Gutuledwa 6 - Bhibhiliya Nya Guage

Nvutana yi ngu namula sifungo

¹ Nyi di wona Nvutana na yi gu namula gifungo nya guphele nya sile satshavbo nya livbandre na sivili. Khavbo avbo, nyi dipwa girengo nya guphele nya sile sa sina na gi gu ganela khu lito nya gudzume kha nga libara, khigyo: “Delu!”

² Khavbo avbo, nyi di wona kavalu nya guage na yi gu duga, na yi khiledwe khu muthu na pharide wulaho mandzani. A di ningwa gihugu nya wufumu, a gu phara ndzila a hongola kha nga kuzi, gasi guya pala.

³ Gikhati Nvutana yi nga namulago gifungo nya wuvili, nyi dipwa girengo nya wuvili na gi gu, khigyo: “Delu!”

⁴ Khavbo avbo, yi di duga yimbe kavalu, nya gufuvile, na yi khiledwe khu muthu a nga ningwago tshivba nya guvbedze gurula tigoni, gasi vathu va songane khu gyawe. A di ningwa gambe litshari nya likhongolo.

⁵ Gikhati yi nga namulago gifungo nya wuraru, nyi dipwa girengo nya wuraru na gi gu, khigyo: “Delu!” Khavbo avbo, yi di duga kavalu nya gusivbale, na yi khiledwe khu muthu a nga bani ari ni gikalo mandzani.

⁶ Khavbo avbo, nyi dipwa lito vbakari nya sirengo sa sina, khilo: “Gipimo nya tirigu gu livba thumo nya litshigu, sipimo siraru nya mavbila gu livba thumo nya litshigu aholu u nga pati mati ni vbinyu gambe u nga haganiseli mafura.”

⁷ Gikhati Nvutana yi nga namula gifungo nya wu na, nyi dipwa girengo nya wu na na gi gu, khigyo: “Delu!”

⁸ Nyi di wona kavalu nya safarawu, na yi khiledwe khu moyo nya gupwani khu “Gufa” a na gu bangaladzwa khu Hayidhesi, litigo nya vafi. A di ningwa gipandre nya wu na nya litigo, gasi a gi mwaladze khu litshari, ni ndzala, ni mitungu nya madwali ni sirengo nya likhabi.

⁹ Gikhati yi nga namula gifungo nya livbandre, nyi di wona vbavbatshi nya giluvelo mihefemulo ya vale va nga songwago khu kotani nya gutivise mahungu ya Nungungulu ni gu ma fakaza khu mavbanyelo yawe.

¹⁰ Va di gu huwelela khu tshivba, khavo: “Pfhumu, uwe khuwe u agidego ni gutumbega! Hi na lirela kala lini gasi u lamule vathu va tigonimu, u hi phodzela olu va nga hi songetelago?”

¹¹ Moyo ni moyo wawe a di ambagiswa ngandzu nya guage, va embedwa pwani va na hefemule vbadugwana, va lirela gu enedza tengo nya vangana ni vandriyawe, ava va nga gu vbwetago gu songwa nga avo.

¹² Gikhati yi nga namula gifungo nya livbandre na gimwegyo. Nyi di wona girevareva nya gikhongolo; lidambo li di sivbala kha nga gilendra; ngima wu di fuvila kha nga novba.

¹³ Dzinyeledzi dza ndzadzini dzi di thegelela vbavbatshi, kha nga nguyu wu thegelago maguyu nya mambihu khu gu kutsungwa khu gingulu.

¹⁴ Ndzadzini gu di mwalalega kha nga lidangalila li peteledwago. Sigomo ni sidwa satshavbo si di siguledwa malangani gwawe.

¹⁵ Vafumeli nya mayigo, ni vathangeli nya dzinyimbi, sitetema, va nya tshivba, vatshavbo, dzikhumbi ni va nya gutshulega, va di sihala mudziphagoni nya siwindri sa musigomoni;

¹⁶ va di embela sigomo ni siwindri, khavo: “Hi thegeleni mu hi siha ga wule a khadego vbagikhalotunu nya wufumu, ni ga likhulo la Nvutana,

¹⁷ kholu Litshigu likhongolo nya likhulo laye li vbohide; khu mani a na gu li tiyelago?”