Ezira 10 - Bhibhiliya Nya Guage

Va na Israyeli va ngu dzi laya va tutumisa vanyamayi nya Vahiti

¹ Avbo Ezira a nga bani a lombelela ni gu gira dawulelo na gu lila na nogide mbeli nya Nyumba ya Nungungulu, gu dita tombana gwaye tshangano nya wungi wa na Israyeli, nya vama, vanyamayi ni sanana; kholu vathu va di gu lila khu wuvi nya wukhongolo ngudzu.

² Khavbo avbo, Sekaniya, mwamana wa Jeyeli, moyo nya sanana sa Elamo, a di embela Ezira, khuye: “Ethu hi ghohede Nungungulu wathu khu gu dzega vanyamayi nya mambe mafumbu nya mayigo yaya, ambari khu kharato gu nga guromo gutumba ga va na Israyeli.

³ Khu guralo, olu hongoleni hi gira gidzumeledzwano ni Nungungulu wathu, gukhethu hi na tutumisa vanyamayi vatshavbo gumogo ni sanana si velegidwego khavo, kha nga gulaya ga Pfhumu, ni avo va ningago githawo khu sirumo sa Nungungulu wathu; esi si fanedego gu girwa khu gu landra nayo.

⁴ Khuga u eme, kholu, oyu i thumo wago, ethu hi womo nago, tiya longo u gira kharato.”

⁵ Khavbo avbo, Ezira a di khuga a ema, a sambanyisa vathangeli nya vaphasi nya mhamba, ni va na Levhi ni vatshavbo va na Israyeli, gukhavo va na gira isoso. Avo va di sambanya.

⁶ Ezira a di khuga khu mbeli nya Nyumba ya Nungungulu, a bela makhuvini ya Jowanani, mwamana wa Eliyasibhi, aya khala umo nyamba hodza guhodza ni gu sela mati, uye a di gu lila khu mahungu nya sighoho si nga girwago khu avo va widego khu wugumbitunu.

⁷ Gu di vegwa nayo nya gu huweledwe tigoni gwatshavbo ga Judha ni Jerusalema ni ga vatshavbo va nga wuyago khu wugumbitunu, gasi vata tshangana Jerusalema;

⁸ gupwani wule ndrani nya matshigu mararu a na gumba ta dzi wonegisa, mayelano ni sileletelo nya vathangeli ni madhota a na dzegedwa silo saye satshavbo, uye wurumba waye a na duswa vbakari nya ava va nga wuyago khu wugumbitunu.

⁹ Khavbo avbo, vama vatshavbo va na Judha ni va na Bhejami va di tombana Jerusalema khu matshigu mararu; a diri ngima nya livbandre na wu na khu litshigu nya magumavili, vathu vatshavbo va dita mbambamela tandrelani nya Nyumba ya Nungungulu, na va gu ndrendremela khu kotani nya mahungu yaya ni kotani nya ndzadzi yi nga bani yi guwa khu tshivba.

¹⁰ Khavbo avbo, Ezira, muphasi nya mhamba a di khuga a va embela, khuye: “Enu mu ghohide khu gu dzegana ni vanyamayi nya mambe mayigo, mu engedzela kharati gighoho gya Israyeli.

¹¹ Khu guralo, olu, dzi layeni mu dawulela ga Pfhumu Nungungulu wa vababe vanu, mu gira gugola gwaye mu dzi hambanisani ni vathu va mambe mayigo, ni ga vanyamayi va mambe mayigo mu dzeganidego navo.”

¹² Tshangano watshavbo wu di hakha khu malito ma khusegidego, khuwo: “Hi fanede gu gira kha nga idzo u ganedego khidzo;

¹³ aholu vathu vangi ngudzu, ni gu gambe yi nguwa ndzadzi nya yingi, khu guralo, kha hi dzi kodzi gu simama gu khala vbavbandze vbavba; gu diga nya isoso, nuwo thumo wowu, khandri wa litshigu limwedo mwendro matshigu mavili; kholu ethu hi giridego gighoho gegi hi vangi ngudzu.

¹⁴ Manganagana yathu, ma na thangele tshangano watshavbo khu mahungu yaya, gasi vatshavbo va madhoropani gwathu avo va nga dzeganago ni vanyamayi va mambe mayigo, vata avbo gwawe khu gikhati gi emisedwego, gumogo ni madhota nya lidhoropa ni lidhoropa, ni valamuli vawe, kala hi ndreyisa vbakari gwathu gukhondra nya likhulo la Nungungulu wathu, khu kotani nya mahungu yaya.”

