Esiteri 5 - Bhibhiliya Nya Guage

Gilombo gya Esiteri ga mufumeli

¹ Na ma vbindride matshigu mararu, Esiteri a di ambala dzingandzu dzaye nya wupfhumugadzi, a ya bela nyumbani ga mufumeli vbafuvbi ni phatani nya wufumu. Mufumeli a di khade vbagikhalotunu gwaye nya wufumu gi khedzidego mwanyatunu.

² Avbo mufumeli a nga wona pfhumugadzi Esiteri na emide nyumbani a di mu tsakela a mu khusedzela ndronga nya ndralama nya wufumu a nga bani na pharide mandzani. Khu guralo, Esiteri a di hidzimela a ya khuha tshoka nya ndronga yoyo.

³ Khavbo avbo, mufumeli a di mu wudzisa, khuye: “Gasi mahungu muni, pfhumugadzi Esiteri? Nyi embele iso u si vbwetago nyi na gu ninga, ambari wa gu lomba gu piledwa khu vbakari gipandre nya mufumo!”

⁴ Esiteri a di mu hakha, khuye: Sa gu gu tsakisa uwe, mufumeli, nyi di gu vbweta gukheni, muhuno u ta ni Hamani buzotunu nyi wu nga dongisedwago uwe.

⁵ Mufumeli a di ganela, khuye: “Vbiredzani gu ya rana Hamani, hi ta gira iso Esiteri a lombago!” Khu guralo, mufumeli ni Hamani, va di ya hodza buzo wu dongisedwego khu Esiteri.

⁶ Na vari vbakari nya gusele wadwa, mufumeli a di embela Esiteri, khuye: “Nyi embele igyo u gi vbwetago gu nyi lomba, nyi na gu ninga; ni gevbini u na gu nyi lombago u na gi mana, ambari wa gu lomba gu kabaniswa khu vbakari mufumo wangu u dzega gimbe gipandre.”

⁷ Esiteri a di hakha, khuye: “Iso nyi si lombago gumogo ni gu si vbweta khesi:

⁸ Pfhumu yangu, nya gu bani nyi gu tsakiside u gu dzumela esi nyi si golago gumogo ni gu gira iso nyi gu lombago, nya gu gola gukheni mwendro mindru u ta ni Hamani vbabuzotunu nyi na mi dongiselago, avbovbo khavbo nyi nata gu ningago gilombo nyi gi vbwetago.”

Hamani a ngu vbweta gu songa Moridhekayi

⁹ Khu guralo, litshigu lolo Hamani a di duga a hongola, monyo waye na wu salalegide khu gutsaka. Aholu a di gorogiswa ngudzu khu Moridhekayi, gikhati a nga mu wona vbamwanyatunu ga mufumeli, a si khugi ambari gu yeyedza githawo;

¹⁰ ambari khu kharato, Hamani a di dzi phara a gu hongola gaya; a di ya ranisa dzipari dzaye, gumogo ni mwangadzi waye Zeresi,

¹¹ Hamani a di va tshamusela gutala nya dzithomba dzaye, ni gutala nya sanana saye, ni idzo mufumeli a mu khusedzidego khidzo gu khala muthangeli nya dzindruna ni sithumi sa mufumeli.

¹² Bwelo khavbo a ganela, khuye: “Pfhumugadzi Esiteri a dongisede buzo nya gugirele mufumeli, aholu kha rana mumbe muthu, a di rana basi mufumeli ni eni Hamani. Ambari mindru, kheni basi nyi na gu bangaladzago mufumeli buzotunu.

¹³ Aholu satshavbo sesi kha si nyi nengedzisi, nya gu wona Mujudha wule Moridhekayi na gu simama gu thuma nyumbani ga mufumeli.”

¹⁴ Khu guralo, mwangadzi waye Zeresi, gumogo ni dzipari dzaye dzatshavbo, va di mu embela, khavo: “Gu na tsitswe madingo mana ma enedzago livbandre magumi mikono gulapha guya vbatshani, gasi mindru vbadzimindrutunu u na ganela ni mufumeli gasi gu Moridhekayi a vbayegwe avbovbo, gasi uwe khavbo u na gu hongolago buzotunu u na tsakide.” Mawonelo yaya ma di nengedzisa Hamani, avbo a nga leletisa gu tsitswa madingo.