Ezira 8 - Bhibhiliya Nya Guage

Longoloko nya avo va nga wuyago ni Ezira khu Bhabhiloni

¹ Owu khu longoloko nya vathangeli nya dzinyumba dza vababe vawe, ni lihundzu lawe, ava nyi nga duga navo khu Bhabhiloni, gikhati nya mufumo wa mufumeli Aritasesi.

² Va na Fineya, gu diri, Gerisoni; va na Itamari, gu diri, Dhaniyeli; va na Dhavhidhe, gu diri Hatusi.

³ Va na Sekaniya ni va na Parosi, khu Zakariya, a sayidwego gumogo naye, longolokoni nya dzinyumba lizana ni livbandre magumi (150) vama.

⁴ Va na Pahati-Mowabhi, khu Eliyowenayi, mwamana wa Zeraya, a diri ni mazana mavili (200) vama.

⁵ Va na Sekaniya, mwamana wa Jahaziyeli, uye a diri ni mazana mararu (300) vama.

⁶ Va na Adhimi, Ebhedhi, mwamana wa Jonatane, uye a diri ni livbandre magumi vama (50).

⁷ Va na Elamo, Jesaya, mwamana wa Ataliya, uye a diri ni livbandre na mavili magumi (70) vama.

⁸ Va na Sefatiya, khu Zebhadhiya, mwamana wa Mikayeli, uye a diri ni livbandre na mararu magumi (80) vama.

⁹ Va na Jowabhi, khu Obhadhiya, mwamana wa Jeyeli, uye a diri ni mazana mavili ni likhumi na livbandre na vararu (218) vama.

¹⁰ Va na Selomiti, mwamana wa Josefiya, uye a diri ni lizana ni livbandre na limwedo magumi (160) vama.

¹¹ Va na Bhebhayi, khu Zakariya, mwamana wa Bhebhayi, uye a diri ni magumavili na livbandre na vararu vama.

¹² Va na Azigadhi, khu Jowanani, mwamana wa Hakatani, uye a diri ni lizana ni likhumi (110) vama.

¹³ Avo va nga hegisela gu khuga khu va na Adhonikamo, malina yawe a diri aya: Elifeleti, Jeyeli ni Semaya, avo va diri ni livbandre na limwedo magumi vama.

¹⁴ Va na Bhigivhayi, khu Utayi Zabhudi, avo va diri ni livbandre na mavili magumi vama.

Ezira a ngu rumela gu ya modwa va na Levhi

¹⁵ Nyi di va tombanisa vbale vbafuvbi ni tsongo wu gogago gu ya Ahavha; hi zumba vbale matshigu mararu; avbo nyi nga holelela gwadi vbakari nya vathu ni vaphasi nya mhamba, kha nya mana ni moyo wa na Levhi.

¹⁶ Khavbo avbo, nyi di rumela gu ya ranwa Eliyezeri, Uriyeli, Semaya, Elinatani, Jaribhi, ni mumbe Elinatani, Natani, Zakariya ni Mesulamo, a gu vathangeli; gumogo gambe ni Joyaribi, ni Elinatani va nga bani vari vama nya gugengele khu mapimo.

¹⁷ Nyi di va rumela ga Idho, muthangeli nya gitigwana gi ranwago gupwani Kasifiya, nyi va leletela magana va yelago gu ya embela Idho, ndriyaye ni va na Netine, avo va nga bani va vbahide tigoni ga Kasifiya, gu va hi resele vathumegeli nya guthumele Nyumbani ga Nungungulu.

¹⁸ Kha nga olu gyandza gya Nungungulu gi nga bani giri ni ethu, va di hi resela mwama moyo nya mapimo, wa na Mali, mwamana wa na Levhi, wa na Israyeli, a gu Serebhiya, ni sanana saye, gumogo ni likhumi na livbandre na vararu vandriyaye;

¹⁹ Va hi wuyede gambe ni Hasabhiya, ni Jesaya wa na Merari gumogo ni vandriyawe ni sanana sawe nya magumavili nya iso.

²⁰ Gu dzude gambe ni tengo nya mazana mavili ni magumavili (220), avo va nga ningwa thumo khu Dhavhidhe gumogo ni manganagana yaye, nya guthumele va na Levhi, vatshavbo va di hathwa khu malina yawe.

Guhala

²¹ Na hiri vbafuvbi ni tsongo wa Ahavha, nyi di emisa litshigu nya guhale gasi gu dzi sola mbeli ga Nungungulu wathu, gasi hi mu lomba gu a hi yeyedze ndzila nya yadi, ethu ni sanana sathu, gumogo ni silo sathu satshavbo.

