Gizimba 1 - Bhibhiliya Nya Guage

I. NDZIMO NYA GUPHELE Phera ya nyamayana

¹ Gizimba nya sizimba sa Solomoni.

² Nga nyi bhejari khu besu ya kanani gwago! Kholu lihaladzo lago la gu lombela guvbindra dosi nya dziuvha,

³ khu gutshamba nya gunungele nya mafura yago; lina lago la gu fanana ni mafura ma guhudwego; khidzo u haladzwago khidzo khu sagadzyana.

⁴ Nyi phare, nyi gulandrela khu gututuma! Mufumeli a nyi bedzide makhuvini gwaye. Hi na gu zundza hi gu tsakela. Hi na nengela ni gutsaka avbo gwago, hi na gualakanya khu lihaladzo lago nya gutshambe guvbindra dosi nya dziuvha. Avo valulamidego, va ngu gu gola.

⁵ Nyamayana —Nyi di sivbala sangu, aholu nyi mburide, enu sagadzyana sa Jerusalema, nya gu fanana ni mitshatsha ya Kedhari, gu fanana ni myendra nya makhuvi ya Solomoni.

⁶ Mu nga nyi woni olu nyi nga sivbala, kholu nyi nga vbiswa khu lihani. Vandriyangu va nyi goroside; va nyi vega gu ghadha marembwe, aholu lithembwe li nyi lumbago kha nya li ghadha.

⁷ Nga nyi embela, uwe gigodwa nya monyo wangu, wa gu havisela hayi tshambi wago? Khu gikhati nya midiya wa guya zumbela hayi? Gasi nyi si legalegi khu hwane nya mitshambi ya dzipari dzago.

⁸ Mwama —Wa gumba dziti uwe u gu mburi nya dzimburi, landra migondro nya tshambi; u ya havisa dziphongo dzago vbafuvbi ni mitshatsha ya vahavisi.

⁹ Gigodwa gyangu, uwe wa gu fanana ni dzikavalu nya dzikareta dza Faro;

¹⁰ Sigundru sago si mburisedwe khu dziphera nya sugu ni thamoni gwago gumburisedwe khu wulungu nya gukhedzige.

¹¹ Hi na gu girela karara nya ndralama, hi wu mburisela khu dzibutawu nya parata.

¹² Mwangadzi —Avbo mufumeli a nga bani a khade vbamezatunu gwaye, vbagikhalotunu gwaye, a dipwa gunengela nya mafura nyi nga bani nyi tode.

¹³ Gigodwa gyangu gya gu fanana ni kwama nya mafura, wu khalago vbamaveletunu gwangu.

¹⁴ Gigodwa gyangu gya gu fanana ni gitsatsa nya senge nya guage sa mahangeni ga Eni-Ghadhi

¹⁵ Mwama —Gigodwa gyangu, idzo u mburidego khidzo! U mburide ngudzu! Maho yago ma gu fanana ni lituva.

¹⁶ Mwangadzi —Idzo u gu mburi khidzo gigodwa gyangu! U lidzaha nya gunengedzise! Lidahu lathu, khya matamo nya gunyuge,

¹⁷ minaneko nya nyumba yathu, khya sedhari, ni dzimbano dzakone khya siperesite.