Esiteri 4 - Bhibhiliya Nya Guage

Esiteri a ngu tumbisa gu lombelela khu va na gyawe

¹ Gikhati Moridhekayi a pwidego iso si nga dugelelago, a di pferula dzingandzu dzaye, a ambala dzingandzu nya gililo, a dzi todza nguma, a duga a ya bela vbakari nya lidhoropa a womba huwa khu wuvi nya wukhongolo,

² a ya ema nyangwani ya mufumeli, kholu muthu, ambadego silendra nya gililo a di si dzumedziswi gu bela nyangwani ga mufumeli.

³ Ga sipandrengulu satshavbo umo wu vbohidego nayo wa mufumeli gumogo ni sileletelo, gu diri ni gililo nya gikhongolo vbakari ga Vajudha, va hala va si hodzi gilo va tsikwila; nya vangi va di lala vbadzisakutunu va tola nguma.

⁴ Gikhati vanyamahegyane ni mithenwa yi thumelago Esiteri va ngata mu embela mahungu yaya, ma di mu vbisisa ngudzu monyo, a rumela ga Moridhekayi dzingandzu nya dzadi, gasi a ambale, a tshula dzile nya gililo; aholu Moridhekayi kha nga dzumela gu hakha dzingandzu dzile.

⁵ Khu guralo, Esiteri a di rana Hataki, (moyo nya mithenwa ya mufumeli, uye a nga bani a vegidwe gu mu thumela) a mu rumela gu hongola ga Moridhekayi, a ya mu wudzisa gu gasi ginani gi mu garadzago gu kala a gira sile.

⁶ Khu guralo, Hataki a di hongola ga Moridhekayi tendrelani nya lidhoropa wu nga bani wuri vbafuvbi ni nyangwani ga mufumeli.

⁷ Moridhekayi a di mu tshamusela satshavbo si nga mu dugelelago; bwelo khavbo a embela ni tengo nya dzitsapawu Hamani a wu tumbisidego gu thela umo nya kwama wa mufumeli khu gu mbembisa Vajudha.

⁸ Moridhekayi a di mu ninga gambe ni khwepa nya nayo wu dusidwego tigoni ga Suza tsindza nya mufumo, owu wu leletelago gu fuvisa Vajudha. Moridhekayi a di mu lomba guya wu yeyedza ga Esiteri, ni gu mu tshamusela satshavbo, ni gu mu lomba gu Esiteri a ya lila ga mufumeli gasi a pwele wuhindzi vathu vaye.

⁹ Khu guralo, Hataki a dita tshamusela Esiteri magana yatshavbo ya Moridhekayi.

¹⁰ Khavbo avbo, Esiteri a di ruma Hataki guya embela Moridhekayi, khuye:

¹¹ “Sithumi satshavbo sa mufumeli ni vathu vatshavbo va phalalegidego khu sipandrengulu satshavbo nya mufumo, ni wevbini muthu nya mwama mwendro nyamayi, a ngu dziti gwadi gukhuye uye a belago ndrani nya nyumba nya wufumu gasi guya wonana ni mufumeli, nyamba ranwa, nayo moyo basi wu emisidwego; fanede gu songwa, vbavbandze gwa gu mufumeli a gu khusedza ndronga yaye nya ndralama a mu dzumedzisa gukhuye a na vbanye; aholu gu ngu ninga magumararu matshigu mufumeli na si gu nyi rani.

¹² Va diya tshamusela Moridhekayi magana ya Esiteri.

¹³ Khavbo avbo, Moridhekayi a di va ruma gu yisa phindrulo yeyi ga Esiteri, khuye: U nga pimisi gukhuwe uwe khuwe u na gu vbulugago guvbindra Vajudha vatshavbo, kholu u guromo nyumbani ga mufumeli.

¹⁴ Aholu wa gu degula khu gikhati nya nga egi, guvbanyiswa ni gutshulega nya Vajudha gu nata khu mambe malanga, dziti gwadi nya gukhuwe uwe ni valongo vago, mwatshavbo mu nafa. Aholu khu mani a dzitigo nya gukhuye uwe gu kala u todzwa wupfhumugadzi, kotani nya gu vbwete gu ndreyisa libango leli!”

¹⁵ Esiteri a di va ruma guya ninga phindrulo Moridhekayi, khuye:

¹⁶ Indra tshanganisa Vajudha vatshavbo va vbanyago dhoropani ga Suza, mu hala khu eni mu vbedza matshigu mararu mu si hodzi ni gu sela gilo wutshigu ni mihani, eni neni gumogo ni sithumi sangu hi na hala. Khu hwane, nyi na ya wonana ni mufumeli, ambari wu si gu nayo; nya gufa, nyi fude.

¹⁷ Khu guralo, Moridhekayi a di hongola a ya gira satshavbo iso a nga leletedwago khu Esiteri.