Ekisodha 32 - Bhibhiliya Nya Guage

V. GUWUSEDZWA NYA GIDZUMELEDZWANO Gimombyana nya ndralama

¹ Aholu, avbo vathu va nga wonago gukhavo Mosi a ngu hwela gu tshiga khu mugigomoni, va diya randrela Aroni va mu embela, khavo: “Hi wumbele vanungungulu va na gu hi thangelago mbeli, kholu Mosi a gu uye a hi dusidego tigoni ga Egipito, kha hi dziti gukhethu ginani gi mu manego.”

² Khavbo avbo, Aroni a di va hakha, khuye: “Dusani dziphera nya ndralama dzi guromo dzindzeveni dza vagadzi vanu, dza sanana sanu nya sikhwathana nesi nya sagadzyana, mu nyi resela avba.”

³ Khu guralo, vathu vatshavbo va di tshula dziphera nya ndralama va nga bani va ambade dzindzeveni, va gu dzi yisa ga Aroni.

⁴ Uye a di dzi hakha khu mandzani gwawe a dzi nyiviligisa umo nya giwumbelo a gira githombe nya mombe nya gikete. Khavbo avbo, avo va di kulungela va ganela, khavo: “Enu sanana sa Israyeli kha mu mu woni oyu nungungulu wanu a mi dusidego tigoni ga Egipito a mi resani avba.”

⁵ Na wone esi, Aroni a di gira giluvelo mbeli nya githombe, a gu khusedza lito a ganela khu tshivba, khuye: “Mindru hi na gira buzo nya gurungudze Pfhumu Nungungulu.”

⁶ Khu mindru gakone, ni dzimindru, va di ningela dzimhamba nya miphaso nya guvbiswe ni dzimhamba nya gubonge. Vathu va di khala vbavbatshi va hodza, va sela, va khuga va hana, va gu ghiya.

⁷ Khavbo avbo, Pfhumu Nungungulu a di embela Mosi, khuye: “Vbiredza, u relela! Kholu vathu vago, avo u nga va dusago tigoni ga Egipito va ghohide.”

⁸ Kha va hwela gu penga va diga ndzila nya milayo nyi va ningidego. Va dzi wumbede githombe nya mombe nya gikete, va gi khozela, va gi ninga miphaso nya dzimhamba, va ganela, khavo: “Uwe Israyeli, oyu khu nungungulu wago a gu dusidego tigoni ga Egipito.”

⁹ Pfhumu Nungungulu a di engedza a embela Mosi, khuye: “Eni nyi ngu va pima gwadi vathu vava, nyi ngu vati gukheni vathu nya gubange mihungo.

¹⁰ Nyi dige nyi va nonedza guvbisa nya likhulo langu, nyi va mbembisa. Aholu Eni nyi na wusa lihundzu nya likhongolo khavbo gwago.”

Mosi a ngu lombelela khu vathu

¹¹ Aholu, Mosi a di zama gurudzisela monyo wa Pfhumu Nungungulu waye, khuye: “Khu ginani Pfhumu u na khondrisago likhulo lago u wugela vathu vago u va dusidego khu tigoni ga Egipito khu tshivba nya yikhongolo nya libogo lago li palago satshavbo?

¹² Khu ginani u vbwetago gu ninga wulanga Vagipiti va kodza gu ganela, khavo: Nungungulu a di gira litsoro a va dusa khu gufela guya va songa musigomoni, a va fuvisa mafuni! Rula monyo wago, u bosa likhulo lago, u vega hwindzo mapimo nya gugirele guvivba vathu vago!

¹³ Dundruga Abrahama, Isaki ni Jakobe, sithumi sago, u nga va sambanyelago khu Lina lago, khuwe: Livelego lanu li na tala li andra gu fanana ni dzinyeledzi dza ndzadzini, nyi na ninga sanana sanu litigo leli nyi nga mi embelani, li khala thomba yanu kala gupindruga.”

¹⁴ Khu guralo, Pfhumu Nungungulu a di dzi laya a thindrekisa tsayiso a nga bani a wu dongisede gu vbedza khuwo vathu vaye.

Mosi a ngu tshiga khu gigomoni. Vathu va ngu tsayiswa

¹⁵ Mosi a di relela khu gigomoni na pharide mandzani siwindri sa sivili nya nayo, si lovidwego maphuvbo ya mavili, eno ni eno.

¹⁶ Siwindri sesi sa sivili a diri thumo wa Nungungulu, ni esi si lovidwego avbo, si di bethwa khu Nungungulu.

