Ezekiyeli 16 - Bhibhiliya Nya Guage

Jerusalema lidhoropa nyamba tumbega

¹ Pfhumu Nungungulu a di nyi embela, khuye:

² Mwamana wa muthu, nonedza Jerusalema mithumo yaye nya gunyenyeze;

³ u mu embela, khuwe: Mune Pfhumu Nungungulu a ngu ganela kharati, khuye: U tumbulugide ni gu velegwa tigoni ga vakhanani; babe wago a diri Muamori, ni mayi wago a diri Muhiti.

⁴ Guvelegwa gwago gu giregide, kharati: Ga litshigu u velegidwego, lirugu lago kha la pidwa, uwe khwa handzwa khu mati gasi gu agiswa, khwa gwiringedwa munyu mwendro gufumbedwa khu myendra.

⁵ Mwalo ni moyo a nga gu khedza a gu pwela gisiro mwendro gu mana gu gira gilo nya gukari khu gu gupwela wusiwana. Aholu ga litshigu u velegidwego, va di gu dzudzuga khabini, kholu va di gu nyenya.

⁶ Khavbo avbo, nyi di vbindra khavbo u nga bani u romo, nyi gu wona gukheni u phorode ngudzu khu novba wago, nyi gu embela, kheni: Ambari u gu novbani gwago vbanya. Nyi engedza gambe, kheni: Ambari u gu novbani gwago vbanya.

⁷ Eni nyi di gu dandrisa kha nga pfhundre wa thembweni. U di dandra u andra, u khala mbiri nya gumbure ngudzu, mavele yago ma di ema, ni ndzudzu wago wu di dandra; aholu uwe khwa nga ambala gilo, u diri wumbwiri.

⁸ Khu hwane nya ugo, nyi di vbindra khu vbafuvbi gwago, nyi di gu khedza nyi gu wona gukheni u diri ni tanga nya guenele gu liti lihaladzo; khavbo avbo, nyi di thawuludza gifenengelo, nyi fenengedza wumbwiri wago. Nyi di gira gisambanyo ni gu hunga gidzumeledzwano nago gasi gu gu dzega; a ngu ganela Mune Pfhumu Nungungulu.

⁹ Khavbo avbo, nyi di gu ninga mati nya guhambe, nyi gu handza novba u nga bani uri nawo ni gu gu todza mafura nya gunungele.

¹⁰ Nyi di gu ambagisa guambala nya mavalavala, ni silato nya lidowo, nyi gu ambagisa guambala nya guage, ni gu gu fenengedza myendra nya seda.

¹¹ Nyi gu mburisede; nyi gu ambagisa maniya mawogoni gwago, ni gu gu ambagisa karara thamoni;

¹² nyi gu thede phera vbathonvutunu, nyi gu thela dziphera dzindzeveni gwago, nyi gu ambagisa gihugu nya gumbure ngudzu hungoni gwago.

¹³ Khu guralo, nyi gu mburisede khu ndralama ni parata; guambala gwago a diri nya guage, nya seda ni mavalavala. Guhodza gwago, a diri wuguvbi nya gudadatwe, wulombe ni mafura nya guhutwe. U di engedzelana gumbura u gu godza makhalelo ya pfhumugadzi.

¹⁴ Ndruma nya wumburi wago, yi di phalalega vbakari nya mayigo, kholu gungangamela nyi gu ningidego gu giride gu, wumburi wago, wu khala nya lisima; a ngu ganela Mune Pfhumu Nungungulu.

¹⁵ Aholu uwe u di dzega ndruma nya wumburi wago, u dzi gira liphuphulu, u di gu bhaya ni vavbindri vatshavbo nya ndzila, va khala vago.

¹⁶ U dzegide guambala gwago u khozela khugo malanga nya vanungungulu nya malipha, avbo u nga yisa mbeli thumo wago nya wuphuphulu. Silo nya nga isoso si nga bani si si vbwetegigo gu girega, gambe si nga tshuki si girega.

