Isaya 2 - Bhibhiliya Nya Guage

Wudhumo nya gigomo gya Pfhumu Nungungulu

¹ Aya khu magana nya giwoniso gya Isaya, mwamana wa Amosi, mayelano khu Judha ni Jerusalema.

² Khu matshigu nya guhegise, gigomo gegi, yi vbahedwego avbo Nyumba ya Pfhumu Nungungulu, gi na tiyiswa vbatshani nya sigomo, gi khusedzwa vbatshani nya sigomwana, mafumbo yatshavbo nya mayigo ma na khirimelana guya iyoyo.

³ Mafumbo nya mangi nya mayigo, ma nata ganela, khayo: Hongoleni hi gwele gigomoni ga Pfhumu, hiya Nyumbani ga Nungungulu wa Jakobe, gasi a hi hevbudze dzindzila dzaye, hi gimbila khu dzindzila dzaye, kholu, nayo wu na duga khu Siyoni, magana ya Pfhumu Nungungulu, ma na duga khu Jerusalema.

⁴ Uye a na khala mulamuli vbakari nya mayigo, ni gu tsayisa mafumbo nya mangi. Matshari yawe ma na vbindrugedza ma khala mavbadza, ni siholoma sawe si khala sivbwero; li mwalo litigo li na gu wugelago litigo li kwawe, ambari vathu kha va na hevbula gu dwana nyimbi.

⁵ Enu livelego la Jakobe deluni, hi gimbile guwonegelani ga Pfhumu Nungungulu.

Litshigu la Pfhumu

⁶ Kholu uwe Pfhumu Nungungulu, u digide vathu vago va nyumbani ga Jakobe, kholu va dzegelede mavbanyelo nya tumbunugo wa mambe mayigo ya Khugadambo, va gu thumisa wunyanga kha nga Vafilisitiya, va thangana wupari ni va nya mayigo.

⁷ Litigo lawe li tade khu parata ni ndralama, dzithomba dzawe dzi mwalo mahegiso; li tade gambe khu dzikavalu, ni dzikareta dzawe, dzingi guvbindra tengo.

⁸ Litigo lawe gambe, li tade khu sihuru nya sifananiso, va gu khozela thumo nya mandza yawe, iso va si giridego kamwe khu dzinyala dzawe.

⁹ Khu kotani nya isoso, vathu vatshavbo va na theswa vbavbatshi, ni muthu nya guthavisege, a na hembuludwa. Khu guralo, kha va na tsetseledwa!

¹⁰ Sihalani dziphagoni nya siwindri, belani vbavbatshi nya mavbala, mu thava likhulo la Pfhumu Nungungulu ni wudhumo nya wugulu waye.

¹¹ Khu litshigu lolo, maho ya va nya matshandza ma na poyidwa, ni vathu va dzi khusedzago, va na vbwasamiswa; Pfhumu Nungungulu khuye basi a na gu khusedzwago khu litshigu lolo.

¹² Kholu Litshigu la Pfhumu, Nungungulu nya Tshivba Yatshavbo, li nata ga va nya matshandza ni ga va nya gu dzi khusedza, ni ga vatshavbo va nya gu dzi gugumugisa gasi va vbwasamiswa;

¹³ ni ga misimbo yatshavbo nya gulaphe ngudzu nya misena ya Libhanoni, ni miguhu yatshavbo ya tigoni ga Bhasani;

¹⁴ ni vbatshani nya sigomo satshavbo nya gulaphe ni sigomwana nya gukhugege,

¹⁵ ni vbatshani nya makhokhola yatshavbo nya gulaphe ni ga mabhiyo nya gutiye;

¹⁶ ni vbatshani nya mataro yatshavbo ya Tarisisi ni ga satshavbo iso si wonegago na si mburide mahoni ga vathu.

¹⁷ Khu litshigu lolo, vathu va dzi khusedzago va na thedwa dzitshoni, ni avo va dzi gugumugisago va na vbwasamiswa. Pfhumu Nungungulu khuye basi a na khusedzwago.

¹⁸ Sifananiso satshavbo nya vanungungulu nya malipha si na khungumuledwa muphelo.

¹⁹ Avbo, vathu va naya sihala dziphagoni nya siwindri, ni vbavbatshi nya mavbala, khu gu thava likhulo nya guthise li tago khu ga Pfhumu Nungungulu, ni gungangamela nya wugulu waye, gikhati a na tago guta thusa litigo.

²⁰ Khu litshigu lolo, vathu va na dzudzugela ga magondzo ni makoha sifananiso nya vanungungulu nya parata ni ndralama, iso va nga si girago gasi gu si khozela.

²¹ Vathu va na bela dziphagoni nya siwindri ni mavbalani nya sigomo, khu gu thava likhulo la Pfhumu Nungungulu ni gungangamela nya wugulu waye, gikhati a na tago guta thusa litigo.

²² Khu guralo, mu nga tumbi muthu a hefemulago khu dzithonvu. Kholu, giphaso muni a gu nagyo uye?