²² Kholu eni nyi di khala dzitshoni gu lomba ga mufumeli, masotshwa ni vakhileli nya dzikavalu, gu va hi vhikele ga valala ndzilani; kholu ethu hi di ganede ga mufumeli hi mu embela, khethu: “Gyandza gya Nungungulu wathu, gyomo ga vatshavbo vale va vbwetago wuwadi; aholu tshivba yaye ni likhulo laye, sa gu dwana ni vatshavbo vale va mu pfhurarelago.”

²³ Khu guralo, hi di hala, hi lomba guphaswa khu Nungungulu wathu, uye a di yingisa milombelo yathu.

²⁴ Khavbo avbo, hi di hatha likhumi vathangeli nya vaphasi nya mhamba; Serebhiya, ni Hasabhiya, gumogo ni likhumi nya vandriyaye.

²⁵ Nyi di pima lipimo nya gulemele nya parata ni ndralama, ni mikanvu, si nga bani siri hwengo nya gu ningedwe khu mufumeli ni madhota yaye ni dzindruna dzaye gumogo ni Israyeli watshavbo va nga bani vari mule gasi gu ya gira ningelo Nyumbani ga Pfhumu Nungungulu wathu.

²⁶ Nyi di ningela mandzani gwawe livbandre na limwedo mazana ni livbandre magumi (650) dzitaleta nya parata, ni lizana dzitaleta nya mikanvu ni lizana dzitaleta nya ndralama;

²⁷ ni magumavili simbiyana nya ndralama, ni likhumi mazana (1.000) dzidrakima, ni mikanvu mivili nya sugu wu hutidwego nya gukhedzige gwadi kha nga ndralama.

²⁸ Nyi di va embela, kheni: “Enu mu phasedwe Pfhumu Nungungulu ni sombo sesi niso si agide, gumogo ni parata ni ndralama yeyi niyo yi ningedwego khu gugola ga Pfhumu Nungungulu wa vababe vanu.

²⁹ Si woneleleni gumogo ni gu si sayisa kala mu ta si vega vbagikalotunu na si gu wonwa khu vakhongolo nya vaphasi nya mhamba, ni va na Levhi, manganagana nya dzinyumba dza vababe va na Israyeli dhoropani ga Jerusalema, umo dzi sayisegago umo Nyumbani ga Pfhumu Nungungulu.”

³⁰ Khavbo avbo, vaphasi nya mhamba ni va na Levhi va di hakha pimo nya parata ni ndralama, gumogo ni mikanvu yakone, gasi va si yisa Jerusalema, Nyumbani ga Nungungulu wathu.

³¹ Hi khugide khu tsongoni wa Ahavha, khu litshigu nya livbandre na mavili nya ngima nya guphele, hi thonona Jerusalema; gyandza nya tshivba gya Pfhumu Nungungulu wathu, gi diri ga ethu, uye a hi vbulugiside ga valala vathu, ni ga avo va nga bani va hi siyamela khu gu hi riyela milaphwi.

³² Na hi vbohide Jerusalema hi khade hi dagata matshigu mararu.

³³ Khu litshigu nya wu na, hi diya pima pimo nya parata ni ndralama ni simbe sombo si ningedwa ga Meremothi, mwamana wa Uriya, muphasi nya mhamba, a si vega Nyumbani ga Nungungulu wathu. A diromo nuye Eliyazari, mwamana wa Fineya, gumogo ni Jozabhadhi, mwamana wa Jesuwa, ni Nohadhiya mwamana wa Bhinuwi, Mulevhi.

³⁴ Satshavbo si di saywa ni gu pimwa. Tengo wakone wu di dzegela gu lowa khu gikhati gyogyo gya gimwegyo.

³⁵ Avo va nga wuyago khu wugumbitunu, vathu va nga velegedwa wugumbitunu, va di ningela miningelo nya guvbiswe ga Nungungulu wa na Israyeli, livbandre na mana magumi ni livbandre na mweyo (96) dzihamba, livbandre na mavili magumi ni livbandre na dzimbili (77) dzinvutana ni likhumi na vavili vanyamabhongwe, gasi gu gira mhamba nya ditshedzo, satshavbo si vbisedwa Pfhumu Nungungulu.

³⁶ Va di hevbula khwepa wa mufumeli ga dzindruna ni ga vamwamangulu, va khisikheyi nya tsongo, khavbo avbo, avo va di vhikela vathu gumogo ni Nyumba ya Pfhumu Nungungulu.