Genesi 43 - Bhibhiliya Nya Guage

Liendro nya wuvili la vandruye va Josefa tigoni ga Egipito

¹ Khu matshigu yoyo, ndzala yi di gu tshanisa tigoni.

² Na va vbedzide guhodza va ngatago nago khu Egipito, babe wawe a di va embela, khuye: “Bwelelani mu ya hi rengela guhodza.”

³ Aholu, Judha a di hakha, khuye: “Mwama wule ganede khu tshivba yaye yatshavbo, khuye:” “Gima kha mu na nga wona khovbe yangu mwa gumba wuya ni ndriyanu.”

⁴ Wa gu dzumela gukhuwe ndriyathu a hongola gumogo ni ethu, hi na bwelela hi ya gu rengela guhodza.

⁵ Aholu wa gumba mu dzumedzisa gu hongola, ethu kha hi dzi kodzi gu bwelela eyi, kholu mwama wule, a hi embede, khuye: Mu ngati wonega mahoni gwangu mwa gumbata gumogo ni ndriyanu.

⁶ Israyeli a di phindrula, khuye: “Khu ginani mu nyi giredego guvivba khu gu embelani mwama yoyo gukhenu mu na ni mumbe ndriyanu?”

⁷ Avo va di hakha, khavo: “Mwama wule a di hi wudzisela silo nya singi khu mahungu yathu ni ya valongo vathu, khuye: Babe wanu a nga gu vbanya, gani? Mu na ni mumbe ndruye, gani? Ethu hi di phindrula siwudziso saye. Ina hi di hadza gu tumba gukhethu a na, khuye: Resani ndriyanu, gani?”

⁸ Judha a di embela babe waye Israyeli, khuye: “Diga gyanana nyi hongola nagyo eni, gasi hi kodza gu bwelela; kharato hi na dzi kodza guvbanya ethu, uwe ni sanana sathu, gasi hi si mbembi.

⁹ Eni kheni nyi na khalago mukhedziseli waye. U na mu hengula avbo gwangu; nya gumba wuya naye nyi ta gu bikela nyi na dzipwa na nyi gu ghohede kala gupindruga.

¹⁰ Nari pwani khandri olu hi nga hwela ngudzu, olu nari ha gu wuya nya wuvili!”

¹¹ Babe waye, Israyeli, a di khuye gwawe: “A gu bani ari kharato, ma tshambide! Girani, kharati: Thelani somboni gwanu mihandro yile nya yadi ya tigoni gwathu mu ya ningani mwama yoyo kha nga ndruwo: Mafura, wulombe, mafura nya gunungele, dzimendrwa, mavbudzu ni dzikarusu.

¹² Pharani gambe dzitsapawu nya gubhanye guvili tengo nya guphele, ni edzi gambe mu nga dzi manago mudzisakuni gwanu, kholu nyi ngu tumba gukheni va di phazama.

¹³ Dzegani ndriyanu, mu dzi dongiselani gu bwelela gambe ga mwama yoyo.

¹⁴ Nungungulu nya Tshivba Yatshavbo a na mi gire mu mane wuhindzi ga mwama yoyo, gasi mu kodze gu wuya ni ndriyanu a tshadego, gumogo ni Bhejami. Gasi eni, gwa gu vbwetega gupwani, nyi dzegedwa sanana sangu, basi nyi na kheni ginani, nyi na dzegedwe.”

¹⁵ Avo va di dzega miningelo, va phara dzitsapawu nya tengo nya gubhanye guvili, va dzega gambe ni Bhejami. Va di bela ndzilani nya guye Egipito, na va vbohide, va di ya dzi bikela ga Josefe.

¹⁶ Avbo Josefe a wonidego Bhejami vbakari gwawe, a di embela githumi gyaye, khuye: “Embela vama vovo va bele ndrangani gwangu, ruma gu songwe gifuyo va gi dongisela kholu vama vovo va na hodza ni eni mihani yeyi.”

