Esiteri 2 - Bhibhiliya Nya Guage

Esiteri a ngu wumbedwa gu khala pfhumugadzi

¹ Na si vbindride silo sesi, mufumeli Asuwero, na boside likhulo laye, a di alakanya Vhasiti iso a nga girago ni nayo a mu vegedego.

² Khu guralo, madzaha ma nga bani ma gu thumela mufumeli, ma di ganela, khayo: Mufumeli a na vbwetedwe dzimbiri nya makendzi nya gukhalege gwadi ni wumburi.

³ Ni gukhayo mufumeli a na rumele dzindruna sipandrenguluni gwatshavbo a fumelago umo, gasi gu tombanisa dzimbiri dzatshavbo nya makendzi nya gumbure na dzi khalegide gwadi, va dzi resa dhoropani gwa Suza, tsindza nya litigo, vata hakhwa khu Hegayi, thenwa a wonelelago vagadzi va mufumeli gasi va ya dongisedwa wumburi nya wadi.

⁴ Mbiri yi na tsakisago mufumeli khiyo yi na khalago pfhumugadzi yaye yi tshikedza wulanga wa Vhasiti. Mahungu yaya ma di tsakisa mufumeli, gu girwa kharato.

⁵ Dhoropani mule ga Suza, a di gu vbanya mwama moyo nya Mujudha, lina laye nya gupwani khu Moridhekayi, mwamana wa Jayiri, wa Simeyi wa Khisi nya lihundzu la na Bhejami,

⁶ a nga modwago Jerusalema a vbagedwa gumogo ni dzikhumbi dzi nga bani dziri ni Jekoniya, mufumeli wa Judha, a nga modwa khu Nabhukodhonosori, mufumeli wa Bhabhiloni.

⁷ Moridhekayi a di wundza Hadhasa a gu uye Esiteri, gyanana gya babedugwane waye a nga bani na fedwe khu vavelegi vaye, a diri nyamahegyane nya wumburi ni gu khalega gwadi. Moridhekayi a di mu fuya a mu gira gyanana gyaye.

⁸ Gikhati va tivisidego nayo ni sileletelo sa mufumeli nya gu tombanise vanyamahegyane vatshavbo dhoropani gwa Suza, tsindza nya mufumo, gu ya woneledwa khu Hegayi, va di dzega nuye Esiteri va mu yisa nyumbani ga mufumeli, gu nga bani gu woneledwa khu Hegayi, muwoneleli wa vagadzi va mufumeli.

⁹ Hegayi a di salalegiswa khu Esiteri, khu guralo, a di vbiredza gu mu ninga mafura nya guphorole gumogo ni guhodza nya gunone, bwelo khavbo a ningedwa ga livbandre na vavili vanyamahegyane va nyumbani ga mufumeli avo va tidwago na va tumbegide, gasi va mu sayisa. Bwelo khavbo va ya ningwa gu khala malangani nya yadi nyumbani nya wufumu.

¹⁰ Esiteri kha nga ganela khu lisaho laye, ambari khu lifumbu laye, kholu Moridhekayi kha mu dzumedzisa gu ganela.

¹¹ Tshigu ni tshigu Moridhekayi a di gu gimbilagimbila ndrani nya laba gu khalago vanyamayi, gasi guti mavbanyelo ya Esiteri ni iso si na gu mu dugelelago.

¹² Avbo gu nga vboha mahegiso nya nayo wu vegidwego nya vanyamayi, nya gu vanyamahegyane vatshavbo va di vbedza likhumi na mivili migima na va gu dzi mburisela; livbandre na moyo migima va di tola mafura nya mira, yimbe livbandre na moyo va di tola mafura nya gunungele ni simbe sitolatola si gimbilelanago ni gu mburisela vanyamayi na va si dzi wonegisi mbeli ga mufumeli Asuwero.

¹³ Hwane nya isoso, khavbo nyamahegyane ata dzi wonegisago ga mufumeli, a ningwa ni sevbini a si vbwetago gu duga naso khu nyumbani nya vanyamayi, a hongola nyumbani ga mufumeli.

¹⁴ Nyamahegyane ni nyamahegyane a di bela nyumbani ga mufumeli vbasilambotunu, vbadzimindrutunu a bwelela nyumbani nya wuvili, a gu nyumba ya vanyamayi, yi woneledwago khu Sahasigazi, thenwa a thumelago mufumeli ni gu khevisela vagadzi vaye nya vadugwana. Nyamahegyana yoyo a di si bweleli nyumbani ga mufumeli, vbavbandze nya gu na dogoredwe khu mufumeli a mu ranisa gambe khu lina laye.

¹⁵ Esiteri nyamahegyane wa Abhiyayili, babedugwane wa Moridhekayi, uye a nga mu wundzago a khala gyanana gyaye, na gi vbohide gikhati nya gubele nyumbani ga mufumeli, gimwalo a mu lombidego vbavbandze nya iso a nga ningwa khu Hegayi, thenwa wa mufumeli, muwoneleli wa vagadzi va mufumeli. Esiteri a di salalegisa vathu vatshavbo va nga bani va mu wona.

¹⁶ Khu guralo, khu ngima nya likhumi, a gu ngima nya tebhete, khu mwaga nya livbandre na wuvili nya gufume ga mufumeli Asuwero, Esiteri, a di dzegwa a yiswa nyumbani nya wufumu.

¹⁷ Mufumeli a di nengedziswa ngudzu khu Esiteri guvbindra vanyamayi vatshavbo, a manega nari ni wuhigo mbeli gwaye guvbindra dzimbe dzimbiri. Mufumeli a di mu ambagisa gihugu nya wufumu hungoni mu gira pfhumugadzi wulangani wa Vhasiti.

¹⁸ Khu guralo, mufumeli a di gira buzo nya wukhongolo, nya gu hakhe Esiteri, a ramba manganagana ni sithumi saye satshavbo, litshigu leli li loledziswa gupwani, litshigu nya guhefemule ga sipandrengulu satshavbo, va kabanisedwa siningwa nya gu ningwe khu mufumeli.

¹⁹ Khu gikhati nya wuvili, va nga tshangaiswago vanyamahegyane nya makendzi, Moridhekayi a di hathidwe gu khala vbanyangwatunu ya mufumeli.

²⁰ Gukhugela gikhati gyogyo, Esiteri a di si dzi pwadzi lisaho laye gumogo ni lifumbu laye, kha nga idzo a nga bani a layidwe khidzo khu Moridhekayi. Kholu Esiteri, a di gu yingisa Moridhekayi kha nga idzo a nga bani a mu yingisa khidzo gikhati a nga dandriswago khuye.

²¹ Khu matshigu yoyo, Moridhekayi a di gu thumela nyangwani ga mufumeli, vawoneleli vavili nya mithenwa, Bhigidhana ni Teresi va nga bani va wonelela vbanyangwatunu, va di gira gikungo nya gu songe mufumeli Asuwero.

²² Mahungu yaya ma di tugudwa khu Moridhekayi a tivisa pfhumugadzi Esiteri, Esiteri a ya tivisa mufumeli iso a nga embedwago khu Moridhekayi.

²³ Gikhati va wudzisedego gwadi mahungu yaya, ma manega na lisine, vama vava khu wuvili wawe va di vbayegwa vbasimbotunu vafa. Mahungu yaya, ma lovidwe umo nya Libhuku nya Matimo, na ma gu wonwa khu mufumeli.