¹⁷ U dzegide simburiselo nyi gu ningidego, si giridwego khu ndralama ni parata yangu, u dzi girela khiso sifananiso nya vama u bhaya naso.

¹⁸ U dzegide gambe guambala gwago nya mavalavala, u fenengedza khugo sithombe soso, u dzega mafura ni libani nyi nga gu ningago, u si girela miningelo.

¹⁹ Guhodza nyi gu ningidego, wuguvbi nya gudadatwe, mafura nya guhutwe, gumogo ni wulombe, u giride khiso phaso nya mahema nya gunungele gwadi gasi gu salalegisa sithombe soso; a ngu ganela Mune Pfhumu Nungungulu.

²⁰ Gu diga isoso, u dzegide ambari ni sanana sago nya sikhwathana ni sagadzyana u nyi velegedego, u gira khiso miphaso, gasi si hodzwa khu sithombe soso. Ina khu guralo, wuphuphulu wago wu dugwana, gani?

²¹ U songetede sanana sangu, u si vbisa niloni, u gira ningelo ga sifananiso.

²² Ga mithumo yago yatshavbo, ni wuphuphulu wago, khwa alakanya matshiguni nya wanana wago, gikhati u nga bani uri wumbwiri nu phorode khu novba wago.

Jerusalema a gu fanana ni liphuphulu

²³ Khu hwane nya gugire guvivba gwatshavbo gogu, Libango! Libango lago! A ngu ganela Mune Pfhumu Nungungulu,

²⁴ u dzi vbahede nyumba nya gukhozele umo sifananiso ni malanga nya miphaso nya wuphuphulu ya musigomoni ni dzindzilani gwatshavbo.

²⁵ Mahandzakanyani gwatshavbo nya dzindzila u vbahide malanga nya miphaso nya gunyenyeze, u gu nyenyezisa wumburi wago, khu gu ningela mili wago ga vatshavbo vavbindri nya ndzila, u dandrisa kharato wubhayi wago.

²⁶ U giride wubhayi ni vaakelane vago Vagipiti, vathu nya sivbango nya gugule, u engedzela wuphuphulu wago, gasi gu wusa likhulo langu.

²⁷ Eni khu kotani nya kharato, nyi di thawuludza libogo langu vbatshani gwago, nyi vbungula litigo lago; nyi li ningela mandzani ga valala vago, vanyamahegyane va Vafilisitiya, avo va nga bani vari ni dzitshoni khu mavbanyelo yago nya gunyenyeze.

²⁸ U bhayide gambe ni Vaasiriya, kholu u di si kodwi, kholu ambari nu dzi ningede wubhayini si di si gu eneleli.

²⁹ Matshigu hwane, u engedzede wuphuphulu wago khu gu bhaya ni vathu va tigoni ga Khanani kala Kalidhiya, a gu vathu nya mabhindzu, ambari khu kharato, khwa nga kodwa.

³⁰ Mune Pfhumu Nungungulu, wari khuye, u nyi goroside ngudzu khu gu gira silo satshavbo nya nga esi, u vbanya gukhwatshi u liphuphulu nya guvbelele.

³¹ Avbo u nga bani u vbaha nyumba yago nya wubhayi mahandzakanyani gwatshavbo nya dzindzila, ni gu vega miphaso nya gunyenyeze mitandralani gwatshavbo, ina uwe khandri u di dzi gira nga maphuphulu ma gimbilago ma vbweta dzitsapawu, gani?

³² U khade kha nga nyamayi nya gibhayi, a hakhago mumbe mwama gu diga mwama waye.

³³ Maphuphulu yatshavbo ma gu vbweta dzitsapawu, aholu uwe wa gu ninga siningwa sibhayi sago satshavbo, u va pfuvela gasi vate gwago khu maphuvbo yatshavbo va ta bhaya nago.

