Genesi 39 - Bhibhiliya Nya Guage

Mahungu ya Josefa ni ngadza Potifari

¹ Josefa a di yiswa tigoni ga Egipito. Moyo nya Mugipiti a ranwago gupwani khu Potifari, a nga bani ari muthangeli nya vaghadhi va mufumeli Faro, a di renga Josefa ga va na Ismayeli.

² Pfhumu Nungungulu a diri ni Josefa, a di mu gira a katega ga mithumo yaye tatshavbo, a gu hakhwa gwadi nyumbani ga mune waye nya Mugipiti.

³ Mune waye a di wona nya gukhuye Pfhumu Nungungulu womo ga Josefa, gambe a ngu kategisa mithumo yatshavbo ya mandzani gwaye.

⁴ Josefa a di mana wuhigo mahoni ga mune waye, a nga mu vegago kha nga gyandza gyaye; a di mu vega kha nga muthangeli nya ndranga yaye yatshavbo, a mu gira muphari nya silo saye satshavbo.

⁵ Gukhugela litshigu a nga mu vega kha nga muthangeli nya ndranga yaye ni silo saye satshavbo, Pfhumu Nungungulu a di kategisa ndranga ya Mugipiti, khu kotani ga Josefa; gikategiso gi di thapela ga silo saye satshavbo esi sa ndrangani ni esi sa marembweni.

⁶ Khavbo avbo, a di vega mandzani ga Josefa satshavbo a nga bani ari naso, a di si dzi garadzi gambe khu gimbe gilo, vbavbandze basi nya guhodze. Josefa a diri wa gumbura ni giemo nya gukhadzisege.

Josefa a ngu lingwa a modwa

⁷ Gu di girega khu hwane nya satshavbo sesi, mwangadzi wa mune waye a di wona Josefa khu monyo nya gu mu dogorele, a mu embela, khuye: “Delu hi ta lala gumogo.”

⁸ Josefa a di bomba, a mu embela, khuye: “Uwe u ngu dziti gukhuwe, mune wangu kha nyi henguli gilo ndrangani gwaye, ni gukhuwe vegide mandzani gwangu sigiro saye satshavbo.”

⁹ “Mwalo mumbe nya guvbindre eni ndrangani momu, gambe uye kha nyi himbedzeli gimbe gilo vbavbandze ga uwe basi, kholu uwe u mwangadzi waye. Nyi ngu dzi kodza kharini eni gu gira gihoso nya gikhongolo nya kharato, nyi ghohela Nungungulu, na?”

¹⁰ Ambari ulo nyamayi a nga bani a gu simama gu ganela matshigu yatshavbo, Josefa gima kha nga dzumela gu lala naye ambari gu hidzimela vbafuvbi gwaye.

¹¹ Aholu litshigu limwedo, kha nga giolovedzo gyaye, a di bela nyumbani gasi guya thuma mithumo yaye nari mwalo mumbe muthu vbafuvbi,

¹² nyamayi a di mu mola khu gifenengelo, na gukhuye: “Delu hi ta lala gumogo.” Aholu Josefa a di tshutumuga a tutuma a duga nyumbani a mu tshiya ni guambala mandzani.

¹³ Avbo nyamayi a nga wonago gukhuye Josefa tshutumugide a mu tshiya ni guambala mandzani,

¹⁴ a di womba dzihuwa a rana vathu va ndrangani, khuye: “Wonani! Mwama wangu a hi resede Muhebheru afela guta hi hembulula! A di hidzimela gwangu a vbweta gu nyi pfinya, nyi vbulugide kholu nyi nga womba dzihuwa nyi rana khu tshivba.

¹⁵ Avbo a nyi pwidego na nyi gu gulumela khu tshivba nyi lomba guphaswa, uye a di tutuma, a nyi tshiya ni guambala gwaye, a tutuma a duga vbavbandze.”

¹⁶ A di vegedza guambala gwa Josefa kala mune waye a gu wuya.

¹⁷ A di ta engedza gambe gu ganela kharato, khuye: “Khumbi yeyi nya Muhebheru u yi residego avba yi di hidzimela gwangu yi vbweta gu nyi pfinya.

¹⁸ Aholu gikhati nyi nga wombago dzihuwa, a di tutuma a duga vbavbandze a diga guambala gwaye.”

¹⁹ Mune wa Josefa, na pwide esi si nga ganedwa khu mwangadzi waye, a nga khuye: “Wona esi si giridwego khu khumbi yago,” a di goroga ngudzu.

²⁰ Mune wa Josefa a di ruma gu a modwa a khothedwa pasoni, umo si nga bani si khothedwe sibotshwa sa mufumeli. Uye a di khala pasoni.

²¹ Aholu Pfhumu Nungungulu a diri ni Josefa, a di mu gira a godwa, a mana wuhigo mahoni ga muthangeli nya lipaso.

²² Muthangeli nya lipaso a di mu vega gu khala muthangeli nya vakhedziseli nya sibotshwa satshavbo si nga bani si romo pasoni; satshavbo si nga bani si girwa pasoni si di thangedwa khu Josefa.

²³ Muthangeli nya lipaso, a di si dzi garadzi khu gu khedzisela esi si nga bani a pharisidwe Josefa, kholu Pfhumu Nungungulu a diri ni uye; Pfhumu a di gira gukhuye silo ni mithumo yatshavbo ya Josefa yi mu dugela gwadi.