Hoseya 14 - Bhibhiliya Nya Guage

Sikategiso nya gu dzi sodzise

¹ Uwe Israyeli, wuya ga Pfhumu Nungungulu wago. Kholu u thesidwe khu sighoho sago.

² Indrani na mu dongisede magana nya gu dzi laye, mu bwelela ga Pfhumu Nungungulu; mu ya mu lomba, khenu: “Hi divalele sighoho sathu satshavbo; u hi hakha khu wuhindzi; phaso nya wadi hi gu luvago khuwo, khu malito ma dugago khu kanani gwathu, guvbindra miphaso nya simombyana.

³ Asiriya kha na kodza gu hi vbulugisa, kha hi na khilela dzikavalu nya nyimbi. Niso hi si giridego khu mandza yathu, gima kha hi na ganela gambe avbo gwawe khethu: Uwe khuwe Nungungulu wathu; kholu uwe u ngu pwela wuhindzi sisiwana.”

⁴ Nyi na dusa gumba tumbega gwawe, nyi va gola khu monyo wangu watshavbo, kholu likhulo langu li na duga avbo gwawe.

⁵ Avbo ga Israyeli nyi na khala kha nga thondrwane; uye a na nyuga nga genge a nava mikhamba nga simbo wa Libhanoni.

⁶ Matamo yaye ma na nava, wumburi waye wu fanana ni simbo nya olivha, wu nungela gu fanana ni simbo wa Libhanoni.

⁷ Avo va khalago mutsani gwaye, va na wuya, va wusedzwa nga tirigu, va rumbuga nga mihandro nya lithembwe nya vhinya; ndruma ya Israyeli yi na fanana ni vhinya ya Libhanoni.

⁸ Enu va na Efrayimi: Kha nyi vbweti gambe gupwa gilo khu sifananiso sanu? Kheni kamwe nyi mu ningago phindrulo nyi bwelo khavbo nyi mu sayisa. Eni nya gu nyuga gu fanana ni simbo nya pinyu, mihandro yago, ya gu dugela avbo gwangu.

⁹ Khu mani a gu ni guti, nya gukodze gu pima silo sesi? Uye a gu ni mapimo gasi a siti? Kholu dzindzila dza Pfhumu, dzi lulamide, va nya gululama va na gimbila khidzo, aholu sindraga milayo, dzi na va tshunganiswa va thega.