Genesi 50 - Bhibhiliya Nya Guage

Gudzingwa gwa Jakobe ni gililo gyaye

¹ Josefa a di dzi thesa khovbeni ga babe waye a lila ni gu mu bhejari.

² A di ruma sithumi saye nya dzinyanga va sayisa girumbi gya Israyeli va gi todza mafura.

³ Avo va di thuma gipimo nya magumana matshigu, a gu ayo matshigu ma vbwetegago gasi gu sayisa girumbi. Aholu Vagipiti va di gira gililo nya livbandre na mavili magumi matshigu.

⁴ Avbo ma vbedego matshigu nya gililo, Josefa a di ganela kharati ga vathu va Faro, khuye: “Nya gu bani nyi manide wuhigo mahoni gwanu, nyi ngu mi lombani mu ya bikela Faro magana yaya, khenu:

⁵ Babe wangu a di nyi gira nyi sambanya, a nyi embela, khuye: Olu eni nyi ngufa; nyi dzinge thowoni nyi dzi kembedego tigoni gwa Khanani. Nyi di gola gu hongola nyi ya dzinga babe wangu, nyi na wuya guvbelani nya isoso.”

⁶ Faro a di hakha, khuye: “Indra u ya dzinga babe wago kha nga idzo a nga gu sambanyisago khidzo.”

⁷ Josefa a di hongola guya dzinga babe waye. A di vbwelegedzwa khu dzindruna dzatshavbo dza Faro ni manganagana, ni madhota yatshavbo ya Egipito,

⁸ gumogo gambe ni ngamo yatshavbo ya Josefa ni vandriyaye ni ndranga yatshavbo ya babe waye; va diga basi tigoni ga Goseni, sanana ni mitshambi nya sirengo nya sidugwana neyi nya iso nya sikhongolo.

⁹ Gumogo naye dzi di gwela dzikareta nya dzingi ni vakhileli nya dzikavalu. Gu diri gidzemo nya gingi ngudzu.

¹⁰ Avbo va nga vbohago vbagithalatunu gya Atade, githala nya miba gi guromo bambe nya tsongo wa Joridhani, va di gira vbale thumo nya gudzinge ni gililo nya gikhongolo ngudzu; Josefa a di gira gililo nya gikhongolo a lila babe waye khu livbandre na mavili matshigu.

¹¹ Avbo va nga wonwago khu vavbanyi va tigoni ga Khanani, va wona madzingelo ya githalani gya Atade, va di ganela, khavo: Egi gililo nya gikhongolo gya Vagipiti. Khu guralo, gu di ranwa wulanga wule gupwani Abheli-Mizirayimi, wu guromo khu tshatugo ga Joridhani.

¹² Sanana saye si di gira kha nga idzo a nga va leletelago khidzo.

¹³ Va di mu yisa tigoni ga Khanani va ya mu dzinga thowoni li guromo thembweni ga Makipela, li nga rengwago khu Abrahama ga Efroni Muhiti, gasi gu gira lithowo vbafuvbi ni Mambre.

¹⁴ Khu hwane nya ugo, Josefa a di bwelela Egipito, uye gumogo ni vandriyaye ni vatshavbo a nga hongolago navo va mu bangaladza guya dzinga babe waye.

Josefa a ngu tiyisedza vandriyaye

¹⁵ Vandruye va Josefa, avbo va nga wonago gukhavo babe wawe fude, va di ganela, khavo: “Khu lisine olu Josefa gikhati nya gu a hi wugela, a hi bweledzela guvivba gwatshavbo hi mu giredego!”

¹⁶ Khu guralo, va di rumela guya embela Josefe, khavo: Babe wago nasi gufi, a hi leletede kharati, khuye:

¹⁷ Ganelani kharati ga Josefe, khenu: Tsetselela guvivba u giredwego khu vandriyago ni gighoho gyawe. Kholu va gu girede guvivba; gasi olu hi ngu gu lomba gukhethu u tsetselela gihoso gya sithumi sa Nungungulu wa babe wago. Josefe a di lila na va nga gu mu embeledzela.

¹⁸ Vandriyaye va di engedza va ta dzi thesa migondroni gwaye, khavo: “Hi womo avba, hi dzumede gu khala dzikhumbi dzago!”

¹⁹ Josefa a di hakha, khuye: “Mu nga thavi; gasi eni nyi Nungungulu, gani?

²⁰ Enu khu lisine, mu nyi giredeni gikungo nya guvivbe; aholu Nungungulu a gi vbindrugedzide a gi gira nya gyadi gasi gu manega nya sadi, kha nga olu mu si wonago, gasi vathu nya vangi va kodze guvbanyiswa.

²¹ Gasi olu, enu mu nga thavi; eni nyi na mi hodzisani gumogo ni sanana sanu.” Khu magana yaya, a di tangadzisa myonyo yawe.

Gufa ga Josefe

²² Josefe khade tigoni ga Egipito, uye gumogo ni ngamo ya babe waye; vbanyide lizana ni likhumi myaga.

²³ Josefe wonide vatugulu vaye, sanana sa Efrayimi kala gitugulwana nya wuraru; gumogo gambe ni sanana sa Makiri, mwamana wa Manasi, avo va nga velegedwa dzikhungumudzini gwaye.

²⁴ Josefa a di embela vandriyaye, khuye: “Eni nyi ngufa; aholu Nungungulu khu lisine a na mi holelani, a na mi dusani khu tigoni momu, a mi yisa ga litigo a sambanyidego gu ninga Abrahama, Isaki ni Jakobe.”

²⁵ Josefe a di sambanyisa sanana sa Israyeli a si embela, khuye: “Khu lisine, Nungungulu avbo a na guta mi holela, mu na rwala khavba marambo yangu mu hongola navo.”

²⁶ Josefe fude nari ni tanga nya lizana ni likhumi myaga; va di sayisa girumbi gyaye va gi vega ngasani tigoni ga Egipito.