Isaya 41 - Bhibhiliya Nya Guage

Muphasedzeli wa Israyeli

¹ Degulani mbeli gwangu, enu vathu mu vbanyago sidwani. Enu mayigo, wusedzani tshivba yanu! Hidzimelani vbafuvbi gasi mu ganela; hatshavbothu hi naya ema phathani.

² Khu mani a wugidego khu Khagadambo, muthu nya tshivba a palago ni evbini a hongolago, na? A wuya a mu ninga mayigo ni gu khozisa vafumeli mbeli gwaye? Khu litshari laye, a di va vbindrugedza va khala kudzudzwane, khu wulaho waye, a va gira kha nga mavivi ma vbuvbiswago khu phuvbo?

³ A gu va lundra a thanga mbeli gwawe na tiyide, khu ndzila migondro yaye yi si gu gimbiligo khiyo.

⁴ Khu mani a giridego ni gu thuma satshavbo sesi? Khu wule gukhugela guhegulani a giridego gukhuye vathu va manege mafuni, Kheni kamwe Pfhumu Nungungulu, nya guphele ni guhegisa.

⁵ Mayigo ya sidwani ma si wone esi, ma thava, ni mahegiso nya litigo gu di ndrendremela, vathu va di tshangana va hidzimela;

⁶ muthu ni muthu, a di tiyisedza muthu kwawe, a mu embela, khuye: “Tiya longo, u nga thavi!”

⁷ Muvati a gu tiyisela mupfhuli nya ndralama; wule a bethago khu gikhokhotho, a gu tiyisa gilo nya gubethwe. Va gu zundza thumo wowu, khavo: “Wu giridwe gwadi!” Khu hwane, va gu gi tiyisa khu dzikhogo gasi gi si ngudangudi.

Mudzegisi wa Israyeli

⁸ Aholu, uwe Israyeli, githumi gyangu, ni uwe Jakobe, nyi gu hathidego, livelego la pari yangu Abrahama,

⁹ uwe nyi gu dzegidego khu mahegiso nya litigo, nyi gu ranide khu dzikhonani gwaye dza hwindzo; nyi gu rana, kheni: “Uwe khuwe githumi gyangu, nyi gu hathidego, gima kha nyi na gu nyenya;

¹⁰ u nga khali hwanga, kholu eni nyi nago; u nga vbeli tshivba, kholu eni kheni Nungungulu wago; nyi na gu tiyisa ni gu gu phasa, nyi gu seketela, nyi gu phara khu libogo langu la nyamudye nya gutumbege.

¹¹ Vatshavbo avo va gu zondrago va na poyilega va tala khu dzitshoni, va na vbwasamiswa vatshavbo va gu dwanisago, va vbela havo bhi.

¹² U na vbweta valala vago, u va hamuga; vatshavbo va gu dwanisago va na manega na va siri gilo, va mbemba vatshavbo va vbela havo bhi.

¹³ Kholu eni, Pfhumu Nungungulu wago, nyi ngu gu phara khu libogo lago la nyamudye, nyi gu embela, kheni: U nga thavi, eni nyi ngu gu phasa.

¹⁴ U nga thavi, uwe livelego la Jakobe, enu mitshaledwa ya Israyeli; kholu eni kamwe nyi na gu phasa.” A ngu ganela Pfhumu Nungungulu, Mudzegisi wago, khuye a Agidego wa Israyeli.

¹⁵ Wona, nyi gu dongisede gitshindro nya giphya nya magwaha nya guvbire; u na vbula sigomo u si tshindra, sigomwana si vbindrugedza si gu khala kha nga mavivi.

¹⁶ U na si vbevbera, si vbuvbiswa khu phuvbo; si phalalegiswa khu gipupwane; aholu uwe u na nengela khu Pfhumu Nungungulu, u zundzega ga oyu a Agidego wa Israyeli.

¹⁷ Avo va tshaniswago ni vahamugi, va gu vbweta mati, kha va ma mani, malimi yawe ma bangide khu lidora; aholu, eni, Pfhumu Nungungulu wa Israyeli, nyi na yingisa nombelo wawe, gima kha nyi na va diga.

¹⁸ Nyi na tula mitsongo malangani nya sigomo nya gulaphe, nyi pola milambo vbakari nya mikova; nyi na gira giwula gi khala matsiva nya mati, ni mafu nya gihala ma na dusa sifefe nya mati.

¹⁹ Nyi na yala misimbo nya sena musiwulani, ni misimbo nya ngure, morya ni olivha; gumogo ni ndziri umo nya mafu nya gihala, ni pinyu gumogo ni siringa.

²⁰ Gasi vathu vatshavbo va na wona ni gu dziti, va khala na va gu pima gukhavo, khu Pfhumu Nungungulu a giridego satshavbo sesi, khuye Nyaguage wa Israyeli a si vangidego.

Pfhumu Nungungulu a ngu yeyedza wugulu waye

²¹ Pfhumu Nungungulu, Mufumeli wa Jakobe, wari, khuye: Bikelani sigaradzo sanu ni gu resa dzifanelo dzanu.

²² Resani muta hi bikelani silo si na gu dugelelago, hi embeleni esi si dugeledego gale, gasi hi kodze gu siti ni gu si pima gukhethu si na girega; mwendro gu hi embelani iso si na gu dugelelago.

²³ Hi embeleni ginani gi na gu giregago mindru ga litshigu, gasi hi kodze gu dziti gukhethu khenu vanungungulu; girani gilo nya gyadi mwendro nya guvivbe, gasi hatshavbo hi si wone, hi liwuga.

²⁴ Wonani nya gukhenu kha mu va gilo, thumo wanu kha wu phasi gilo, mwa gu hakhani uye a tago ni manyala avbo gwanu.

²⁵ Nyi ranide mumbe muthu, khu Wuronga; a nata, khu Khugadambo, uye a na rungudza lina langu; a na gandredzela vafumeli kha nga maraga; kha nga muwumbi a gandredzelago libumba, a na va gandredzela kharato.

²⁶ Gukhugela guhegulani, khu mani a tivisidego esi, gasi hi kodze gu siti; gasi khu mambe matshigu hi kodze gu ganela khethu: “Lisine kamwe a ganelago?” Aholu mwalo a nga si tugula, ambari nya gu hi tivise, ni gupwa magana yanu.

²⁷ Eni kheni nya guphele gu tivisa Siyoni, kheni: Khavo avovo! Jerusalema nyi na mu ninga ngilozi nya gurese mahungu maphya.

²⁸ Avbo nyi nga khedzago, kha nya wona muthu, ambari vbakari nya vasingalagadzi vava, kha nya wona muthu nya gu mu wudzise ni gu nyi ninga phindrulo.

²⁹ Vatshavbo kha va sizi gilo, esi va girago si mwalo giphaso, sifananiso sawe nya gupfhudwe, liphuvbo nya gu dzi pfhadze basi.