Isaya 30 - Bhibhiliya Nya Guage

Gitiviso mayelano khu gutumba guphaswa khu Vagipiti

¹ Pfhumu Nungungulu a ngu ganela kharati, khuye: Libango ga sanana nya guyeyise, si girago makungo ma gu sindri yangu ni gu gira gidzumeledzwano ni vambe vathu nyamba rumwa kheni, va fela gu engedzela gighoho vbatshani nya gighoho!

² Va belago ndzilani va hongola tigoni ga Egipito nyamba nyi wudzisa, vaya vbweta guvhikedwa khu tshivba ya Faro, ni gu sihala mutsani ga Egipito!

³ Aholu guvhikedwa gwanu khu Faro, gu na vbindrugedza gu khala dzitshoni, ni wuthavelo mu wu vbwetago tigoni ga Egipito, gu na khala gipoyilo avbo gwanu.

⁴ Ambari vathangeli vanu va na Judha, olu na va vbohide Zowani, ni sirumwa sawe na si vbohide Hanisi,

⁵ vatshavbo va na khala dzitshoni khu vathu va vamowo va na gumba va phasa gilo, gambe kha va na va thumela ambari gu va phasa, aholu, va na basi dzitshoni ni gu poyidwa.

⁶ Gitiviso mayelano ni sirengo si guromo Marandzi, va gu rwega iso va fumidego ni dzithomba dzawe ga dziburu ni dzingameriya, va tsemakanya litigo nya sigaradzo ni wuvi, avbo gutago khavbo nghala, nya ngadzi neyi nya matune, gumogo ni nyoga nya mamba ni dzinyoga nya guvbuvbe, va yisa tigoni ga Egipito, ga vathu va gumba phaswa khavo.

⁷ Kholu Egipito, giphaso gyaye khya mahala, khidzo kharato nyi ranago Egipito kheni, Libhemba li si phasigo gilo.

Vathu nyamba yingisa kha va na phaswa

⁸ Khu guralo, olu dzega lipulango u lova mahungu yaya na va gu gu wona, ma love gambe libhukuni nya gukari; gasi ma kodza gu khala wufakazi kala gupindruga.

⁹ Kholu vathu vava, khu lisine vathu nya guyeyise; sanana nya malipha, si si vbwetigo gu yingisa nayo wa Pfhumu Nungungulu.

¹⁰ Avo va gu embela vama nya liwoni va tugulago misihalo, khavo: “Mu nga woni gambe siwoniso!” Va embela vaprofeti, khavo: Mu nga hi gireli siphrofeto nya lisine! Aholu hi embeleni iso si na gu hi tsakisago, profetani milotelote;

¹¹ Ndreyani ndzilani momo, hambanani ni gindzilana gyogyo, mu nga hi embelini gambe khu oyu a Agidego wa Israyeli.

¹² Kholu, oyu a Agidego wa Israyeli, a ngu ganela kharati, khuye: Kha nga olu mu yeyisidego magana yaya, mu tumba dzihanyi ni mithumo nya gunyenyeze mu namarela ga iso,

¹³ khu guralo, gighoho gegi gi na fanana ni lufa nya ndzari nya gulaphe, yi wegelago khu githugedza, yi thega.

¹⁴ Pfhumu Nungungulu a na pandrelela kha nga idzo yi pandrwago khidzo khali nya libumba a yi phwathisela nyamba yi tsetsa, yi tshala khu sindzengele nya sidugwana, gu si manegi ni gimwegyo nya gu vbale khigyo nilo mwendro gu rega khigyo mati namboni.

¹⁵ Kholu Mune, Pfhumu Nungungulu, Nyaguage wa Israyeli, a ngu ganela kharati, khuye: “Mwa gu vbindrugedza mu dzi rudzisa mu wuya eno gwangu, mu nata mana guvbanya; tshivba yanu yi di hadza gu mana gutangala ni gitumbo, aholu enu kha mwa dzumela, mu di bomba.”

¹⁶ Aholu mu di phindrula, khenu: “Ahihi! Hi na thava na hi khilede dzikavalu nya mazambo!” Ina mu na thava! Mu engedza, khenu: Hi na khilela dzikavalu nya mazambo. Khu guralo, idzo nya mazambo ngudzu, khidzo dzi na gu mu lundrago.

¹⁷ Likhumi mazana (1.000) vama nya lihundzu lanu va na tutuma khu gu thava muthu moyo basi; enu mwatshavbo mu na tutumani mbeli mu lundrwa livbandre vathu va vbakari ya valala vanu, kala mu ya manegani kha nga ningwati wu guromo vbatshani nya gigomo, ni ngavbya yi guromo vbagigomwanatunu.

