Isaya 17 - Bhibhiliya Nya Guage

Giprofeto khu Dhamasiko ni Efrayimi

¹ Mahungu mayelano khu lidhoropa la Dhamasiko: Wonani gukhenu Dhamasiko gu na fuviswa gu si khali gambe lidhoropa, aholu, gu na khala marumbi basi.

² Madhoropani ya Aroweri kha gu na khala gambe muthu; ma na khala malanga nya mitshambi, yi zumba umo, nyamba thurugisedwa khu vathu.

³ Likhokhola la Efrayime li na fuviswa, gumogo gambe ni mufumo wa Dhamasiko; ni mitshaledwa ya Siriya, yi na mana wudhumo nya gufanane ni wa sanana sa Israyeli, a ngu ganela kharato Pfhumu Nungungulu nya Tshivba Yatshavbo.

⁴ Khu litshigu lolo, wudhumo wa Jakobe wu na vbungudwa, a na wondra a tshala khu marambo.

⁵ Gu na fanana ni muvbweri a vbwerago tirigu, a wungedzelago mahwatshu khu mandza yaye, fanana gambe ni wule a vbwerago tirigu kovani ga Refayimi.

⁶ Aholu gu na tshala gwaye vadugwana nya guvbanye, gukhwatshi khu gu bani gu havedwe wuguhu gu tshaledzela wumbe nya gukari dzitshokhani nya matamo. Wa gu kutsungwa gu tshala dzikhongoba dzimbili mwendro dzitharu khu matamoni ya vbatshani, ni dzina mwendro livbandre, khu dzitshokhani nya matamo nya gunave. A ngu ganela Pfhumu Nungungulu wa Israyeli.

⁷ Khu litshigu lolo, muthu a na khedza Muvangi waye, maho yaye ma na khedza Nyaguage wa Israyeli.

⁸ Kha va na khedza gambe sihuru sawe nya miphaso, esi va nga dzi girelago khu mandza yawe, ambari gu khedza gifananiso gya Asitaroti gi nga girwa khu dzinyala dzawe, ambari gu khedza giluvelo nya guvbisele libani.

⁹ Khu litshigu lolo, madhoropa yawe nya makhokhola ma na khala kha nga malanga nya marumbi ya khabini, ni dzitshokani nya sigomo, umo va nga tutumelago umo khu gu thava va na Israyeli, gu na tshala nari giwula basi.

¹⁰ Kholu u divade Nungungulu nya guvbanyiswe gwago, u divaledwa khu Likhokhola nya wuthavelo wago. Khu guralo, u di lima marembwe nya misimbo nya wumburi, u yala dzimbewu nya gudhumise vanungungulu va nya mayigo.

¹¹ Ambari iso u na si yalago, si vbiredzela gudandra, khu litshigu li landrelago si thela wenge, iso u na vbwerago si na mwalalega khu litshigu nya gutshaniseke ni wuvi nyamba vbela.

¹² Yowe! Gupwala huwa nya sidzemo nya mayigo nya mangi; kha nga gudzuma nya linene, ni ligwaha nya vathu nya mayigo, va dzumago kha nga mavimbi!

¹³ Vathu nya mayigo va na gulumela kha nga gudzuma nya mavimbi, aholu Uye a na va kawuka, va tutuma va hongola hwindzo, gu fanana ni mungu wa gigomoni wu phalalegiswago khu phuvbo.

¹⁴ Vbasilambotunu va gu thedwa rerema, aholu na gu si gugi, va gu mwalalega. Esi khiso si na dugelelago avo va hi saselago ni vale va hi phangago.