Gifananiso nya simbo nyi nga vatago, mwendro nyi nga wumbago, khigyo gi giridego si dugelela silo sesi.

⁶ U di si pwide silo sesi; wona nya gukhuwe satshavbo si tadzisegide. Ina kha mu dzumeli gu gira wufakazi khiso, gani? Gukhugela olu guya mbeli, nyi na mi pwadzela silo siphya niso nya misihalo u nga bani u si siti.

⁷ Silo sesi si ngari gu girega kamwe olu, khandri sa gale; u si gupwi gilo khiso kala na muhuno, gasi u si ganeli, khuwe: Nyi di gu siti.

⁸ Gima u di si gu sipwi, ambari gu si pima, gukhugela gale dzindzeve dzago dzi di bani dzi si gu tulegi; kholu nyi di gu si pima gukheni kha wa tumbega ngudzu, gukhugela rumbuni ga mayi wago, wa gu tidwa pwani u gindragamilayo.

⁹ Aholu khu kotani nya lina langu, nyi na timisela, khu kotani nya wudhumo wangu, nyi na dzi phara, gasi u si mbembiswi.

¹⁰ Wona nya gukhuwe nyi gu hutide ambari u gu siri parata; nyi gu lingide umo nya nilo nya guthise.

¹¹ Khu kotani nya lihaladzo nya lina langu, khu kotani nya lihaladzo langu, kholu nyi na dzumela kharini gukheni lina langu li nyenyeziswa? Kholu kha nyi dzi kodzi gu ningela wudhumo wangu ga mumbe muthu.

¹² Jakobe, tula ndzeve u nyi yingisa, ni uwe Israyeli, nyi gu ranidego; Eni kheni kamwe, kheni nya guhegule, gambe kheni nya guhegise.

¹³ Giseketelo nya litigo gi tsitsidwe khu mandza yangu, khu libogo langu la nyamudye nyi ladzide damboni; me ni gu si rana, sa guta khu gumogo satshavbo.

¹⁴ Tshanganani enu mwatshavbo, mu yingise! Khu mani vbakari nya vanungungulu vovo, a tivisidego silo sesi? Pfhumu Nungungulu gode Kiro, a na gira guhaladza gwaye vbatshani ga Bhabhiloni, gyandza gyaye gi na dwana ni Vakalidhiya.

¹⁵ Kheni kamwe nyi ganedego; gambe nyi mu ranide, nyi mu reside, gambe nyi na mu andrisa ndzilani gwaye.

¹⁶ Hidzimelani avbo gwangu, mu tapwa esi: Gukhugela guhegulani, kha nya ganela khu gisihaledza; gukhugela avbo si nga giregago silo sesi, nyi diromo avbovbo. Gasi olu, Pfhumu Nungungulu a nyi rumide gumogo ni Liphuvbo laye.

¹⁷ A ngu ganela kharati Pfhumu Nungungulu, Mudzegisi wago, Nyaguage wa Israyeli, khuye: Eni kheni Pfhumu Nungungulu wago, a gu hevbudzago ugo nya gwadi gu gu phasago, oyu a gu thangelago ga ndzila u yelago gu gimbila khiyo.

¹⁸ Oh! Nari pwani u di yingiside milayo yangu! Gurula gwago gu di hadza gu goga kha nga tsongo, ni gululama gwago, gu di hadza gu fanana ni mavimbi nya linene;

¹⁹ ni livelego lago gambe li di hadza gutala li fanana ni mafu, ni vatugulu vago kha nga mafu nya fungo wa phwani; lina lawe gima kha li na fuviswa ambari gumbembiswa mbeli gwangu.

²⁰ Duga khu tigoni ga Bhabhiloni, thavani vbakari ga Vakalidhiya, mu tivisa esi na mu gu kulungela khu gutsaka; si huweleleni kala mahegiso nya litigo; mu ganela, khenu: “Pfhumu Nungungulu tshudziside githumi gyaye Jakobe.

²¹ Gima kha va ngapwa lidora, avbo a nga bani a gu gimbila navo musiwulani, kholu a di va dusela mati khu mugiwindrini; a di pandra giwindri, gu goga mati.

²² Aholu, va nya guvivbedwa khu myonyo kha va nga mana gurula, khu Pfhumu Nungungulu a ganelago.”