Ezekiyeli 17 - Bhibhiliya Nya Guage

Gifananiso nya maghama mavili ni uvha

¹ Pfhumu Nungungulu a di nyi embela, khuye:

² Mwamana wa muthu, gira gipimaniso u pimanisa u ganela khu ndranga ya Israyeli.

³ Va embele, khuwe: Mune Pfhumu Nungungulu a ngu ganela kharati, khuye: Lighama limwedo nya likhongolo, na liri ni mambapi nya tshivba, mitenga nya gulaphe ni givili nya gikhongolo, na gi taledwe khu mitenga nya mavalavala, li vbohide kala gigomoni gya Libhanoni li ya fanya litamo la tshokatunu nya simbo nya sedhari.

⁴ Li di dzega litamo leli nya tshoka ya vbatshani ngudzu, li li yisa tigoni la va nya wugwewo, li ya li yala dhoropani nya varengisi.

⁵ Khu hwane li di rola dzimbewu dzidugwana dza tigoni gwaye, li dzi yala mafuni nya gunone. Li di li yala kha nga giphuthu vbafuvbi ni mati nya mangi.

⁶ Ilo li di thunga li khala uvha nya gunave, matamo yaye ma di nogela iyo gu khadego lighama, litshina lakone li di rode, matamo yaye ma navela gukhedza lighama, aholu mikhamba yaye, mi di simama vbavbatshi nya uvha. Uvha wu di dandra wu dzi fenengedza khu matamo, mathungedwa ni mahagane.

⁷ Aholu gu diromo gambe limbe lighama nya likhongolo, na liri ni mambapi nya makhongolo, na liri ni mitenga nya yingi. Uvha wu di nava, mikhamba yaye ni matamo yaye, ma navela ga lighama lolo, gukhugela vbawulangatunu wu yadwego avbo, gasi wu ya mana mati.

⁸ Khu guralo, uwo wu di yadwe umo nya mafu nya yadi, vbafuvbi ni mati nya mangi, gasi gu ninga matamo ni guvelega mihandro, gumogo ni gu khala uvha nya gunyeluge.

⁹ Va embele, khuwe: Mune Pfhumu Nungungulu a ngu wudzisa kharati, khuye: “Ina uwo wu na andra, gani? Ina lighama kha la kula mikhamba yaye ni gu pila mihandro yaye, gasi wu bange, gani? Ni mahagane nya mathungedwa yaye ma na banga; khandri khu libogo nya tshivba ambari khu vathu nya vangi, va na wu kulago ni mikhamba yaye.

¹⁰ Ambari wu yadwego gale, ina wu na dandra, gani? Kha wu na banga wa gu furugedzwa khu phuvbo ya Khugadambo, wu wu na, wu mwalalega ga wulanga wu nga bani wu yadwe avbo, gani?”

¹¹ Khu hwane, Pfhumu Nungungulu a di nyi embela, khuye:

¹² Embela vathu vovo nya gu kanyise, khuwe. Ina kha mu yiti tshamuselo nya silo sesi, gani? Va embele, khuwe: Mufumeli wa Bhabhiloni dzude Jerusalema, ata mola mufumeli ni dzindruna dzaye, a va dzega a hongola navo Bhabhiloni.

¹³ Hwane nya ugo, a di dzega moyo nya gyanana gya mufumeli a gira nagyo gidzumeledzwano, a mu gurumedza gu gira gisambanyo. A gu dzega gambe vathangeli va tigoni mule,

¹⁴ gasi gu thesa vbavbatshi mufumo, wu si khusegi gambe wu andra, aholu wu ema khu gu landra gidzumeledzwano a giridego.

¹⁵ Aholu mufumeli a di mu wugela, ni gu rumela myango tigoni ga Egipito, guya lomba dzikavalu ni libutho nya likhongolo nya masotshwa. Ina muthu a girago silo nya nga isoso a na andra mwendro guvbuluga, gani? A gu fanya pwanano a na vbuluga kharato, gani?

¹⁶ Nyi ngu sambanya khu guvbanya gwangu, a ngu ganela Mune Pfhumu Nungungulu, khu lisine a naya fela tigoni ga Bhabhiloni, a gu tigoni ga mufumeli a mu emisidego vbagikhalotunu nya wufumu, uye a yeyisidego gisambanyo a fanya gidzumeledzwano.

¹⁷ Ambari Faro, gumogo ni libutho laye nya likhongolo nya masotshwa nya tshivba, uye gima kha na nga kodza gu mu phasedzela umo nya nyimbi, avbo va na guvbaha mabhiyo ni makhokhola, gasi gu songetela vathu nya vangi.

¹⁸ Kha nga olu uye a yeyisidego gisambanyo, a fanya gidzumeledzwano gi giridwego khu gu pharana mandza, a gira silo satshavbo sesi, kha na vbuluga ne vbadugwana.

¹⁹ Khu guralo, Mune, Pfhumu Nungungulu a ngu ganela kharati, khuye: Nyi ngu sambanya khu guvbanya gwangu, kheni: Kha nga a yeyisidego ni gu pila gidzumeledzwano gyangu, esi nyi na mu bweledzela hungoni gwaye.

²⁰ Nyi na ghwimba vbatshani gwaye ligoga langu, a na modwa khu lizinga langu. Nyi na mu yisa Bhabhiloni, nyi ya mu lamulela iyo khu guyeyisa a gu giridego avbo gwangu.

²¹ Vathu vaye vatshavbo va na gu thavago, gumogo ni masotshwa yaye yatshavbo, va na songwa khu matshari, avo va na tshalago va na phalalegiswa khu maphuvbo yatshavbo. Khavbo mu na dzitigo gukhenu eni Pfhumu Nungungulu, nyi ganede.

Nungungulu a wusedza litigo laye

²² Mune Pfhumu Nungungulu a ngu ganela kharati, khuye: Eni mune kamwe, nyi na fanya litamo la vbatshani ngudzu nya simbo nya sedhari, nyi li yala; nyi na fanya lithungedwa nya nyenvu nya matamo ya vbatshani ngudzu, nyi ya li yala vbatshani nya gigomo nya gulaphe ngudzu.

²³ Nyi na li yala vbatshani nya gigomo nya gulaphe gya Israyeli. Li na thunga matamo, li ninga mihandro ni gu khala sedhari nya dandrangulu. Umo sinyoni nya singi nya mafumbo yatshavbo ya mafuni si na gu khalago mutsani gwaye, ni guvbaha sihaga sawe matamoni gwaye.

²⁴ Misimbo yatshavbo ya khabini yi na nyiti gukhiyo kheni Pfhumu Nungungulu, nyi na thesa simbo nya gulaphe ngudzu, nyi dandrisa ngudzu simbo nya gurole. Nyi ngu bangisa simbo nya gunyuge, nyi thela senge ga simbo nya gubange. Eni Pfhumu Nungungulu nyi ganede, gambe nyi na si thuma.