Genesi 29 - Bhibhiliya Nya Guage

Jakobe a ngu manana ni Rakeli

¹ Jakobe a di simama ni liendro laye kala a vboha tigoni ga vathu va Khugadambo.

² A di khusa maho a wona nambo. Vbafuvbi ni nambo wowo gu di mbambamede mitshambi miraru nya dzinvuta, kholu namboni momo gu di sedzwa umo mati mitshambi; gu diri ni giwindri nya gikhongolo gi nga bani gi sega likana nya nambo.

³ Giwindri gi di redwa basi gikhati yi tshanganago mitshambi yatshavbo ni vahavisi vawe gasi va kodza guya sedza mati dzinvuta va bwelo khavbo va sega gambe likana nya nambo.

⁴ Jakobe a di wudzisa vahavisi, khuye: “Mwa guta khu hayini vandriyangu?” Avo va di hakha, khavo: “Ethu ha guta khu Harani.”

⁵ Jakobe a di engedza, khuye: “Mu ngu mutini Laboni mwamana wa Nahori, gani?” Avo va di hakha, khavo: “Hi ngu muti.”

⁶ Uye a di va wudzisa, khuye: “A ngari wadi uye, gani?” Avo va di hakha, khavo: “A ngari wadi. Nyamahegyane waye nya gupwani khu Rakeli khuye wule atago ni tshambi.”

⁷ Uye a di va embela, khuye: “Gu ngari mihani, gi si gu vbohi gikhati nya gu tombanise mitshambi yatshavbo. Sedzani mati dzinvuta mu bwelele nadzo mu ya dzi havisa.”

⁸ Va di mu hakha, khavo: “Ahihi. Kha hi dzi kodzi, kala yi tshangana mitshambi yatshavbo. Khavbo hi ndreyisago giwindri gi segago nambo, hi ninga mati mitshambi yi sela.”

⁹ Na nga gu bhula navo, a di vboha Rakeli ni tshambi wa babe waye, kholu a diri muhavisi.

¹⁰ Avbo Jakobe a nga wonago Rakeli nyamahegyane wa Laboni, ndruye wa mayi waye, ni dzinvuta dza kokwe waye Laboni, a diya wumbulusa giwindri gi segago likana nya nambo a gu sedza mati tshambi wa Laboni, ndruye wa mayi waye.

¹¹ Khu hwane a di losa Rakeli khu bhesu, a phela gu lila khu lito nya gukhugege ngudzu.

¹² Jakobe a di tivisa Rakeli khuye uye nongo wa babe waye, kholu gyanana gya Rebheka; Rakeli a di tutuma aya tivisa babe waye.

¹³ Avbo Laboni a ngapwago mahungu ya Jakobe, mwamana wa ndriyaye, a di tutuma a mu khinga, a mu wugarela a mu bhejari, a hongola naye ndrangani gwaye. Jakobe a di embeledzela Laboni satshavbo iso si nga dugelelago.

¹⁴ Laboni a di mu embela, khuye: “Khu lisine, uwe u novba wangu, u wa nyama yangu.” Jakobe a di khala ni Laboni tanga nya ngima rumba.

Dzegano wa Jakobe

¹⁵ Khu hwane, Laboni a di wudzisa Jakobe, khuye: “Ina u ngu yela gu nyi thumela mahala basi kholu u gu nongo wangu, gani? Nyi embele kharini u yelago gu hakha?”

¹⁶ Khu guralo, Laboni a diri ni vanyamahegyane vavili; uye nya koma a di ranwa gupwani khu Liya, uye nya nandra pwani khu Rakeli.

¹⁷ Liya a diri ni maho nya siphithu, gasi Rakeli a diri mbiri nya gukhedzege nya gumbure ngudzu.

¹⁸ Kha nga Jakobe a nga bani a gu gola ngudzu Rakeli, a di ganela, khuye: “Nyi na gu thumela livbandre na mivili myaga nyi fela gu dzega Rakeli, nyamahegyane wago nya nandra.”

¹⁹ Laboni a di hakha, khuye: “I tshukwana ngudzu gu mu ningela gwago, guvbindra gu mu ningela ga mumbe mwama; khala ndrangani gwangu.”

²⁰ Jakobe khu gufela Rakeli, thumide livbandre na mivili myaga; aholu uye a di yi wona kha nga matshigu madugwana; kholu a di gu haladza ngudzu Rakeli.

Liya ni Rakeli

²¹ Jakobe a di embela Laboni, khuye: “Nyivbe mwangadzi wangu, kholu matshigu yangu ma vbede, olu nyi ngu yela gu dzegana naye.”

²² Laboni a di ramba vathu vatshavbo va wulanga wule a gira buzo.

²³ Aholu, ni wutshigu, Laboni a di yisa mwanaye Liya ga Jakobe. Uye a di hengela lidawu naye.

²⁴ Laboni a di dzega githumi gyaye nya nyamayi nya gupwani khu Zilipa, a ninga mwanaye Liya gasi gi mu thumela.

²⁵ Ni dzimindru, gikhati Jakobe a nga wonago gukhuye gasi khu Liya a gu naye, a di embela Laboni, khuye: “Ginani esi u nyi giredego? Gasi eni kha nya gu thumela livbandre na mivili myaga khu gola Rakeli, gani? Khu ginani olu u nga nyi pemba?”

²⁶ Laboni a di hakha, khuye: “Tigoni gwathu kha hi olovedzi kharato, gu ningela nyamahegyane nya nandra a hegudza uye nya koma gu dzegwa.

²⁷ Olu vbedza semana yeyi nya buzo, hi na gu ninga gambe mumbe, u na thuma gambe yimbe livbandre na mivili myaga ndrangani gwangu.”

²⁸ Jakobe a di gira kharato. Guvbelani nya semana nya buzo, Laboni a di mu ninga mwanaye Rakeli, a khala mwangadzi waye.

²⁹ Laboni a di ningela githumi gyaye nya nyamayi nya gupwani khu Bhila gasi gu thumela mwanaye Rakeli.

³⁰ Jakobe a di hengela malawu ni Rakeli, a gu haladza ngudzu Rakeli guvbindra Liya. Jakobe a di simama gu thumela Laboni yimbe livbandre na mivili myaga.

Sanana sa Jakobe

³¹ Avbo Pfhumu Nungungulu a nga wona nya gukhuye Liya kha godwi, a di mu ninga livelego; gasi Rakeli a di khala nyamba velega.

³² Liya, a di khura mimba, a velega gikhwathana, a nga gi riyago lina la Rubheni, kholu a di khuye: “Pfhumu pwide gusaniseka gwangu, khu guralo, olu mwama wangu a na nyi haladza.”

³³ A di engedza a khura mimba, a velega gambe gikhwathana, a ganela, khuye: “Pfhumu dzitide gukhuye nyi ngu nyenywa, a nyi ningide gambe oyu”; a mu riya lina la Simiyoni.

³⁴ Liya a di engedza a khura gambe mimba, a velega gambe gikhwathana, a ganela, khuye: “Olu mwama wangu a na hungega avbo gwangu, kholu nyi mu ningide sanana siraru.” A di gi riya khuye khu Levhi.

³⁵ A engedza gambe a khura mimba, a velega gimbe gyanana nya gikhwathana; khavbo avbo, a di ganela, khuye: “Olu nyi na bonga Pfhumu Nungungulu. Khu guralo, a di gi riya lina la Judha. A hegisa, kha nga velega gambe.”