Genesi 4 - Bhibhiliya Nya Guage

Kayimi ni Abheli

¹ Adhamu a di tshangana ni mwangadzi waye Evha. Oyu a di khura mimba a gu velega Kayimi. Avbo a nga hefemulago Kayimi, Evha a di ganela, khuye: “Nyi hakhide gyanana nya gikhwathana khu giphaso gya Pfhumu Nungungulu.”

² Khu hwane, Evha a di velega gimbe gyanana nya gikhwathana, khu Abheli ndruye wa Kayimi. Abheli a di khala muhavisi, gasi Kayimi a diri mulimi.

³ Na gu vbindride matshigu, Kayimi a di ningela phaso ga Pfhumu Nungungulu, khu mihandro nya mafu.

⁴ Abheli nuye a di gira phaselo, khu matiwula nya gifuyo nya gunone gya tshambini gwaye. Pfhumu Nungungulu a di hakha gwadi Abheli a gu salalegiswa ngudzu khu ningelo waye.

⁵ Aholu kha tsaka khu ningelo wa Kayimi. Khu guralo, Kayimi a di goroga ngudzu a sivbala khovbeni khu lidiwo.

⁶ Pfhumu Nungungulu a di mu wudzisa, khuye: “Khu ginani u goroga kharato, u sivbala khovbeni?

⁷ Wa gu gira nya sadi, khu lisine u na zundzega, aholu wa gu gira guvivba, u na modwa khu gighoho kholu gyomo nyangwani gwago gi vbweta gu gu thesa. Aholu uwe guvbweta u gi pala.”

Wughevenga nya guhegule

⁸ Kayimi a di embela ndriyaye Abheli, khuye: “Hongole thembweni hi ya pepa.” “Na va vbohide thembweni, Kayimi a di wugela ndriyaye Abheli a mu songa.”

⁹ Pfhumu Nungungulu a di wudzisa Kayimi, khuye: “Womo evbini ndriyago Abheli?” Kayimi a di hakha, khuye: “Ahati! Gasi eni nyi ghadhi ya ndriyangu, gani?”

¹⁰ Pfhumu Nungungulu a di engedza, khuye: “Ginani u giridego? Wona gukhuwe novba wa ndriyago u wu vbaladzidego, wu ngu womba huwa, yi pwala gukhugela mafuni kala eno gwangu.

¹¹ Khu guralo, u na vadwa khu mafu ma hamidego ma sela khu mandzani gwago novba wa ndriyago u mu songidego.

¹² Ambari u lima kharini, mafu kha ma na gu ninga gambe gufuma mihandro khu tshivba yaye. U na penga u legalega ni litigo.”

¹³ Khavbo avbo, Kayimi a di hakha Pfhumu Nungungulu, khuye: “Nandru wangu khongolo ngudzu nyi si wu kodzigo ni gu wu rwala.

¹⁴ Wona, muhuno u ngu nyi tutumisa mafuni momu, nyi ya manega hwindzo Nago; nyi na penga nyi legalega ni litigo; ni wevbini a nyi manago a na nyi songa.”

¹⁵ Aholu, Pfhumu Nungungulu a di mu embela, khuye: “Ahihi! Kha si kodzegi isoso! Ni wevbini a na mu songago, Kayimi a na phodzedwa khu guwuyelela livbandre na guvili.” Pfhumu Nungungulu a di vega gifungo ga Kayimi gasi avo va mu manago va si mu songi.

¹⁶ Khavbo avbo, Kayimi a di khuga a gu ndreya hwindzo ni Pfhumu Nungungulu. A diya vbanyela tigoni ga Nodhi, phuvbo ga Khugadambo gwa Edheni.

Livelego la Kayimi

¹⁷ Kayimi a di tshangana ni mwangadzi waye, a khura mimba a mu velegela Enoki. Kayimi a di vbaha lidhoropa a gu li rana khu lina la mwanaye Enoki.

¹⁸ Enoki a di velega Iradi, Iradi a velega Muhuyayeli; Muhuyayeli a velega Metusayeli; Metusayeli a velega Lameki.

¹⁹ Lameki a di dzega vanyamayi vavili: Moyo nya gupwani khu Adha mumbe nya gupwani khu Zila.

²⁰ Adha a di velega Jabali, nyapandre nya lihundzu nya vathu va fuyago mitshambi na va gu vbanya mitshatshani.

²¹ Ndriyaye a di ranwa gupwani khuye Jubali, nyapandre wa vatshavbo va wombago sitendre ni sitoliyo.

²² Zila a di velega Tubhalikayimi, mupfhuli nya sombo satshavbo nya sugu ni sikete. Ndruye wa Tubhalikayimi nya nyamayi a di ranwa gupwani Nahama.

²³ Lameki a di embela vagadzi vaye Adha ni Zila khuye: “Adha ni Zila, nyi yingiseni gwadi, enu vagadzi va Lameki, upwani gwadi esi nyi mi embelago: Nyi songide muthu kholu a nga nyi bayisa, nyi songa lidzaha kholu li nga nyi gandra.

²⁴ Kayimi a gu phodzedwa khu livbandre na dzimbili dzinyondro, Lameki a na phodzedwa khu livbandre na mavili magumi dzinyondro, dzi bweledzedwago livbandre na guvili.”

Guvelegwa ga Seta, gyanana nya wuraru gya Adhamu

²⁵ Adhamu a di engedza a tshangana ni mwangadzi waye, a gu velega gyanana a nga gi riyago lina nya gupwani khu Seta, kholu Evha a di khuye: “Nungungulu a nyi ningide gimbe gyanana gasi gu tshikedza wulanga wa Abheli a nga songwago khu Kayimi.”

²⁶ Seta nuye a di velega gyanana nya gikhwathana a nga gi riyago lina nya gupwani khu Enosi. Khu gikhati gyogyo, vathu va di phela gu khozela Pfhumu Nungungulu, va mu rana khu lina laye.