Isaya 22 - Bhibhiliya Nya Guage

Giprofeto mayelano khu Jerusalema

¹ Egi gitiviso ga kova nya Giwoniso gi gukhigyo: Gasi olu enu, ginani gi mi garadzago, gu kala mwatshavbo mu thavela vbatshani nya dzinyumba?

² Gasi nyenganyenga muni ni ligwaha li pwalago dhoropani, na? Vathu vanu kha vafa khu matshari mwendro guya songwa nyimbitunu!

³ Vathangeli vago vatshavbo va di thava gumogo, va gu modwa nyamba dzi dwanela; enu mwatshavbo mu di manwa mu modwa ambari mu nga bani mu thavede hwindzo.

⁴ Khu guralo, nyi ganede, kheni: Mu nga nyi khedzi; nyi digeni nyi lila khu wuvi, mu nga zami gu nyi tangadzisa khu kotani nya gumbembiswe ga nyamahegyane wa tigoni gwangu.

⁵ Kholu Pfhumu, Pfhumu Nungungulu nya Tshivba Yatshavbo, a hi resede litshigu nya ghudzeghudze, tshanisa ni sigaradzo kovani nya Giwoniso; mabhiyo nya lidhoropa ma pfhungumudwe, dzihuwa dza vavbanyi vaye dza gupwala kala sigomoni.

⁶ Kholu vathu va Elamo va somide matshari na vari ni dzikareta ni vakhileli nya dzikavalu; va na Kiri, na va pharide sitshangu.

⁷ Mikovani nya gunone ya Judha, gu tade khu dzikareta ni vakhileli nya dzikavalu, va fode vbafuvbi ni dzinyangwa nya lidhoropa.

⁸ Judha mwalo gilo nya gu dzi vhikele khigyo. Khu litshigu lolo, mu di khedza matshari ya Nyumbani ga Khabini.

⁹ Mu na wona nya gukhenu Didhoropa la Dhavhidhe, li tade khu malufa dzindzarini gwaye. Enu mu na hengeledzela mati namboni wa vbavbatshi,

¹⁰ mu sayela dzindranga dza Jerusalema ni gu pfhungumula dzinyumba nya gukari, gasi gu dzega siwindri sakone mu ya tiyisa khiso mabhiyo nya lidhoropa.

¹¹ Mu giride gambe lidhamo vbakari nya mabhiyo ya mavili, gasi gu thela mati ma nga bani ma romo ga lidhamo la gale, aholu kha mwa khedza vbatshani, mu wona uye a si giridego, ambari gu khathala khu wule a si giridego galegaleyo.

¹² Ga litshigu lolo, Mune, Pfhumu Nungungulu nya Tshivba Yatshavbo, a ngu mi ramba gu muta lila, ni gutsikwila, mu vbalula ndzudzu hungoni ni gu ambala myendra nya silendra.

¹³ Aholu enu mu di womba mikulungwane ni mighiyo; mu songa dzimombe ni dzinvuta; mu hodza dzinyama ni gu sela mawadwa nya mangi! Mu bwelo khavbo, khenu: “Hi na hodze ni gu sela, kholu mindru hi nafa.”

¹⁴ Aholu, Pfhumu Nungungulu nya Tshivba Yatshavbo a nyi lembedzide dzindzeveni gwangu, khuye: “Gighoho gegi, kha mu na tsetseledwa kala mufa” a ngu ganela Mune, Pfhumu Nungungulu nya Tshivba Yatshavbo.

Giprofeto mayelano khu Sebina

¹⁵ Pfhumu Nungungulu nya Tshivba Yatshavbo a ngu ganela kharati, khuye: Khuga uya embela Sebina, musayisi yoyo nya dzithomba, uye a sayisago nyumbani nya wufumu, u mu wudzisa, khuwe:

¹⁶ Wa gu thuma ginani avba? Khu mani a gu ningidego nayo nya gukembe lithowo avba; nya gukala u pandra siwindri wulangani wu khusegidego u dzi girela wulanga wago nya mahegiso mugiwindrini!

¹⁷ Wona gukhuwe Pfhumu Nungungulu a na gu dzega a gu dzudzuga hwindzo, gukhwatshi u muthu nya tshivba, a gu manya!

¹⁸ A na gu dzuwulugisela nga puri, a gu dzudzuga mafuni nya guaname, u na ya fela iyoyo gumogo ni dzikareta dzago nya wuzundzo dzi na ya vbelela nidzo iyoyo, uwe u na thela dzitshoni mune wago!”

¹⁹ Nyi na gu khusa vbagikhalotunu gwago, nyi gu dusa thumoni.

²⁰ Khu litshigu lolo, nyi na rana githumi gyangu Eliyakimi, mwamana wa Hilikiya.

²¹ Nyi na mu ambagisa ngandzu yago nya wuzundzo, nyi mu tiyisa khu libhandri lago, nyi na ninga tshivba wufumu waye. A na khala babe ga vavbanyi va Jerusalema ni ga nyumba ya Judha.

²² Nyi na vega magatani gwaye, pfhungulo ya nyumbani nya wufumu wa Dhavhidhe; uye a gu tula, mwalo a na kodzago gu sega, a gu sega, mwalo a na kodzago gu tula.

²³ Nyi na mu khokhothela kha nga khogo wulangani nya gutiye, uye a na khala vbagikhalotunu nya wuzundzo wa nyumbani ga babe waye.

²⁴ Va na vbayega avbo gwaye wugulu wa nyumbani ga babe waye ni ga situgulwana saye, sombo satshavbo nya sidugwana, gukhugela dzimbiya ni sikanvwana.

²⁵ “Khu litshigu lolo, a ngu ganela Pfhumu Nungungulu nya Tshivba Yatshavbo, simbo yoyu wu tsitsidwego wulangani nya gutiye, wu na sigudwa wu thega, ni satshavbo esi si nga bani siri vbatshani gwaye, si na mbembiswa.” Kholu Pfhumu Nungungulu ganede isoso.