³⁴ Wubhayi wago wu ngu hambana ni esi si giregago ga vanyamayi vakwanu; mwalo a gu landriselago gasi gu gu wudza. Uwe khuwe u va livbago, aholu avbo gwago, kha va gu livbi gilo.

³⁵ Khu guralo, uwe gibhayi wewe, yingisa magana ya Pfhumu Nungungulu!

³⁶ Mune Pfhumu Nungungulu a ngu ganela kharati, khuye: Olu uwe u dzudzugidego thomba yago khu gu funungula wumbwiri wago u yeyedzidego sibhayi sago, gumogo ni gu gira wubhayi ni sifananiso sago nya gunyenyeze, gumogo ni novba wa sanana sago u va ningidego,

³⁷ khu guralo, wona nya gukhuwe nyi na tshanganisa sibhayi sago satshavbo sile u bhayidego naso, sile u nga bani u si haladza ngudzu ni sile u nga bani u si si haladzi. Nyi na si tombanisa khu maphuvbo yatshavbo gasi va guwugele, nyi na va nonedza wumbwiri wago gasi va kodze gu wona wumbwiri wago watshavbo.

³⁸ Nyi na gu lamula kha nga idzo va lamudwago khidzo vanyamayi nya maphuphulu, ni vale va songago vathu; nyi na vbaladza novba wago khu likhulo langu li wusago wufu.

³⁹ Eni nyi na gu ningela mandzani ga sibhayi sago, avo va na khungumulela malanga yago nya miphaso nya gunyenyeze ya musigomoni, va gu rundruwulela guambala gwago, va gu dzegela sombo sago nya lisima, va gu diga nuri wumbwiri.

⁴⁰ Va nata ni gidzemo nya gingi va ta gu dwanisa, va gu pfara khu siwindri, ni gu gu hendrelela khu matshari yawe.

⁴¹ Avo va na vbisa dzinyumba dzago khu nilo, va gu tsayisa nu gu wonwa khu vanyamayi nya vangi. Nyi na gu gira u vbedze wubhayi, u si engedzi gambe gurengelela sibhayi sago.

⁴² Khu guralo likhulo langu nago li na vbela ni khorodza yangu yi tadego khu wufu yi na vbela; nyi na tangala, nyamba goroga gambe.

⁴³ Uwe khu kotani nyamba alakanya matshigu nya wanana wago, aholu u nyi wusela likhulo langu khu silo satshavbo soso, khu lisine nyi na thesa hungoni gwago esi u giridego, a ngu ganela Mune Pfhumu Nungungulu, khuye khu na gira gambe wubhemba ni simbe silo nya gunyenyeze.

Jerusalema nya gunyenyeze guvbindra mambe madhoropa

⁴⁴ Vatshavbo avo va golago gu sawutela mavingu, va na sawutela mavingu yaya khu uwe, khavo: “Gyanana gegi gya gu godza mayi waye.”

⁴⁵ Uwe khu lisine u gyanana gya mayime wule, a nga diga mwama waye ni sanana saye; uwe u ngu fanana ni vandriyago nya vanyamayi va digidego navo vama vawe ni sanana sawe. Mayime wanu, a diri Muhiti ni babe wanu a diri Muamori.

⁴⁶ Ndriyago nya koma a gu uye Samariya, a gu vbanya khu phuvbo gwago ga Wuronga gumogo ni sanana saye; ni ndriyago nya nandra a gu uye Sodhoma, a vbanyago khu phuvbo gwago ga Marandzi gumogo ni sanana saye.

⁴⁷ Khu guralo, kha wa landra dzindzila dzawe ni gu gira gunyenyeza va gu giridego avo, aholu u giride silo ya gunyenyeze ngudzu mithumoni gwago guvbindra avo.

⁴⁸ Nyi ngu sambanya khu gu vbanya gwangu gukheni; a ngu ganela Pfhumu Nungungulu, ambari ndriyago Sodhoma ni sanana saye, gima kha va gira nya nga iso u giridego uwe gumogo ni sanana sago nya vanyamahegyane.

