Ezekiyeli 6 - Bhibhiliya Nya Guage

Wuprofeti khu vanungungulu nya malipha va Israyeli

¹ Pfhumu Nungungulu a di nyi embela, khuye:

² Mwamana wa muthu, khedza sigomoni sa Israyeli; u va profeta

³ u va embela, khuwe: Enu sigomo sa Israyeli, upwani magana ya Pfhumu Nungungulu, a ngu ganela kharati ga enu sigomo, sigomwana, mitsongo ni mikova, khuye: Nyi womo vbafuvbi ni gu resa dzinyimbi dzi ta mi saselago; nyi na khungumula siluvelo sa vanungungulu vanu nya malipha.

⁴ Siluvelo sanu niso si na khungumudwa, niso nya mabani yanu si na khungumudwa, ni sifananiso sanu nya lidambo si na pandreledwa; nyi na songa vathu vaye mbeli nya sifananiso sawe.

⁵ Nyi na vega sirumbi sa va na Israyeli mbeli nya sifananiso sawe, nyi phalalegisa marambo yawe bambe nya siluvelo sawe.

⁶ Ni evbini mu na ya vbahago umo, madhoropa ma na khungumudwa, ni siluvelo nya wuhedheni si na pandreledwa si khala marumbi, ni siluvelo sawe nya libani si na khungumudwa ni yatshavbo mithumo ya mandza yanu yi na fuviswa.

⁷ Vathu vaye va na thega khu gu songwa mbeli gwanu, gasi mu kodza gu dziti gukhenu, eni kheni Pfhumu Nungungulu.

⁸ Aholu nyi na tshiya vadugwana; vambe vanu va na vbuluga gu songwa gasi va kodza guphalalegiswa va yiswa ga mambe mayigo.

⁹ Mayigoni momo mu na vbagedwago mu ya umo, vale va na vbulugago gu songwa va na nyi alakanya mayigoni mule va na yiswago umo guya girwa dzikhumbi; kholu va nyi swihadzide khu kota nya myonyo yawe nya wuphuphulu va hambana ni eni, maho yawe ma dogorela sifananiso sa vanungungulu vawe nya malipha; khu guhegisani, va na dzi laya vabune kamwe khu kotani nya mithumo yawe yatshavbo nya guvivbe va giridego.

¹⁰ Va na dziti gukhavo, eni kheni Pfhumu Nungungulu, kha nya va tivisa mahala gukheni nyi na va resela libango leli.

¹¹ Mune, Pfhumu Nungungulu a ngu ganela kharati, khuye: “Khwakhwata mandza, u kinga vbavbatshi khu migondro, u huwata, khuwe: Libango! Khu kotani nya manyala ni guvivba gwatshavbo va na Israyeli va giridego! Kholu va na songetedwa khu matshari, khu ndzala ni mitungu.

¹² Uye a guromo hwindzo a nafa khu tungu, uye a guromo vbafuvbi a nafa khu litshari, uye a na tshalago a nafa khu ndzala. Kharato, nyi na rumela likhulo langu avbo gwawe.

¹³ Va na nyiti gukhavo kheni Pfhumu Nungungulu, gikhati sirumbi sa vathu vawe si na gu mbambamelago vbakari nya sifananiso sawe, ni bambe nya siluvelo sawe, ni musigigomoni gwatshavbo ni dzitshokhani gwatshavbo nya sigigomwana, vbavbatshi nya misimbo yatshavbo nya gunyuge, ni ga miguhu yatshavbo nya guaname, ni malangani yatshavbo va nga bani va gu vbisela umo libani sifananiso sawe nya vanungungulu.

¹⁴ Nyi na thawuludza libogo langu vbatshani gwawe, nyi pfhungumula litigo lawe gukhugela giwulani gya Marandzi, kala dhoropani ga Ribila, phuvbo ga Wuronga, nyamba tshiya ni wulanga wumowo nya umo va vbanyago umo va na Israyeli; gikhati gyogyo va na dziti gukhavo kheni Pfhumu Nungungulu.”