¹⁵ Aholu Jonatane, mwamana wa Asayeli, ni Jazeya, mwamana wa Tikivha, khavo venga va nga kanyisa mahungu yaya; va seketedwa khu Mesulamo, ni Sabhetayi Mulevhi.

¹⁶ Khu guralo, avo va widego khu wugumbitunu va di gira idzo gu ganedwego khidzo; khavbo avbo, Ezira, muphasi nya mhamba, a di emisa khu malina vathangeli nya dzinyumba dza vababe vawe; vatshavbo va di tshangana khu ngima nya guhegule nya mwaga nya likhumi gasi guta wona mahungu yaya.

¹⁷ Khu litshigu nya guhegule nya ngima nya guphele, va di wonana ni vama vatshavbo va nga dzeganago ni vanyamayi va mambe mayigo.

¹⁸ Gu di manega nugo vbakari ga sanana sa vaphasi nya mhamba avo va nga bani va dzeganide ni vanyamayi va mambe mayigo, a gu ava: Vbakari ga sanana sa Jesuwa, mwamana wa Jozadhaki, gumogo ni vandriyaye, ni Maseya, Eliyezeri, Jaribhi ni Gedhaliya.

¹⁹ Va di pharana mawogo, va sambanya, gukhavo va na tutumisa vagadzi vawe, kholu va diri ni nandru; va di gira phaso khu nvuta ya tshambini gwawe khu kotani nya gighoho gegi.

²⁰ Ga sanana sa Imeri, khava: Hanani ni Zebhadhiya.

²¹ Ga sanana sa Harimi, khava: Maseya, Eliya, Semaya, Jeyeli ni Uziya.

²² Ga sanana sa Pasuri, khava: Eliyowenayi, Maseya, Ismayeli, Natanayeli, Jozabhadhi ni Elasa.

²³ Ga va na Levhi, khava: Jozabhadhi ni Simaya, Kelaya (a gu Mukheleti), Petaya, Judha ni Eliyezeri;

²⁴ ni vbakari nya vaembeleli, a gu Eliyasibhi, ni vaemeledzi nya dzinyangwa, Salumi, Telemi ni Uri.

²⁵ Ga na Israyeli, ga sanana sa Parosi, khava: Ramiya, Jeziya, Malikiya ni Bhenaya.

²⁶ Ga sanana sa Elamo, khava: Mataniya, Zakariya, Jeyeli, Abhidhi, Jerimoti ni Eliya.

²⁷ Ga sanana sa Zatu, khava: Eliyowenayi, Eliyasibhi, Mataniya, Jerimoti, Zabhadi ni Aziza.

²⁸ Ga sanana sa Bhebhayi, khava: Jowanani, Hananiya, Zabhayi ni Atilayi.

²⁹ Ga sanana sa Bhani, khava: Mesulamo, Maluki, Adhaya, Jasubi, Seyali ni Jerimoti.

³⁰ Ga sanana sa Pahati-Mowabhi, khava: Adhina, Khelali, Bhenaya, Mahaseya, Mataniya, Bhezaleli, Bhinuwi ni Manasi.

³¹ Ga sanana sa Harimi, khava: Eliyezeri, Isiya, Malikiya, Semaya ni Simiyoni.

³² Bhejami, Maluki ni Semariya.

³³ Ga sanana sa Hasumi, khava: Matenayi, Matata, Zabhadi, Elifeleti, Jeremayi, Manasi ni Simeyi.

³⁴ Ga sanana sa Bhani, khava: Mahadhayi, Aniramo, Weli,

³⁵ Bhenaya, Bhedhiya, Kheluyi,

³⁶ Vhaniya, Meremoti, Eliyasibhi.

³⁷ Mataniya, Matenayi, Jahasayi,

³⁸ Bhani, Bhinuwi, ni Simeyi,

³⁹ Selemiya, Natani ni Adhaya,

⁴⁰ Makinadibhayi, Sasayi, Sarayi,

⁴¹ Azareyeli, Selemiya, Semariya,

⁴² Salumi, Amariya ni Josefe.

⁴³ Ga sanana sa Nebhu, khava: Jeyeli, Matatiya, Zabhadi, Zebhina, Jodhayi, Joweli ni Bhenaya.

⁴⁴ Vathu vatshavbo vava, va di dzegide vanyamayi va nya mayigo; vambe nya avo va di velegide sanana navo vanyamayi vovo. Avo va di va tutumisa gumogo ni sanana sawe.