⁴⁹ Owu khu nandru wa ndriyago Sodhoma, uye gumogo ni sanana saye nya gutale khu matshandza ni wutetema, kholu va diri ni guhodza nya gutale ni sifuyo nya singi; kha va thela kota khu gu phasa sisiwana ni va nya guhamuga.

⁵⁰ Va di dzi khusedza va gira silo nya gunyenyeze mbeli gwangu; khu guralo, na nyi si wonide isoso, nyi di va tutumisa mule.

⁵¹ Samariya kha nga gira gipandre nya sighoho sago; uwe u giride guvivba nya gukhongolo ngudzu guvbindra uye, nya gufananisa khu gwatshavbo guvivba u giridego, vandriyago va gu wonega na vari vathu va agidego.

⁵² Khu guralo, uwe u fanede gu tshaniseka khu dzitshoni dzago, uwe u lamudego vandriyago, khu kotani nya sighoho sago, u giridego guvbindra avo; aholu avo va lulamide guvbindra uwe; khala dzitshoni u wuya gambe u tshaniseka khu kotani nya dzitshoni dzago, kholu u lamude vandriyago.

⁵³ Khu guralo, nyi na wuyisa sibotshwa saye ni sa Sodhoma, gumogo ni sanana saye, ni sibotshwa sa Samariya, gumogo ni sanana saye, nyi wuyisa ni sibotshwa sago vbakari gwawe;

⁵⁴ gasi u kodze gu rwala dzitshoni dzago ni gu theswa vbavbatshi khu kotani nya satshavbo u giridego, iso si khadego kha nga gitangadziso gwawe.

⁵⁵ Gikhati vandriyago, Sodhoma ni sanana saye ni Samariya, ni sanana saye, va na wuyago va ta khala kha nga idzo va nga bani va romo khidzo khu gale; uwe nuwe ni sanana sago, u na wuya u ta khala kha nga gale.

⁵⁶ Lina la ndriyago Sodhoma, khwa nga bani u li ganela khu likana lago gikhati u nga bani u gu dzi khusedza,

⁵⁷ na gu si gu huweledwi guvivba gwago. Olu, u khade kha nga uye, gilo nya gihegiso ga vanyamahegyane va Vaasiriya ni ga vatshavbo va vbafuvbyana gwaye vanyamahegyane va Vafilisitiya va nga bani va gu hembulula khu maphuvbo yatshavbo.

⁵⁸ Uwe u na rwala tsayiso nya guvivbe gwago ni mithumo yago nya gunyenyeze. A ngu ganela Pfhumu Nungungulu.

⁵⁹ Mune Pfhumu Nungungulu a ngu ganela kharati, khuye: “Nyi na gu tsayisa gukhedza khu mithumo yago u giridego; kholu u yeyiside gisambanyo gyangu, u funya gidzumeledzwano gyangu.

⁶⁰ Ambari khu guralo, eni nyi na alakanya gidzumeledzwano nyi giridego nago wumbirini gwago, gambe nyi na hunga nago gidzumeledzwano nya kala gupindruga.

⁶¹ Khavbo avbo, uwe u na alakanya dzindzila dzago u khala dzitshoni, gikhati u na hakhago vandriyago nya vanyamayi, nya koma nuye nya nandra. Eni nyi na va ningela gwago kha nga sanana sago nya sagadzyana, aholu nasiri khu gidzumeledzwano gyangu nago.

⁶² Khu guralo nyi na hunga nago gidzumeledzwano, khavbo u na dzitigo gukhuwe Eni kheni Pfhumu Nungungulu.

⁶³ Nyi na gira esi, gasi u alakanye ni gu khala dzitshoni, gima u si tuli gambe likana lago khu kotani nya dzitshoni dzago, gikhati nyi nga tsetselelana nago khu satshavbo u giridego; a ngu ganela Mune Pfhumu Nungungulu.”