¹⁷ Githumi gi landrisa idzo gi nga rumwago khidzo khu Josefe, gi di bedza vama vava ndrangani ga Josefa.

¹⁸ Gikhati va va bedzidego ndrangani ga Josefa, avo va di liwuga va ganela, khavo: “Khu kotani nya dzitsapawu va nga thelago mudzisakuni gwathu, va hi resago avba; va gufela gu hi mola, va hi gira dzikhumbi, va hi wandrela dziburu dzathu.”

¹⁹ Va di hidzimela ga muthangeli nya ndranga ya Josefa, va ganela naye mwanyani nya ndranga,

²⁰ va mu wudzisa, khavo: “U na hi tsetselela pfhumu yangu! Hi dzude gambe avba khu gimbe gikhati hi ta renga guhodza.

²¹ Gu di manega gu, na hi vbohide ndrangani nya vaendri, gikhati hi tudego dzisaku dzathu, moyo ni moyo a di mana dzitsapawu dzaye ndrani nya saku yaye. Hi dzude nadzo avba,

²² gambe hi pharide dzimbe dzitsapawu, gasi guta renga gumbe guhodza. Kha hi muti khu mani a nga wuya a thela gambe dzitsapawu dzathu mudzisakuni gwathu.”

²³ Uye a di va embela, khuye: “Tangalani, mu nga thavi gilo. Nungungulu wanu, Nungungulu wa babe wanu khuye a giridego mu mana gyuma dzisakuni gwanu: “Dzitsapawu dzanu va nyi ningide eni.” Khavbo avbo, va di va resela Simiyoni.

²⁴ Muthangeli wule a di va bedza nyumbani ga Josefe; a va ninga mati va hamba mawundru; a va ninga gambe mwasi sirengo sawe.

²⁵ Na va gu lirela gu wuya Josefa ni vbakari nya mihani, avo va di dongisela miningelo gasi guta mu ninga, kholu va di embedwe gupwani va na hodza vbale.

²⁶ Avbo Josefe a bedego ndrangani, va di mu yisela miningelo va ngatago nayo, va ya noga kala vbavbatshi mbeli gwaye.

²⁷ Josefe a di va wudzisa guvbanya gwawe, a va embela, khuye: “Gu wani guvbanya ga babe wanu nya gikhosane mu nga nyi embelani limbe litshigu? A nga gu vbanya, gani?”

²⁸ Avo va di hakha, khavo: “Githumi gyago, babe wathu khwadi, a nga gu vbanya. Khavbo avbo, va di noga.”

²⁹ Josefa a di khusa maho a gu wona Bhejami ndriyaye, gyanana gya mayi waye, a di wudzisa, khuye: “Khuye oyu ndriyanu nya nandra mu nga nyi embelago, gani?” A di engedza gambe, khuye: “Nungungulu a na gu kategise, mwanangu!”

³⁰ Khavbo avbo, Josefe a di vbiredza gu duga vbavbandze, kholu a di tedwa khu marongo khu gu wona ndriyaye, a di vbweta guya lila; a di bela makhuvini gwaye aya lila.

³¹ Na vbedzide gulila a di hamba khovbe a duga. Khavbo avbo, a di zama gu dzi phara, a ganela, khuye: “Thelani guhodza.”

³² Va di dongisela malanga nya gukhale avbo va hodza, va ma hambanisa; wulanga wa Josefe, wumbe wa vandriyaye ni wumbe nya guhodzele avbo Vagipiti, kholu kha gu dzumedziswi Vagipiti gu hodza dangamwedo ni Vahebheru, gu ngu loledziswa tigoni ga Egipito.

³³ Va di khala mbeli gwa Josefe; koma gukhedza khu tanga yaye, ni nandra nuye gukhedza khu tanga yaye; vathu va di khedzisana khu gyawe va samala.

³⁴ Josefe a di ruma gukhuye va theledzedwe guhodza gu nga bani guromo mbeli gwaye; aholu Bhejami a di thedwa livbandre dzinyondro guvbindra vakwawe. Va di sela gumogo va nengela naye.