Esiteri 7 - Bhibhiliya Nya Guage

Tsayiso wa Hamani

¹ Khavbo avbo, mufumeli ni Hamani va di hongola buzotunu wa pfhumugadzi Esiteri.

² Khu litshigu nya wuvili, na vari vbakari nya gusele wadwa, mufumeli a di embela nyaluphye Esiteri, khuye: “Pfhumugadzi, nyi lombe igyo u gi vbwetago u na gi mana. Ambari wa gu lomba gukhuwe nyi gu pilela khu vbakari mufumo wangu, nyi na gu ninga.”

³ Pfhumugadzi Esiteri a di hakha, khuye: “Mufumeli, wa gu nengedziswa kheni ni gu nyi tsakela, gilombo gyangu nya gu lomba gukheni nyi digwa nyi vbanye ni gu vbweta gambe gukheni vandriyangu navo va digwe va vbanya.

⁴ Kholu hi ningedwe eni gumogo ni va na gyathu, gasi hi songwe hi sasedwa hethu bhi, hi fuva hatshavbo. Nari gupwani hi di rengiswa basi hi khala dzikhumbi, vama ni vanyamayi nyi di hadza gu degula nyamba ganela gilo. Aholu nala wathu gima na sa dzi kodza gu agisa guvivba gwatshavbo a na girago ga mufumeli khu gusongwa gwathu.”

⁵ Khavbo avbo, mufumeli Asuwero a di wudzisa pfhumugadzi Esiteri, khuye: “Gasi khu mani muthu yoyo a nga tiya longo a gira silo nya nga isoso, womo hayi?”

⁶ Pfhumugadzi Esiteri a di hakha, khuye: “Nala ni mutshanisi wathu, khu muvivbi yoyu Hamani!” Khavbo avbo, Hamani a di tala khu rerema mbeli ga mufumeli ni ga pfhumugadzi Esiteri.

⁷ Mufumeli a di vila khu likhulo, a diga gu hodza buzo gumogo ni gu sela, a hongola a ya khala tendrelani wa ndrangani gwaye, aholu Hamani a di khuga a ema a khongotela pfhumugadzi Esiteri gu a vbulugise womi waye, kholu a di gu wona gukhuye mufumeli gorogide a ngu vbweta gu mu songa.

⁸ Mufumeli na wide khu tendrelani, a ta bela nyumbani nya buzo, a di ta mana Hamani na thegide vbagikhalotunu gya pfhumugadzi Esiteri, a khighela avbovbo. Mufumeli a di ganela, khuye: Mwama yoyu, gu diga nya iso a giridego, a gu vbweta gambe gu pfinya ni pfhumugadzi yangu avba ndrangani gwangu na nyi gu mu wona, gani? Na gu vbedza gu ganela magana yaya va di ta fenengedza khovbe ya Hamani.

⁹ Khavbo avbo, moyo nya mithenwa yi nga bani yi thumela mufumeli, nya gupwani khu Haribhona, a di ganela, khuye: Gambe Hamani a tsitside madingo gaya gwaye, nya livbandre magumi mikono gulapha guya vbatshani, gasi gu vbayega avbo Moridhekayi, muthu a gu phasidego ngudzu uwe mufumeli. Mufumeli a di ganela, khuye: “Mu vbayegeni avbovbo.”

¹⁰ Va di vbayega Hamani vbamadingotunu a nga bani a ma tsitside gasi gu vbayega avbo Moridhekayi. Khavbo li bosidego likhulo la mufumeli.