Isaya 24 - Bhibhiliya Nya Guage

IV. GUTULEDWA GWA ISAYA Gumbembiswa nya litigo

¹ Wonani nya gukhenu! Pfhumu Nungungulu a na mbembisa litigo a li gira marumbi, a vbindrugedza litigo ni gu phalalegisa vavbanyi vaye.

² Esi si na dugelelago ga vathu, si na dugelela gambe ga muphasi nya mhamba; ga githumi nya mwama, kha nga ga mune waye; ga githumi nya nyamayi, kha nga ga mune waye; ga murengi, kha nga ga murengisi; ga uye a lombisago, kha nga ga mulombi; ga mufiyarisi, kha nga ga uye a fiyarigo.

³ Mafu ma na khala giwula nya guvbelele, kholu Pfhumu Nungungulu ganede magana yaya.

⁴ Mafu momo gililoni ma bwelo khavbo ma wu na; litigo li rerekide li vbela tshivba, vakhongolo nya vathu va tigoni va vbede tshivba.

⁵ Kholu mafu ma nyenyezide khu kotani ya vavbanyi vaye, kholu va yeyiside milayo ni gu hambanisa sileletelo, va kavila gidzumeledzwano nya gupindruge.

⁶ Khu kotani nya isoso, guvivba gu midzide mafu, ni avo va vbanyago umo, va mane nandru; vavbanyi va tigoni va na dagarela khu nilo, gu na tshala vathu vadugwana basi.

Gulamudwa nya lidhoropa

⁷ Vbinyu yi ngu lila miuvha nya yiphya yi ngu wu na; ni wadwa wu na kala ngudzu, ava va nga bani va tsaka va ngu lila.

⁸ Gudzuma nya singomana kha gu pwali gambe, livbede ligwaha la vale va tsakago, gitendre kha gi ngo wombwa gambe.

⁹ Kha gu nga gu sedwa gambe vbinyu na gu embeledwa dzindzimo; kholu wadwa nya guvave wu nga bani wu gu sedwa, kha wu nga gutshamba gambe ga vale va wu selago.

¹⁰ Lidhoropa nya gutale khu pfilupfilu li khungumudwe, malimba yatshavbo ma segidwe, mwalo a dzi kodzago gu bela umo.

¹¹ Vathu va gu lila mudzindzilani khu gu hamugega vbinyu; gutsaka gwatshavbo gu vbede, yi fuvisidwe mihagano yatshavbo ya mafuni.

¹² Lidhoropa li khade marumbi, ni malimba yaye ma pandreledwe.

¹³ Gu na girega kharato, omu mafuni, vbakari nya mayigo yoyo, kha nga idzo va girago umo nya simbo nya olivha, mwendro gikhatini nya guvbedze guvbwera mihandro.

Gunengela ga va nya gululama

¹⁴ Avo va na khusedza lito va embelela khu gutsaka; khu kotani nya wudhumo wa Pfhumu Nungungulu, na va gu womba huwa gukhugela phwani.

¹⁵ Khu guralo, dhumisani Pfhumu Nungungulu khu phuvbo ga Khugadambo, ni sidwani sa phwani, huwelelani lina la Pfhumu, Nungungulu wa Israyeli.

¹⁶ Gukhugela mahegiso nya litigo, hi pwide na gu embeledwa, gupwani: “Wudhumo ga uye a lulamidego!” Aholu eni nyari, kheni: Nyi vbede tshivba, nyi vbede tshivba! Libango langu! Valogovedzi, va ngu nyi logovedza! Kholu va gu logovedza, kha va garali khu nyi logovedza.

¹⁷ Kholu, enu vavbanyi va mafuni, mu liredwe khu hwanga nya guthavise, liphala ni lizinga.

¹⁸ Uye a na thavago lito nya tshanisa a na thegela phalani, ni uye a na dugago khu phalani, a na modwa khu lizinga; kholu sihogo sa ndzadzini si tulegide, gu tsekatseka siseketelo nya mafu.

¹⁹ Mafu yatshavbo ma na pandrega, ma kabanega khu vbakari, ma kutsungwa, ma tsekatseka khu tshivba.

²⁰ Mafu ma na khuyuga ma dhedhereka kha nga muthu nya guleve, ma na kutsungega gu fanana ni mwendra nya gu vhikele dzitshuna; ma na lemedwa khu sighoho saye, ma na thega nyamba kodza gu wuga gambe.

²¹ Khu litshigu lolo, Pfhumu Nungungulu a na lamula mabutho ya ndzadzini, gumogo ni vafumeli nya mafu, tigoni.

²² Va na tombaniswa dangamwedo gu fanana ni sibotshwa si rinywago phalani, va khothedwa pasoni, va tshudwa hwane nya gu bani gu vbindride matshigu nya gutale.

²³ Khu guralo, ngima wu na khala dzitshoni, ni lidambo li na hembuludwa, kholu Pfhumu Nungungulu nya Tshivba Yatshavbo, a na fuma gigomoni gya Siyoni ni dhoropani ga Jerusalema; a na yeyedza wudhumo waye mbeli ga madhota yaye.