Isaya 20 - Bhibhiliya Nya Guage

Giprofeto mayelano khu wugumbi wa Egipito ni Etiyopiya

¹ Khu mwaga a rumedwego khuwo Taritani khu Sarigoni, mufumeli wa Asiriya, gasi guya dwanisa lidhoropa la Asidhodhi kala a li wandra,

² khu gikhati gyogyo gya gimwegyo, Pfhumu Nungungulu a di ganela khavbo ga Isaya, mwamana wa Amosi, khuye: “Indra, u ya tshula mwendra wu guromo giwununi gwago u dusani silato sa migondroni gwago.” Uye a di gira kharato, a duga a gimbila wumbwiri ni gumba ambala silato.

³ Khavbo avbo, Pfhumu Nungungulu a di ganela, khuye: Kha nga edzi gi giridego githumi gyangu Isaya, a gimbidego myaga miraru wumbwiri ni gumba ambala silato, giyeyedzo ni gitiviso ga Egipito ni ga Etiyopiya, khiso si na gu va dugelelago,

⁴ a na gira kharato mufumeli wa Asiriya, a na vbagela sibotshwa sa Egipito ni valuveli Vaetiyopiya, a va yisa wugumbini madzaha mwendro sikhosane na vari wumbwiri ni gumbana silato migondroni gwawe, marago yawe mari vbavbandze, va thela dzitshoni litigo la Egipito.

⁵ Khavbo avbo, avo va nga bani na va gu tumba Etiyopiya ni gu dzi khusedza khu Egipito, va na ndrendremela va khala dzitshoni.

⁶ Khu litshigu lolo, vathu va vbanyago khu khisi-kheno nya yiphwa, va na ganela, khavo: “Nga wonani iso si giregidego ga vale hi nga bani hi va tumba avbo hi nga bani hi alakanya gu mana giphaso khu gu hi vhikela ni gu hi vbulugisa ga mufumeli wa Asiriya! Olu hi na dzi vbulugisa kharini?”