Gutuledwa 3 - Bhibhiliya Nya Guage

Lidangalila ga Libandla la Sardhesi

¹ Lovela ngilozi ya libandla la Sardhesi, khuwe: “Wule a gu ni livbandre na mavili maphuvbo ya Nungungulu ni livbandre na dzimbili dzinyeledzi, wari, khuye: Nyi ngu yiti mithumo yago, u na ni ndruma nya gupwani u ngu vbanya. Gasi u fude.

² “Dzi wonele, u dwanela gipandre gi si gufigo, kholu kha nyi ma woni gwadi mavbanyelo yago mbeli ga Nungungulu.

³ Khu kharato dundruga mahungu u ma hakhidego ni gu mapwa. Ma landrise, u vbindrugedza mavbanyelo u wuya ga Nungungulu. Wamba gwadi nyi nata kha nga mbafa nu si giti gikhati nyi na gu gu vbohelago khigyo.

⁴ Ambari ulo, tigoni ga Sardhesi u na ni vathu va ngamba kunedzisa dzingandzu dzawe. Avo nyi na gimbila navo na va ambade dzingandzu nya guage, kholu va na ni fanelo.

⁵ Uye a na palago a na ambala dzingandzu nya guage; eni gima kha nyi na nga futa lina laye mu libhukuni nya womi. Nyi na tivisa lina laye ga Babe wangu ni ga dzingilozi dzaye.

⁶ “Wule a gu ni dzindzeve a na pwisise esi Liphuvbo li embelago mabandla.”

Lidangalila ga Libandla la Filadhelifiya

⁷ Lovela ngilozi ya libandla la Filadhelifiya, khuwe: “Wule a agidego, a gu uye nya lisine, a gu ni pfhungulo ya Dhavhidhe, wule nya gu a gu tula mwalo a segago, a gu sega mwalo a tulago, wari, khuye:

⁸ Nyi ngu mati mavbanyelo yago. Nyi tude lidimba mbeli gwago, mwalo a li kodzago gu li sega. Nyi ngu dziti nya gukheni tshivba yago yi dugwanana, aholu u vegedzide magana yangu, khwa danga lina langu.

⁹ Nyi na gu ninga tshangano nya valandreli va Sathane, vale va dzi randrago Vajudha nari va gu lipha. Va na khidzima migondroni gwago, gasi va dziti nya gukhavo nyi ngu gu gola.

¹⁰ Kha nga ulo u nga landrisago magana nya gutimisele gwangu, eni neni nyi na gu vhikela gikhati litigo latshavbo li na lingwago gasi gu wona khu mani a tiyidego mafuni.

¹¹ “Nyi nguta nugunugu. Iso u gu naso si vegedze, gasi u si dzegedwi gihugu gyago nya wudhumo.

¹² Gasi wule a na palago nyi na mu gira lidingo Nyumbani ga Nungungulu wangu, umo nya gu gima kha na duga kala gupindruga. Nyi na mu lova lina la Nungungulu wangu, ni lina nya lidhoropa la Nungungulu wangu, Jerusalema nya guphya, gu tshigago khu ndzadzini, gutago khiyo ga Nungungulu wangu, bwelo khavbo nyi mu lova lina langu nya liphya.

¹³ “Wule a gu ni dzindzeve a na pwisise esi Liphuvbo li embelago mabandla.”

Lidangalila ga Libandla la Lawodhikeya

¹⁴ Lovela ngilozi ya libandla la Lawodhikeya, khuwe: “Wule a gu uye, Amen, a gu fakazi nya guthembege nya lisine a gu uye guphela nya sivangwa sa Nungungulu, wari, khuye:

¹⁵ Nyi ngu mati mavbanyelo yago, khu dzidzili, gambe khu vbisi. Nari pwani sago nuri wa gu dzidzila mwendro nuri wa guvbisa!

¹⁶ Kha nga olu u gu wa gu furumela u si gu wa gudzidzila mwendro guvbisa, nyi na gu gosa khu kanani gwangu.

¹⁷ Kha nga u ganelago, khuwe: ‘Nyi gikhudhudhu, nyi fumide, gi mwalo nyi gi hamugago.’ Aholu khu dziti nya gukhuwe u mutshaniseki, u gisiwana, u gikhumu, u wumbwiri.

¹⁸ Nyi ngu gu laya gukheni renga gwangu ndralama nya gumburisedwe niloni, gasi u fume; u renga dzingandzu nya guage, gasi u ambale, u siha dzitshoni nya wumbwiri wago; u renga rendre nya maho, gasi u dzi todza u kodze gu wona.

¹⁹ Eni, nya gu kawuka ni gu laya avo nyi va golago. Khu kharato, dzi garadze, u vbindrugedza mavbanyelo u wuye ga Nungungulu.

²⁰ Nyi womo vbalidimbatunu nyi khokhotha. Uye a na pwago lito langu a nyi tulela, nyi na bela nyumbani gwaye nyi hodza naye, uye nuye a hodza ni eni.

²¹ “Wule a na palago nyi na mu dzumedzisa gu khala naye vbagikhalotunu gwangu nya wufumu kha nga eni neni nyi nga palago nyi khadego vbagikhalotunu nya wufumu wa Babe wangu.

²² “Wule a gu ni dzindzeve a na pwisise esi Liphuvbo li embelago mabandla.”