Gitumbiso nya guvbanyiswe

¹⁸ Ambari khu guralo, Pfhumu Nungungulu a ngu lirela litshigu nya gu mi pwele wuhindzi; Uye a na simama a mi pwela wusiwana, kholu Pfhumu Nungungulu nya gululame; va kategide vatshavbo vale va mu tumbago.

¹⁹ Kholu vathu va na vbanya Siyoni ni Jerusalema, gima kha va na lila gambe; mwa gu lilani avbo gwaye, khu lisine uye a na mi pwela gisiro, a mi yingisa a vbiredza gu mi ningani phindrulo.

²⁰ Ambari Pfhumu a gu mi ningani gibaba nya sigaradzo ni mati nya wuvi, vahevbudzi vago kha va na sihala gambe. U na wona vahevbudzi vago khu maho yago kamwe.

²¹ Wa gu dhedhereka u ndreyela nyamudye mwendro nyambade, u napwa mahungu dzindzeveni gwago ma tago khu hwane gwago, khayo: “Eyi khiyo ndzila; gimbilani khiyo.”

²² Khu guralo, mu na nyenyezisa parata yi namegidwego umo nya sifananiso nya guvatwe ni ndralama yi nga namegwago umo nya sifananiso sawe nya gupfhudwe, mu na si dzudzugani hwindzo kha nga gilo nya gunyenyeze, muthu ni muthu, khuye: “Duga avba!”

²³ Khavbo avbo, Pfhumu a na wisa ndzadzi yi bugisa dzimbewu dzanu edzi mu na yalago mafuni, gumogo ni gu mi ningani guhodza a gu handro nya mafu. Avbo mu na hodzago mu khura mu ena; khu gikhati gyogyo, mitshambi yanu yi na mana mahawo mikovani nya guaname.

²⁴ Dzimombe ni dziburu mu limago khidzo, dzi na hodza mwasi nya gu bani wu lulamisedwe gwadi khu halo ni lifosola na wu tedwe munyu.

²⁵ Khu litshigu lolo nya gusasedwe nya gukhongolo ga valala, gu na manega vbatshani nya sigomo satshavbo nya gulaphe mitsongo ni sitsongwana nya mati khulungago, avbo gu na gu thegago makhokhola.

²⁶ Ngima wu na ngangamela kha nga lidambo, ni gungangamela nya lidambo gu na engedzedwa livbandre na dzimbili dzinyondro, kha nga gungangamela nya livbandre na mavili matshigu, litshigu Pfhumu Nungungulu a na hungelelago dzimbanga dza vathu vaye ni gu vbodzisa silondra nya dziphandza a va pandridego.

Gutsayiswa ga Asiriya

²⁷ Wonani nya gukhenu lina la Pfhumu Nungungulu la guta khu hwindzo na liri ni giviti. Likhulo laye na la gu khondra li dusa wutshi nya guthise, kanani gwaye gu tade khu khorodza, ni lidimi laye la gu fanana ni nilo nya gumbembise.

²⁸ A gu hefemula gu duga liphuvbo nya gufanane ni tsongo wu tadego khu mati ma gogago, ma gugumuga ma langaladza kala thamoni; a gu vbevbera mayigo khu gisavala nya gumbembise; a thela matomu maganani nya vathu gasi gu va ndreyisa va ghoha.

²⁹ Gasi enu mu na embelela ndzimo, nya gufanane ni eyi yi embeledwago vbawutshigutunu nya buzo nya guage; myonyo yanu yi na nengela kha nga vale va wombago misengele na va gu hongola gigomoni gya Pfhumu Nungungulu, muvhikeli wa Israyeli.

³⁰ Pfhumu Nungungulu a na pwadza lito laye nya wudhumo, ni gu wonegisa tshivba nya libogo laye. A na li reledza na tade khu giviti ni likhulo, ni nilo nya gumbembise, gulasa ni ndzadzi nya talo, ni phuvbo nya gingulu, ni siwindri nya maralala.

³¹ Kholu lito la Pfhumu Nungungulu li na phwatisela Asiriya a khala sindzengele, avbo a na mu bayisago khu ndronga yaye.

³² Ndronga ni ndronga Pfhumu Nungungulu a na va vetago khiyo gasi gu va tsayisa, yi longoloka ni guwombwa singomana ni sitendre. A na dwana navo khu gyandza nya gukhugege.

³³ Kholu gikho gi dongisedwe khu gale, gi dongisedwa mufumeli. Li dongisedwe liphala nya likhongolo nya guete, wu na khondriswa nilo nya dzikhuni nya dzingi khu furugedzo wa Pfhumu Nungungulu, wu fananago ni tsongo nya nilo nya solufa.