Ezekiyeli 38 - Bhibhiliya Nya Guage

Giprofeto ga Gogi nala wa Israyeli

¹ Pfhumu Nungungulu a di nyi embela, khuye:

² Mwamana wa muthu, thendregedza khovbe yago u khedza Gogi, givelegwa gya tigoni ga Magogi, mufumeli wa Rosi, wa Meseki ni Tubhali; mu profete

³ u mu embela, khuwe: Mune Pfhumu Nungungulu, a ngu ganela kharati, khuye: Nyi na gu wugela, uwe Gogi, mufumeli wa Rosi, wa Meseki ni Tubhali.

⁴ Nyi na gu dzundrulugisela, nyi thela silowo kanani gwago, nyi gu ndrindra gumogo ni libutho lago latshavbo, ni dzikavalu ni vakhileli nya dzikavalu, vatshavbo na vapharide matshari nya guenele, ni gidzemo nya gikhongolo, na gi pharide sitshangu nya sikhongolo niso nya sidugwana, vatshavbo na va pharide matshari yawe;

⁵ Vaperesi ni Vaetiyopi ni Vaputi, vomo gumogo navo, vatshavbo na vari ni sitshangu ni sihugu nya sikete;

⁶ A na duga gumogo ni masotshwa yatshavbo ya Ghomeri ni ya Bheti-Togarima; a gu vathu va khalago phuvbo ga Wuronga, gumogo ni mayigo nya mangi, ma nata ema nago, gasi gu engedzela libutho nya vathu vago.

⁷ Dzi dongisele, u khala nu dongide, uwe gumogo ni gidzemo gyatshavbo gi nga ta dzi patanisa gwago, khala muthangeli wawe.

⁸ Hwane nya matshigu nya mangi, u na ranwa; avbo gu na vbindrago myaga nya yingi, uwe u na ta dwana ni litigo li tshudzisidwego khu matshari, li patidwego khu mayigo nya mangi, vbatshani nya sigomo sa Israyeli, gikhati gyatshavbo si nga bani si khade marumbi; vathu vava, va dusidwe khu ga mayigo nya guhambanelane, gasi vatshavbo va vbanya umo khu gurula.

⁹ Khu guralo, uwe ni masotshwa yago yatshavbo, ni mayigo nya mangi mu na va dhumelani kha nga gingulu, u na gira kha nga lipfhi li fenengedzago litigo.

¹⁰ Mune Pfhumu Nungungulu, a ngu ganela kharati, khuye: Ga litshigu lolo, u na pimisa silo nya gutale monyoni gwago, bwelo khavbo u luga makungo nya guvivbe.

¹¹ U na ganela, khuwe: Nyi naya dhumela litigo li gu ni mitalala nyamba bhiywa, nyi dwanisa vathu nya gurule va si dileligo gilo, va vbanyago madhoropani nyambana mabhiyo, nyambana malimba ambari sikwinyaro.

¹² Gasi u kodza gu liphanga, u thawuludza gyandza ga marumbi olu va vbahidego vathu va nga wuyiswago khu mayigoni va nga bani va vbagedwe umo, li gu ni mitshambi nya yingi ni dzithomba, va vbanyago khu vbakari ni vbakari nya litigo.

¹³ Sabha ni Dhedhani, ni va nya wugwewo va Tarisisi gumogo ni vamwamangulu vaye vatshavbo, mwendro dzinghala dzaye dzi na gu wudzisa khidzo: Uwe wa guta guta phanga thomba yathu, gani? U tombaniside masotshwa yago gasi guta phanga, parata ni ndralama, u dzega mitshambi ni gu wandra dzithomba dzathu, gani?

Gogi a na dhumela Israyeli

¹⁴ Khu guralo, uwe mwamana wa muthu, profeta u embela Goge, khuwe: Mune Pfhumu Nungungulu, a ngu ganela kharati, khuye: Ga litshigu lolo, gikhati vathu vangu va na Israyeli va na khalago gurulani, ina uwe khu na si wona isoso, gani?

¹⁵ Khu guralo, u nata khu wulangani gwago, khu phuvbo ga Wuronga, uwe gumogo ni mayigo nya mangi, mwatshavbo na mu khilede dzikavalu, gidzemo nya gikhongolo ni masotshwa nya mangi;

¹⁶ U na hongola u ya sasela vathu vangu va na Israyeli, kha nga lipfhi li fenengedzago litigo. Khu matshigu nya guhegise nyi na gu rumela guya dhumela litigo langu, gasi mayigo ma nyiti, gikhati nyi na gu dzi agisago khavbo gwago, uwe Gogi.

¹⁷ Mune Pfhumu Nungungulu, a ngu ganela kharati, khuye: Ina khandri uwe nyi ganedego khuwe ga matshigu ma vbindridego, khu kanani ga sithumi sangu, vaprofeti va Israyeli, gani? Gukhugela myaga yi vbindridego vaprofetide, gukhavo eni nyi na gu rumela guya dhumela Israyeli.

¹⁸ Isoso si na girega ga litshigu lolo, avbo Gogi a na tago ata dhumela litigo la Israyeli, nyi na mu gorogela ngudzu, a ngu ganela Mune Pfhumu Nungungulu.

¹⁹ Khu guralo, khu ligolo langu ni likhulo langu nya likhongolo, nyi ngu ganela gukheni, ga litshigu lile, li na kutsungwa khu tshivba ni tshivba litigo la Israyeli.

²⁰ Dzindzandzi dza phwani, sinyoni sa damboni, ni sirengo sa khabini, gumogo ni sirengo satshavbo nya gukhwirire khu lididi mafuni, ni vathu vatshavbo va guromo tigoni, va na ndrendremela mbeli gwangu; sigomo si na theswa vbavbatshi ni siwindri si na khungumudwa, ni mabhiyo yatshavbo ma na thega.

²¹ Gogi nyi mu na mu ranela dzinyimbi khu musigomoni gwangu gwatshavbo, a ngu ganela Mune Pfhumu Nungungulu; litshari la moyo ni moyo li na sasela ndriyaye.

²² Nyi na dwana naye khu tungu ni gu vbalaga nya novba; nyi wisa ndzadzi nya yingi nya ndrambi, ni siwindri nya sikhongolo nya maralala, ni lidhingiso nya nilo, si na thega vbatshani gwaye ni ga masotshwa yaye, ni ga mayigo nya mangi a na gu bani nari navo.

²³ Khu magirelo yoyo, eni nyi na yeyedza wugulu ni gu aga gwangu, nyi na tidwa mahoni ga va nya mayigo; havbo mu na nyitigo gukhenu Eni kheni Pfhumu Nungungulu.”