Isaya 16 - Bhibhiliya Nya Guage

Mowabhi a ngu lomba giphaso ga Jerusalema

¹ Rumelani dzinvuta nya guye ga mufumeli a fumelago litigo, gukhugela dhoropani ga Sela, a tsemakanya giwula kala gigomoni ga nyamahegyane wa Siyoni.

² Kholu khu bambe nya tsongo wa Arinoni, vanyamahegyane va Mowabhi, va na tutuma khu eno ni eno gufanane ni sinyoni si phalalegisidwego khu sihagani gwawe, khavo:

³ “Hi ninge wusingalagadzi, gira wulamuli wago, gira mutsa wago vbamihanitunu, gukhwatshi vbakari nya wutshigu, siha vale va tutumisidwego, u nga ningeli avo va thavago.

⁴ Vale va tutumisidwego va Mowabhi, va na vbanye avbo gwago, va na mane gusihala avbo gwago, gasi va si manwi khu mumbembisi. Kholu muthu nya dzihanyi a na vbeledwa, yi vbela tshanisa, ni mutshanisi a na duga tigoni.

⁵ Khavbo avbo, gu na tiyiswa gikhalo gyago nya wufumu khu wuwadi, gu na khodziswa avbo mulamuli a na lamulago khu gululama ni gutumbega tshatshani wa Dhavhidhe.”

⁶ Hi pwide na gu ganedwa khu matshandza ya Mowabhi, gu dzi khusedza gwaye ni gigaha gyaye; gambe gu ghwira gwaye khwa mahala.

⁷ Khu guralo, enu va na Mowabhi, lilelani litigo lanu; mu lilela ngudzu mihandro nya dziuvha dza Kiri-Hareseti.

⁸ Kholu marembwe ya Hesibhoni ni lithembwe la Sibima, ma wunide; vafumeli va mambe mayigo va pilede matamo nya misimbo nya yadi, ma nga nava kala dhoropani ga Jazeri, ni giwulani; matamo yaye ma navide kala khisikheyi nya yiphwa.

⁹ Khu guralo nyi na lila, gumogo ni Jazeri, khu lithembwe la Sibima; uwe Hesibhoni, ni uwe Eleyali, nyi na mi naganisa khu marongo yangu; kholu thembweni gwanu nya mihandro, kha gu pwali gambe dzindzimo nya litsako nya guvbwere dzimbewu.

¹⁰ Marembweni nya gunone gu mwalo gambe gutsaka ni mikulungwane nya gunengele; mwalo a gamago gambe dziuvha maphisoni. Nyi degudzide mikulungwane nya gutsake.

¹¹ Khu guralo, mahembe yangu ma gu dzuma nga gitendre khu kotani ya Mowabhi, monyo wangu wa gu vbisega khu kotani ya Kiri-Heresi.

¹² Ambari ulo Mowabhi a dzi garadzago khu gu gwela malangani nya sigomo, ni gu bela nyumbani gwaye nya miphaso, aya lombelela, kha na mana gilo.

¹³ Aya khayo magana Pfhumu Nungungulu a ma ganedego khu gale, mayelano khu Mowabhi.

¹⁴ Khu guralo, Pfhumu Nungungulu a ngu ganela, khuye: “Ndrani nya myaga miraru, a gu myaga yi fananago ni ya muthu a thodwego gu yi thuma, wudhumo wa Mowabhi ni gidzemo gyaye nya gingi, wu na poyidwa; ni mitshaledwa yaye yi na bani yiri yidugwana na yiri mwalo tshivba.”