Gutuledwa 14 - Bhibhiliya Nya Guage

Ndzimo nya sihathwa

¹ Khavbo avbo, nyi di wona Nvutana na yi emide gigomoni gya Siyoni. Gumogo ni Nvutana, va diromo lizana ni magumana na mana magumi mazana (144.000) nya vathu va nga bani va lovidwe vbagiwombotunu lina Laye ni la Babe Waye.

² Nyi dipwa gambe gudzuma ndzadzini kha nga linene, ni libara nya likhongolo, aholu dzindzeveni gwangu gu di pwala gukhwatshi lito nya hwambi wu wombwago.

³ Va di gu embelela ndzimo nya yiphya mbeli nya gikhalo nya wufumu, mahoni nya sivangwa sa sina nya guvbanye ni manganagana. Mwalo mumbe a kodzago gu yi hevbula ndzimo yile, vbavbandze nya vale nya lizana ni magumana na mana magumi mazana (144.000) nya vathu va nga dzegiswago vbakari nya litigo.

⁴ Ava khu vale va ngamba dzi nyenyezisa khu vanyamayi, vale va nga khala na va dzi vegiside; khavo va landrelago Nvutana malangani yatshavbo. Va di dzegiswa vbakari nya vathu nga matiwula ga Nungungulu ni ga Nvutana.

⁵ Khanani gwawe gima kha ga manega, wupembi, va tumbegide mbeli nya mufumo wa Nungungulu.

Dzingilozi dzitharu dzi ngu tivisa gikhati nya gulamudwe

⁶ Nyi di wona gambe yimbe ngilozi na yi gu vbuvba ndzadzini. Yi diri ni Mahungu nya Yadi nya gupindruge, guta embela vathu va vbanyago mafuni, nya mafumbu, ni mahundzu, ni malimi yatshavbo.

⁷ Ngilozi yi di huwelela khu tshivba, khigyo: “Ningani githawo Nungungulu, mu dhumiseni kholu gi vbohide gikhati gyaye nya gulamule! Khozelani Muvangi nya ndzadzi ni mafu ni linene ni sifefe nya mati.”

⁸ Yi di landrela yimbe ngilozi nya wuvili yi huwelela, khiyo: “Mbembide! Mbembide Bhabhiloni lidhoropa lile nya likhongolo! Uye a nga levisa mayigo yatshavbo khu vbinyu nya likhulo nya wubhemba waye.”

⁹ Khavbo avbo, gu di landrela ngilozi nya wuraru, yi ganela khu tshivba ngudzu, khiyo: “Wule a na gu khozelago girengo ni gifananiso gyaye, mwendro gu hakha gifungo gyaye vbagiwombotunu, mwendro mandzani,

¹⁰ uye a na sela gambe vbinyu nyamba futungedzwa nya likhulo la Nungungulu, li guhudwago ni tshivba yaye yatshavbo gikombeni nya gulamule. Gambe a na dayiswa khu nilo ni sufula mbeli nya dzingilozi nya gukatege ni Nvutana.

¹¹ Gu na tuviga wutshi nyamba vbela khu niloni nya gusaniseke gwawe. Vatshavbo va khozelago girengo ni githombe gyaye, mwendro gu vegisa gifungo nya lina laye va na saniseka nyamba hefemula wutshigu ni mihani.”

¹² Khigyo egi gikhati nya dzindrena nya gukhodwe; vale va timiselago va vegisa milayo ya Nungungulu ni gukhodwa ga Jesu.

¹³ Nyi dipwa lito ndzadzini li nyi embela, khilo: “Lova, khuwe: Va kategide vale, gukhugela muhuno, va na felago mandzani ga Pfhumu.” Liphuvbo li di, khilo: “Ina, khidzo furi! Gugaralani gwawe va na mana guhefemula, kholu mithumo yawe yi ngu va landrela.”

¹⁴ Nyi di wona gambe moyo nya gufanane ni Mwamana wa Muthu na khade vbatshani nya lipfhi nya guage. Na ambade gihugu nya wufumu nya ndralama hungoni, na pharide givbwero nya guvbire mandzani gwaye.

¹⁵ Ngilozi mweyo yi di duga khu Nyumbani ga Nungungulu, yi khusedza lito yi ganela ni wule a nga bani a khade vbatshani nya lipfhi, khiyo: “Dzega givbwero gyago u pilele, kholu gikhati nya guvbwere gi vbohide. Mbewu ya tigoni yi vidzidwe.”

¹⁶ Khavbo avbo, wule a nga bani a khade lipfhini a di tshisa givbwero mafuni, a gu vbwera litigo.

¹⁷ Yimbe ngilozi yi di duga gambe khu Nyumbani ga Nungungulu yi guromo ndzadzini, na yi pharide niyo givbwero nya guvbire.

¹⁸ Khavbo avbo, yi di duga yimbe ngilozi khu giluveloni, ni tshivba nya gufumele nilo, yi di khusedza lito khu tshivba yi embela ngilozi yile yi nga bani yi pharide givbwero nya guvbire, khiyo: “Phara givbwero gyago nya guvbire u pilela sitsatsa nya dziwuvha dza tigoni kholu dzi tshanganede guvidzwa.”

¹⁹ Ngilozi yi di tshisa givbwero mafuni yi pilela dziwuvha dza tigoni yi dzi thedzela sungwani nya likhulo la Nungungulu.

²⁰ Dziwuvha dzedzi dzi di ya sugedwa vbavbandze nya lidhoropa. Novba nya wungi ngudzu wu di vbalagela khu sungwani wu tala kala gu manela matomo nya dzikavalu. Wu langaladza kharato gipandre nya likhumi na livbandre na limwedo mazana (1.600) mipfhuka.