Hoseya 8 - Bhibhiliya Nya Guage

Tsayiso wa Israyeli

¹ Thela pundru kanani gwago! Kholu nala a nguta khu guvbuvba kha nga lighama, guta dhumela Nyumba ya Pfhumu Nungungulu, kholu mu hambanide ni gidzumeledzwano gyangu, mu wugela nayo wangu.

² Va na lila avbo gwangu, khavo: “Ethu va na Israyeli, hi ngu guti gukhethu khuwe Nungungulu wathu.

³ Israyeli nyenyide ndzila nya yadi; valala vaye va na mu landrelela.

⁴ Va dzi hathede vafumeli khu gugola gwawe, aholu, nasiri khu guruma gwangu, va dzi vegela vathangeli nyamba vati. Khu ndralama ni parata yawe, va di wumba vanungungulu nya sithombe, gasi va dzi mbembisa khiso.

⁵ Githombe gyago nya gimombyana uwe Samariya gi ngu nyi hasimisa monyo; likhulo langu li khondride vbatshani gwawe! Kala lini na va nga gu padwa khu gu dzi agisa?

⁶ Gimombyana gegi gi di girwa khu va na Israyeli! Gi di pfhudwa khu moyo nya vameseri vanu, khandri Nungungulu. Githombe gyogyo nya gimombyana gya Samariya, gi na khungumuledwa gi tshala khu sipandre.

Giprofeto nya guvbagedwe

⁷ Kholu va di yala maphuvbo, va na vbwera singulu. Givbila nyamba rumbuga, kha gi dusi wuguvbi. Ambari gya gu rumbuga, wu na hodzwa khu va nya mayigo.

⁸ Israyeli midzidwe; olu womo vbakari ga mambe mayigo kha nga gyombo nyamba phasa gilo.

⁹ Kholu tshatugide aya Asiriya, a fanana ni giburwana nya likhabi, gi golago gu khala genga, aholu Efrayimi, a dzi rengiside ga sibhayi saye.

¹⁰ Ambari va nga bani va dzi rengiside ga va nya mayigo, olu nyi va tshanganiside, Va phede gu lemedwa khu mirwalo ya mufumeli ni ya manganagana.

¹¹ Ambari Efrayimi a nga emisago siluvelo nya singi nya miphaso nya gudivaledwe sighoho, iso si khade siluvelo nya gu mu kutsedzele gu ghoha.

¹² Ambari nyi nga va lovelago mazanazana nya milayo yangu, avo isoso va di si wona nga gilo nyambana giphaso.

¹³ Avo va gu gola gu ningela miphaso, va songa sirengo, va gola guhodza dzinyama dzakone, aholu Pfhumu Nungungulu kha salali khiyo. Kha na diga gualakanya wuvivbi wawe, a na va tsayisa khu sighoho sawe, avo va na bwelela tigoni ga Egipito.

¹⁴ Kholu Israyeli divaledwe khu Muvangi waye, a dzi vbahela dzinyumba nya dzikhongolo nya wufumu, Judha, a di engedzela madhoropa nya makhokhola; aholu eni nyi na rumela nilo madhoropani gwawe wu ya dagaredzisa dzinyumba dzawe dzatshavbo nya wufumu.”