¹⁷ Avbo va ngapwago ligwaha nya vathu va nga bani va gu ghiya, Josuwa a di ganela ga Mosi, khuye: “Gu ngu pwala ligwaha nya nyimbi lizumboni.”

¹⁸ Mosi a di hakha, khuye: “Khandri malito nya gunengele gupala, gambe khandri dzihuwa nya gililo nya vathu va padwego. Esi nyi si pwago eni, malito nya vathu va embelelago!”

¹⁹ Avbo Mosi a nga hidzimelago wughovelotunu, a di wona githombe nya mombe ni vathu na va gu hana. A dipwa wuvi nya wukhongolo, a gu rinya siwindri vbavbatshi, si gu pandrega tshinani nya gigomo.

²⁰ Hwane nya ugo, a di dzega githombe gile nya mombe va nga bani va gi wumbide a gi vbisa, a gi kuya gi khala nguma a gi thela matini a ninga sanana sa Israyeli si sela.

²¹ Mosi a di wudzisa Aroni, khuye: “Ginani va gu giridego vathu vava, gukala u va diga va gira gighoho nya gikhongolo kharati?”

²² Aroni a di hakha, khuye: “Pfhumu yangu, u nga gorogi ngudzu guvbindrisa. Uwe u ngu dziti gwadi gukhuwe vathu vava va wegelede guvivbani.

²³ Va di nyi embela, khavo: Hi wumbele nungungulu a na gu hi thangelago mbeli, kholu Mosi a gu uye a nga hi gira hi duga tigoni ga Egipito kha hi dziti gukhethu ginani gi mu manego.”

²⁴ Eni nyi di va embela, kheni: “Muthu ni muthu a gu na ni ndralama a na yi duse. Avo va di tshulela ndralama yawe va nyi ninga. Eni nyi di yi rinya niloni, khavbo avbo, gu di duga gimombyana gegi.”

Mosi a ngu ruma gu songwa vakhozeli nya vanungungulu nya malipha

²⁵ Mosi a di wona gukhuye vathu va ngu dzi ningedzela mavbanyeloni nya guhambane ni nayo, kholu Aroni a nga va digago va gu ndreya, va dzi gira kharato gipoyilo vbakari ya valala vawe.

²⁶ Mosi a diya ema nyangwatunu nya wughovelo a ganela khu tshivba, khuye: “Oyu a golago Pfhumu Nungungulu a nate eno gwangu!” Satshavbo sanana sa Levhi si diya patana naye.

²⁷ Uye a di va embela, khuye: “Pfhumu Nungungulu wa Israyeli a ngu ganela kharati, khuye: Moyo ni moyo a na phare litshari laye, tsemakanyani wughovelo mu vbindra khu nyangwa ni nyangwa, muthu ni muthu a songa ndriyaye, pari yaye ni muakelane waye!”

²⁸ Sanana sa Levhi si di gira kha nga edzi Mosi a nga va rumago; litshigu lolo, va fude gipimo nya magumararu mazana (3.000) nya vathu va na Israyeli.

²⁹ Mosi a di ganela, khuye: “Gukhugela muhuno, dzi ningeleni mu agisedwa Pfhumu Nungungulu; kholu moyo ni moyo songide gyanana gyaye mwendro ndriyaye; khu guralo, mu manide gikategiso muhuno.”

Nombelo wa Mosi

³⁰ Khu mindru gakone, Mosi a di ganela ga vathu, khuye: “Mu giride gighoho nya gikhongolo. Aholu, muhuno, nyi na gwela ga Pfhumu Nungungulu, gufela gukheni mwendro a gu dzina saye nyi naya dzi kodza gu hakha ditshedzo nya sighoho sanu.”

³¹ Mosi a di bwelela ga Pfhumu Nungungulu, aya ganela, khuye: “Oh, ava vathu va giride gighoho nya gikhongolo ngudzu. Va dzi girede nungungulu nya guwumbwe khu ndralama.

³² Ambari ulo, gira wuhindzi u va tsetsela gighoho gegi. Wa gumba dzina gu va tsetsela, dusa lina langu libhukuni u nga lovago.”

³³ Pfhumu Nungungulu a di embela Mosi, khuye: “Oyu a nyi ghohedego khuye nyi na futago lina laye libhukuni gwangu.

³⁴ Olu, khuga u thangela vathu vangu, u va yisa iyo nyi nga gu leletelago iyo. Ngilozi yangu yi na thanga mbeli gwago. Aholu, litshigu nya guthethise, nyi na va tsayisa khu kotani nya sighoho sawe.”

³⁵ Pfhumu Nungungulu a di tsayisa vathu kholu va nga gurumedza Aroni gu va girela gimombyana.