Gutuledwa 2 - Bhibhiliya Nya Guage

Lidangalila ga libandla la Efeso

¹ Lovela ngilozi nya libandla la Efeso, khuwe: “Wule a pharidego livbandre na dzimbili dzinyeledzi khu nyamudye; wule a vbindrago khu vbakari nya livbandre na dzimbili dzikandriya nya ndralama, wari, khuye:

² Nyi ngu siti sigiro sago, mithumo yago ni gutimisela gwago, kholu nyi ngu dziti nya gukheni khu pwanani ni vathu nyamba si vadi; ni vale va dzi ranago vapizane vasiri avo, u va lingide, u va kona muguliphani gwawe.

³ “U na ni gutimisela, u tshanisekide khu kotani nya lina langu, ambari ulo khwa rereka.

⁴ Aholu, nyi ngu gu sola kholu u digide lihaladzo lago nya guhegule.

⁵ Nga dundruga avbo u nga thega khavbo; nga dzi vbindrugedza, u landrisa nyaluphye mithumo yago nya guhegule. Aholu, wa gumba dzi vbindrugedza, nyi nata iyo gwago nyita dusa kandriya yago wulangani gwaye.

⁶ “Ambari khu guralo, u na ni gipandre gyago nya wuwadi, kholu, u ngu nyenya mithumo ya valandreli va Nikolawu, kha nga edzi nyi yi nyenyago khidzo eni.

⁷ “Wule a gu ni dzindzeve a na pwisise esi Liphuvbo li embelago mabandla. Ga wule a na palago, nyi na mu dzumedzisa gu hodza handro nya simbo nya womi wu guromo thembweni ga Nungungulu.”

Lidangalila ga libandla la Esmirina

⁸ Lovela ngilozi ya libandla la Esmirina, khuwe: “Wule a gu Guphela ni Guhegisa; wule a ngafa a wuya a wuga, wari, khuye:

⁹ Nyi ngu guti gutshaniseka gwago ni wusiwana wago, (aholu u fumide.) Nyi ngu dziti gambe edzi va gu nyenyago khidzo vale va dzi ranago Vajudha vasiri avo, kholu avo tsawa nya valandreli va Sathane basi.

¹⁰ U nga khali hwanga khu gu wona gutshaniseka gu gu viredego. Ndrani nya matshigu yaya, Sathane a na khothela pasoni vambe ni vambe vbakari nya libandla lanu, gasi gu va lingwa. Mu na wona gutshaniseka nya gukhongolo gipimo nya likhumi matshigu. Tumba kala gufa, nyi na gu ambagisa gihugu nya womi nyamba bela.

¹¹ “Wule a gu ni dzindzeve a na pwisise esi Liphuvbo li embelago mabandla: Wule a na palago gima kha na nga wona tshanisa nya lufu nya wuvili.”

Lidangalila ga Libandla la Pergamo

¹² Lovela ngilozi ya libandla la Pergamo, khuwe: “Wule a lodzidego litshari li vbira eno ni eno, wari, khuye:

¹³ Nyi ngu miti mithumo yago ni avbo u vbanyago, khavbo gi guromo gikhalo nya wufumu wa Sathane. Ambari guralo, u ngu pala sigaradzo satshavbo, u namarela, khu gutiya, linani gwangu. Khwa nyenya gukhodwa ga eni. Ambari ga matshigu yale a nga songwago khayo mufakazi wangu nya gutumbege Antipa a nga bani a gu vbanya vbakari gwanu, avbo a vbanyago nuye Sathane.

¹⁴ Aholu, u na ni nandru; kholu u navo vbakari gwago valandreli nya nayo wa Bhalahama wu nga hevbudzwago khu Bhalahaki, gasi gu tshunganedzisa sanana sa Israyeli, si hodza nyama nya sirengo nya guphasedwe sithombe nya vanungungulu nya malipha, ni gu gira wuphuphulu.

¹⁵ Vomo navo vbakari gwago valandreli nya nayo wa Nikolawu avo nyi va nyenyago neni.

¹⁶ Nga vbindrugedza mavbanyelo; nyi nga gara nyita khu guvbiredza nyita dwana navo khu litshari leli la kanani gwangu.

¹⁷ “Wule a gu ni dzindzeve a na pwisise esi Liphuvbo li embelago mabandla: Wule a na palago nyi na mu ninga manaha ma sihidwego. Nyi mu ninga gambe giwindri nya guage gi lovidwego lina nya liphya, eli li si tidwigo khu muthu vbavbandze nya wule a nga riywago ilo.”

Lidangalila ga Libandla la Tiyatira

¹⁸ Lovela ngilozi nya libandla la Tiyatira, khuwe: “Mwamana wa Nungungulu, oyu a gu ni maho nya gungangamele nga nilo, ni migondro yaye nya gukhwatshi sugu nya gukhedzige, wari, khuye:

¹⁹ Nyi ngu siti sigiro sago, ni lihaladzo lago, ni mithumo yago, ni gukhodwa gwago, ni gutimisela gwago, ni gusimamisa gwago; mithumo yago ya olu yi ngu vbindra eyi nya guhegule.

²⁰ Aholu, u na ni nandru kholu u digago Jezabheli, nyamayi a dzi girago muprofeti, a ndreyisa sithumi sangu, a si hevbudza gu gira wuphuphulu, ni gu hodza nyama nya guphasedwe vanungungulu nya malipha.

²¹ Eni nyi mu ningide gikhati nya gu vbindrugedze, aholu, uye kha dzini gu vbindrugedza mavbanyelo a diga wuphuphulu waye.

²² Olu furi guvbweta gu nga mu thesa vbadawutunu a tshaniseka gumogo ni vale va nga bhaya naye, va na tshaniseka wulanga nya wukhongolo ngudzu va gumba vbindrugedza mavbanyelo va diga mithumo yawe nya guvivbe.

²³ Nyi na rwega lufu ga sanana saye gasi mabandla yatshavbo ma dziti gukhayo kheni muloli nya mahingigedzo ni myonyo, kholu nyi na ninga moyo ni moyo gukhedza khu mithumo yaye.

²⁴ “Gasi ga enu ni vambe vathu va Tiyatira vale va si landreligo milayo yeyi, enu mu si gutigo ‘Gueta ga Sathane’ (kha nga edzi gu ganedwago khidzo) kha nyi na mi lemedza khu mimbe mirwalo.

²⁵ Aholu, vegisani eyi milayo mu gu nayo kala nyi gu wuya.

²⁶ Ga gikhati gyogyo wule a na palago ni gu landrisa mithumo yangu kala mahegiso, nyi na mu ninga tshivba nya gufumele mayigo.

²⁷ A na ma fuma khu ndronga nya dzisimbi, a na ma pandrelela kha nga edzi gu pandredwago khidzo dzikhali nya libumba.

²⁸ Kha nga Eni neni nyi hakhidego wufumu ga Babe wangu, a nuye nyi na mu ninga thandra nya gugye.

²⁹ “Wule a gu ni dzindzeve a na pwisise esi Liphuvbo li embelago mabandla.”