Gutuledwa 21 - Bhibhiliya Nya Guage

Ndzadzi yiphya ni litigo liphya

¹ Khavbo avbo, nyi di wona Ndzadzi nya yiphya ni litigo liphya. Kholu, ndzadzi nya guhegule ni litigo nya guhegule si di vbindride, ni yiphwa yi di mwalalegide.

² Eni Johane, nyi di wona gambe na gu tshiga khu ndzadzini, khiyo ga Nungungulu, Lidhoropa nya gukatege, Jerusalema guphya, gu dzi dongisedego nga nyamayi a dzi mburisedego gasi guya hakha mwama waye.

³ Khavbo avbo, nyi di pwa lito nya tshivba na li guta khu gikhalotunu nya wufumu, khilo: “Wonani Nyumba ya Nungungulu vbakari nya vathu. Nungungulu a na vbanya vbakari nya vathu, avo va na khala vathu vaye, uye vbakari gwawe, a na bani ari Nungungulu wawe.

⁴ Uye a na va bavbula marongo mahoni gwawe, kholu gima kha gu na manega gambe gufa, gulila gu na vbela, ni gudilela ni wuvi, kholu dzitshanisa dza gale dzi vbindride.”

⁵ Wule a khadego vbagikhalotunu nya wufumu a di tivisa, khuye: “Eni nyi ngu gira siphya silo satshavbo.” A engedza gambe, khuye: “Lova kholu magana yaya ma tumbegide, gambe khya lisine.”

⁶ A di nyi embela gambe, khuye: “Satshavbo si giregide! Eni kheni Guphela ni Mahegiso (Alfa ni Omega). Oyu a gu ni lidora nyi na mu ninga a sela mahala mati nya gifefe nya guvbanye.

⁷ Oyu a na palago a na hakha thomba yeyi, eni nyi na khala Nungungulu waye, ni uye a khala gyanana gyangu.

⁸ Gasi va nya wugara, ni mahedheni, ni sighohi, ni sighevenga, ni sibhayi, ni dzindroyi, ni va nya malipha, va nya wunyanga, vatshavbo va dongisedwe wulanga wawe tsivani nya nilo ni solufa, a gu gufa nya wuvili.”

Jerusalema nya guphya

⁹ Khavbo avbo, nyi di wona ngilozi mweyo nya dzile nya livbandre na dzimbili dzingilozi dza Nungungulu dzi nga bani dzi pharide livbandre na sivili sikombe nya gutale khu livbandre na sivili sitsayiso, yi dita gwangu yita, khiyo: “Delu! Nyi na gu yeyedza Mwangadzi wa Nvutana.”

¹⁰ Khavbo avbo, yi di nyi rwala khu Liphuvbo yi nyi yisa gigomoni nya gikhongolo, nya gulaphe yi nyi yeyedza Jerusalema, lidhoropa nya gukatege, li nga bani li gu tshiga khu ndzadzini, khu ga Nungungulu.

¹¹ Lidhoropa li di ngangamela khu wudhumo wa Nungungulu. Gu aga gwaye gu di gira nga giwindri nya gukhedzige ngudzu nga giwindri nya jasiperi nya guage nga libona.

¹² Lidhoropa lakone li dzuwulugedwe khu libhiyo nya gugule ni gulapha, li gu ni likhumi na mavili malimba. Khu vbatshani nya malimba di diromo likhumi na dzimbili dzingilozi dza Nungungulu, gambe gu lovidwe malina, a gu malina nya likhumi na mavili mahundzu nya sanana sa na Israyeli.

¹³ Malimba mararu ma khade khu Khugadambo; mararu khu Wuronga; mararu khu Marandzi; ni mararu khu Muhwadambo.

¹⁴ Libhiyo nya lidhoropa li vbahidwe vbatshani nya likhumi na sivili siseketelo si lovidwego likhumi na mavili malina nya vapostoli va Nvutana.

¹⁵ Uye a nga bani a gu ganela ni eni a diri ni ndronga nya ndralama, gasi gu pima lidhoropa, ni malimba yaye ni libhiyo lakone.

¹⁶ Lidhoropa leli li na ni maphuvbo mana nya tanga mweyo. A di pima lidhoropa khu ndronga; li di ningana likhumi na mavili magumi mazana nya mipimo (12.000). Gulapha ni gugula, dzindzari dzatshavbo ni vbatshani gu di ningana.

¹⁷ A di pima gambe libhiyo a mana lizana ni magumana na mina (144) mikono. Ngilozi yi di gu pima khu mapimelo nya giwuthu.

¹⁸ Libhiyo li di vbahwa khu siwindri nya jasiperi, gasi lidhoropa li di vbahwa khu ndralama nya gukhedzige nga libona nya guage ngudzu.

¹⁹ Siseketelo nya libhiyo si londridwe khu mafumbu yatshavbo nya siwindri nya wuzundzo. Egi nya guhegule gi londridwe khu jasiperi; nya wuvili khu safira, egi nya wuraru gi londridwe khu kalsedoni, egi nya wu na khu esmeralidha;

²⁰ egi nya livbandre khu saridhoniya; egi nya livbandre na gimwegyo khu komalina; egi nya livbandre na sivili khu krizolito; egi nya livbandre na siraru khu bherilo; egi nya livbandre na sina khu topasiyo; egi nya likhumi khu krizoprazo; egi nya likhumi na gimwegyo khu Jasintu; egi nya likhumi na sivili khu ametista.

²¹ Malimba yale nya likhumi na mavili a diri likhumi na sivili siwindri nya gukhedzige, lidimba ni lidimba li di girwa khu rumba nya giwindri nya gukhedzige. Ndzila yakone ya vbakari yi diri ndralama nya gukhedzige nga libona nya guage ngudzu.

²² Dhoropani gwatshavbo kha nya wona Nyumba ya Nungungulu. Kholu uye Pfhumu Nungungulu nya Tshivba Yatshavbo, gumogo ni Nvutana, khuye abune Nyumba ya Nungungulu.

²³ Lidhoropa lakone khali vbweti lidambo, ambari ngima gu wenengedza, kholu la gu wenengedzwa khu wudhumo wa Nungungulu, wenengedzo waye khu Nvutana.

²⁴ Mayigo ma na gimbila vbakari nya safa nya wenengedzo waye. Ni vafumeli nya mayigo va nata, va resa dzithomba dzawe dhoropani.

²⁵ Malimba yaye kha ma na segwa, kholu gima kha gu na khala gambe wutshigu.

²⁶ Va na resa gwaye wudhumo ni thomba nya mayigo.

²⁷ Dhoropani gakone gima kha gu na bela gilo nya gunyenyeze, ni vathu va girago guvivba ni malipha; aholu va na bela basi vale va lovidwego libhukuni nya womi la Nvutana.