Hoseya 12 - Bhibhiliya Nya Guage

Malipha ya Efrayimi

¹ Efrayimi a gu gimbidziswa khu liphuvbo, litshigu latshavbo, a gu landrisela liphuvbo li furugedzago khu Khugadambo, a engedzela malipha ni dzihanyi. A gira pwanano ni Asiriya, aholu a rumela dzisagwati nya mafura tigoni ga Egipito.

² Pfhumu Nungungulu, a ngu rwega nandru Judha, a na tsayisa Jakobe khu kotani nya mavbanyelo yaye; a na mu ninga tshatshazelo nya mithumo yaye.

³ Jakobe a di mola ndriyaye khu gitshinandro na va ngari rumbuni ga mayi wawe; gikhati a nga dandrago a di dwana ni Nungungulu;

⁴ Dwanide ni ngilozi kala a yi pala; lide a lomba gu kategiswa. Tshanganide ni Nungungulu dhoropani ga Bheteli, avbo a nga ganelago naye.

⁵ Ina, Pfhumu, khuye Nungungulu nya Tshivba Yatshavbo, lina a tidwago khilo kheli la Pfhumu Nungungulu.

⁶ Khu guralo, vbindrugedza u wuya ga Nungungulu wago, gira wuwadi ni gululama u tumba Nungungulu wago gikhati gyatshavbo

⁷ Efrayimi mahungane, mandzani gwaye a na gikalo nya wudambane a gu gola ngudzu dzihanyi.

⁸ Efrayimi a di ganela, khuye: “Nyi khade gitetema khu gu ghanya thomba nya yingi! Ga mithumo yangu yatshavbo nyi giridego, kha va na mana avbo gwangu guvivba mwendro gighoho.”

⁹ Aholu eni kheni Pfhumu Nungungulu wago, gukhugela tigoni ga Egipito, eni nyi nga na gu gu gira u vbanya mitshatshani, kha nga matshigu nya mitshangano nya mibuzo.

¹⁰ Kheni kamwe nyi ganedego ni vaprofeti, nyi va ninga siwoniso nya singi, khu maganani gwawe, nyi di ganela khu sipimaniso.

¹¹ Tigoni ga Gileyadhi gwa gu bani guri ni manyala, avo va gu dzi pfhadza! Va gu bani va gu paya dzimombe va gira miphaso, siluvelo sawe sa gu fanana ni litala nya siwindri thembweni gu limidwego.

¹² Jakobe thavede khabini ga Siriya, Israyeli a diya dzi gira githumi nya guhavise dzinvuta, afela gu mana nyamayi.

¹³ Aholu Pfhumu Nungungulu a di rumela muprofeti, guya dusa Israyeli khu tigoni ga Egipito. Vathu va di gimbidziswa khu muprofeti.

¹⁴ Efrayimi goroside ngudzu Pfhumu Nungungulu, khu guralo, Nungungulu a mu giride a thegedwa hungoni gwaye khu nandru novba a wu vbaladzidego a gu rwala kharato nandru nya gighoho gyaye.