Isaya 32 - Bhibhiliya Nya Guage

Mufumo wu resago gululama

¹ Wonani, gu nata mufumeli a natago a ta fumela khu gululama, dzindruna dzaye, dzi na lamula mahungu khu gululama ni lisine.

² Moyo ni moyo nya avo va na fanana ni wulanga nya wuthavelo gikhatini nya phuvbo ni gingulu. Va na fanana gambe ni mitsongo mafuni nya gihala, ni mutsa nya giwindri nya gikhongolo tigoni nya lihani.

³ Ni maho ya vale va wonago, kha ma na segwa, ni dzindzeve dza vale va vbwetago gupwa, dzi na yingisa.

⁴ Myonyo nya sipumbu yi na mana guti, ni lidimi la va nya gilimiti li na ganela ni gu pwadzisela gwadi.

⁵ Gipumbu gima kha gi na ranwa gambe pwani muthu nya guthavisege, ni gidambane, gima kha gi na ranwa pwani muthu nya wadi.

⁶ Kholu gipumbu gya gu ganela wupumbu. Ni monyo waye wa gu pimisa basi gu gira silo nya guvivbe ni wughevenga. A gu ganela guvivba a wugela Phumu Nungungulu, a mu liphela. Kha khathali khu gu ninga guhodza vandzale, ni gu ninga mati nya gusele ga wule apwago lidora.

⁷ Mipimiso ya muthu nya gidambane, yi vivbide, a gu gira makungo nya guvivbe, gasi gu ghohetela mahungu nya sisiwana khu malipha, a si ganedza ambari sa gu ganela lisine.

⁸ Aholu muthu nya guthavisege, a gu gira makungo nya guthavisege, khu kotani nya mithumo yaye nya guthavisege, a manega na tiyide.

Gitiviso ga vanyamayi va Jerusalema

⁹ Enu vanyamayi mu dzipwago na mu khadzisegide, khugani mu ema mu yingisa lito langu! Enu vanyamahegyane nya gukhadzisege, tulani dzindzeve mu yingisa esi nyi vbwetago gu mi embela!

¹⁰ Kholu ndrani nya mwaga ni matshigu madugwana, enu vanyamayi mu dzipwago na mu khadzisegide, mu na ndrendremela; kholu nango nya guhavele dziuvha yi na vbela, ni nango nya guvbwere dzimbewu kha yi na manega.

¹¹ Ndrendremelani enu vanyamayi mu dzipwago na mu khadzisegide; tshulani guambala gwanu, mu khala wumbwiri, mu ambala dzisaku siwununi gwanu.

¹² Nogisani dzithamo dzanu mu lilela marembwe yanu nya gunone ni dzimbewu mu nga bani mu gu fuma.

¹³ Tigoni ga vathu vangu, gu na buga miba ni sirangalabwa; gumogo gambe ni dzinyumbani gwatshavbo gu nga bani gu tsakwa umo, dhoropani puluwundrago khu gunengela.

¹⁴ Kholu nyumba nya wufumu kha yi na bedwa gambe khu muthu, lidhoropa li nga bani gu khala vathu nya gutale, li na khala marumbi. Ofeli ni likhokhola nya vawoneleli, si na khala dziphago kala gupindruga. Gu na khala wuhaganelo nya dziburu nya likhabi ni wuhaviselo nya mitshambi;

¹⁵ kala li gu tshiga avbo gwathu Liphuvbo la gupindruga; khavbo avbo, giwula gi na vbindrugedza gi khala lithembwe nya gunone, ni lithembwe nya gunone li na khala likhabi.

¹⁶ Wulamuli wu na vbaha giwulani, ni gululama gu na vbanya thembweni nya gunone.

¹⁷ Thumo nya wululami wu na bani wuri gurula, ni handro nya wululami, wu na bani na wuri gukhadzisega ni gutumbega kala gupindruga.

¹⁸ Vathu vangu va na vbanya wulanga nya gurule, malangani nya gukhadzisege gwadi, khu gurula ni gutangala,

¹⁹ gu thega maralala, ma hagadza likhabi, lidhoropa li na pfhungumudwa latshavbo.

²⁰ Mu kategide enu mu yalago mbewu bambe nya tsongo mu digago dzimombe ni dziburu si gimbila na si tshulegide.